១១. កលហវិវាទសុត្តំ

៨៦៨. ‘‘កុតោបហូតា កលហា វិវាទា, បរិទេវសោកា សហមច្ឆរា ច;

មានាតិមានា សហបេសុណា ច, កុតោបហូតា តេ តទិង្ឃ ព្រូហិ’’.

៨៦៩. ‘‘បិយប្បហូតា កលហា វិវាទា,

បរិទេវសោកា សហមច្ឆរា ច;

មានាតិមានា សហបេសុណា ច,

មច្ឆេរយុត្តា កលហា វិវាទា;

វិវាទជាតេសុ ច បេសុណានិ’’.

៨៧០. ‘‘បិយា សុ [បិយានុ (ស្យា.), បិយស្សុ (ក.)] លោកស្មិំ កុតោនិទានា, យេ ចាបិ [យេ វាបិ (សី. ស្យា. បី.)] លោភា វិចរន្តិ លោកេ;

អាសា ច និដ្ឋា ច កុតោនិទានា, យេ សម្បរាយាយ នរស្ស ហោន្តិ’’.

៨៧១. ‘‘ឆន្ទានិទានានិ បិយានិ លោកេ, យេ ចាបិ លោភា វិចរន្តិ លោកេ;

អាសា ច និដ្ឋា ច ឥតោនិទានា, យេ សម្បរាយាយ នរស្ស ហោន្តិ’’.

៨៧២. ‘‘ឆន្ទោ នុ លោកស្មិំ កុតោនិទានោ, វិនិច្ឆយា ចាបិ [វាបិ (សី. ស្យា. បី.)] កុតោបហូតា;

កោធោ មោសវជ្ជញ្ច កថំកថា ច, យេ វាបិ ធម្មា សមណេន វុត្តា’’.

៨៧៣. ‘‘សាតំ អសាតន្តិ យមាហុ លោកេ, តមូបនិស្សាយ បហោតិ ឆន្ទោ;

រូបេសុ ទិស្វា វិភវំ ភវញ្ច, វិនិច្ឆយំ កុព្ពតិ [កុរុតេ (ពហូសុ)] ជន្តុ លោកេ.

៨៧៤. ‘‘កោធោ មោសវជ្ជញ្ច កថំកថា ច, ឯតេបិ ធម្មា ទ្វយមេវ សន្តេ;

កថំកថី ញាណបថាយ សិក្ខេ, ញត្វា បវុត្តា សមណេន ធម្មា’’.

៨៧៥. ‘‘សាតំ អសាតញ្ច កុតោនិទានា, កិស្មិំ អសន្តេ ន ភវន្តិ ហេតេ;

វិភវំ ភវញ្ចាបិ យមេតមត្ថំ, ឯតំ មេ បព្រូហិ យតោនិទានំ’’.

៨៧៦. ‘‘ផស្សនិទានំ សាតំ អសាតំ, ផស្សេ អសន្តេ ន ភវន្តិ ហេតេ;

វិភវំ ភវញ្ចាបិ យមេតមត្ថំ, ឯតំ តេ បព្រូមិ ឥតោនិទានំ’’.

៨៧៧. ‘‘ផស្សោ នុ លោកស្មិ កុតោនិទានោ, បរិគ្គហា ចាបិ កុតោបហូតា;

កិស្មិំ អសន្តេ ន មមត្តមត្ថិ, កិស្មិំ វិភូតេ ន ផុសន្តិ ផស្សា’’.

៨៧៨. ‘‘នាមញ្ច រូបញ្ច បដិច្ច ផស្សោ, ឥច្ឆានិទានានិ បរិគ្គហានិ;

ឥច្ឆាយសន្ត្យា ន មមត្តមត្ថិ, រូបេ វិភូតេ ន ផុសន្តិ ផស្សា’’.

៨៧៩. ‘‘កថំសមេតស្ស វិភោតិ រូបំ, សុខំ ទុខញ្ចាបិ [ទុខំ វាបិ (សី. ស្យា.)] កថំ វិភោតិ;

ឯតំ មេ បព្រូហិ យថា វិភោតិ, តំ ជានិយាមាតិ [ជានិស្សាមាតិ (សី. ក.)] មេ មនោ អហុ’’.

៨៨០. ‘‘ន សញ្ញសញ្ញី ន វិសញ្ញសញ្ញី, នោបិ អសញ្ញី ន វិភូតសញ្ញី;

ឯវំសមេតស្ស វិភោតិ រូបំ, សញ្ញានិទានា ហិ បបញ្ចសង្ខា’’.

៨៨១. ‘‘យំ តំ អបុច្ឆិម្ហ អកិត្តយី នោ,

អញ្ញំ តំ បុច្ឆាម តទិង្ឃ ព្រូហិ;

ឯត្តាវតគ្គំ នុ [នោ (សី. ស្យា.)] វទន្តិ ហេកេ,

យក្ខស្ស សុទ្ធិំ ឥធ បណ្ឌិតាសេ;

ឧទាហុ អញ្ញម្បិ វទន្តិ ឯត្តោ.

៨៨២. ‘‘ឯត្តាវតគ្គម្បិ វទន្តិ ហេកេ, យក្ខស្ស សុទ្ធិំ ឥធ បណ្ឌិតាសេ;

តេសំ បនេកេ សមយំ វទន្តិ, អនុបាទិសេសេ កុសលា វទានា.

៨៨៣. ‘‘ឯតេ ច ញត្វា ឧបនិស្សិតាតិ, ញត្វា មុនី និស្សយេ សោ វិមំសី;

ញត្វា វិមុត្តោ ន វិវាទមេតិ, ភវាភវាយ ន សមេតិ ធីរោ’’តិ.

កលហវិវាទសុត្តំ ឯកាទសមំ និដ្ឋិតំ.