១២. ចូឡព្យូហសុត្តំ [ចូឡវិយូហសុត្តំ (សី. ស្យា. និទ្ទេស)]

៨៨៤. សកំសកំទិដ្ឋិបរិព្ពសានា, វិគ្គយ្ហ នានា កុសលា វទន្តិ;

យោ ឯវំ ជានាតិ ស វេទិ ធម្មំ, ឥទំ បដិក្កោសមកេវលី សោ.

៨៨៥. ឯវម្បិ វិគ្គយ្ហ វិវាទយន្តិ, ពាលោ បរោ អក្កុសលោតិ [អកុសលោតិ (សី. ស្យា. បី.)] ចាហុ;

សច្ចោ នុ វាទោ កតមោ ឥមេសំ, សព្ពេវ ហីមេ កុសលា វទានា.

៨៨៦. បរស្ស ចេ ធម្មមនានុជានំ, ពាលោមកោ [ពាលោ មគោ (សី. ស្យា. ក.)] ហោតិ និហីនបញ្ញោ;

សព្ពេវ ពាលា សុនិហីនបញ្ញា, សព្ពេវិមេ ទិដ្ឋិបរិព្ពសានា.

៨៨៧. សន្ទិដ្ឋិយា ចេវ ន វីវទាតា, សំសុទ្ធបញ្ញា កុសលា មុតីមា;

ន តេសំ កោចិ បរិហីនបញ្ញោ [កោចិបិ និហីនបញ្ញោ (សី. ស្យា. ក.)], ទិដ្ឋី ហិ តេសម្បិ តថា សមត្តា.

៨៨៨. ន វាហមេតំ តថិយន្តិ [តថិវន្តិ (ស្យា. ក.)] ព្រូមិ, យមាហុ ពាលា មិថុ អញ្ញមញ្ញំ;

សកំសកំទិដ្ឋិមកំសុ សច្ចំ, តស្មា ហិ ពាលោតិ បរំ ទហន្តិ.

៨៨៩. យមាហុ សច្ចំ តថិយន្តិ ឯកេ, តមាហុ អញ្ញេ [អញ្ញេបិ (ស្យា.), អញ្ញេ ច (?)] តុច្ឆំ មុសាតិ;

ឯវម្បិ វិគយ្ហ វិវាទយន្តិ, កស្មា ន ឯកំ សមណា វទន្តិ.

៨៩០. ឯកញ្ហិ សច្ចំ ន ទុតីយមត្ថិ, យស្មិំ បជា នោ វិវទេ បជានំ;

នានា តេ [នានាតោ (ក.)] សច្ចានិ សយំ ថុនន្តិ, តស្មា ន ឯកំ សមណា វទន្តិ.

៨៩១. កស្មា នុ សច្ចានិ វទន្តិ នានា, បវាទិយាសេ កុសលា វទានា;

សច្ចានិ សុតានិ ពហូនិ នានា, ឧទាហុ តេ តក្កមនុស្សរន្តិ.

៨៩២. ន ហេវ សច្ចានិ ពហូនិ នានា, អញ្ញត្រ សញ្ញាយ និច្ចានិ លោកេ;

តក្កញ្ច ទិដ្ឋីសុ បកប្បយិត្វា, សច្ចំ មុសាតិ ទ្វយធម្មមាហុ.

៨៩៣. ទិដ្ឋេ សុតេ សីលវតេ មុតេ វា, ឯតេ ច និស្សាយ វិមានទស្សី;

វិនិច្ឆយេ ឋត្វា បហស្សមានោ, ពាលោ បរោ អក្កុសលោតិ ចាហ.

៨៩៤. យេនេវ ពាលោតិ បរំ ទហាតិ, តេនាតុមានំ កុសលោតិ ចាហ;

សយមត្តនា សោ កុសលោ វទានោ, អញ្ញំ វិមានេតិ តទេវ បាវ.

៨៩៥. អតិសារទិដ្ឋិយាវ សោ សមត្តោ, មានេន មត្តោ បរិបុណ្ណមានី;

សយមេវ សាមំ មនសាភិសិត្តោ, ទិដ្ឋី ហិ សា តស្ស តថា សមត្តា.

៨៩៦. បរស្ស ចេ ហិ វចសា និហីនោ, តុមោ សហា ហោតិ និហីនបញ្ញោ;

អថ ចេ សយំ វេទគូ ហោតិ ធីរោ, ន កោចិ ពាលោ សមណេសុ អត្ថិ.

៨៩៧. អញ្ញំ ឥតោ យាភិវទន្តិ ធម្មំ, អបរទ្ធា សុទ្ធិមកេវលី តេ [សុទ្ធិមកេវលីនោ (សី.)];

ឯវម្បិ តិត្ថ្យា បុថុសោ វទន្តិ, សន្ទិដ្ឋិរាគេន ហិ តេភិរត្តា [ត្យាភិរត្តា (ស្យា. ក.)].

៨៩៨. ឥធេវ សុទ្ធិ ឥតិ វាទយន្តិ, នាញ្ញេសុ ធម្មេសុ វិសុទ្ធិមាហុ;

ឯវម្បិ តិត្ថ្យា បុថុសោ និវិដ្ឋា, សកាយនេ តត្ថ ទឡ្ហំ វទានា.

៨៩៩. សកាយនេ វាបិ ទឡ្ហំ វទានោ, កមេត្ថ ពាលោតិ បរំ ទហេយ្យ;

សយមេវ សោ មេធគមាវហេយ្យ [មេធកំ អាវហេយ្យ (សី. បី.)], បរំ វទំ ពាលមសុទ្ធិធម្មំ.

៩០០. វិនិច្ឆយេ ឋត្វា សយំ បមាយ, ឧទ្ធំ ស [ឧទ្ទំ សោ (សី. ស្យា. បី.)] លោកស្មិំ វិវាទមេតិ;

ហិត្វាន សព្ពានិ វិនិច្ឆយានិ, ន មេធគំ កុព្ពតិ ជន្តុ លោកេតិ.

ចូឡព្យូហសុត្តំ ទ្វាទសមំ និដ្ឋិតំ.