១០. បុរាភេទសុត្តំ

៨៥៤. ‘‘កថំទស្សី កថំសីលោ, ឧបសន្តោតិ វុច្ចតិ;

តំ មេ គោតម បព្រូហិ, បុច្ឆិតោ ឧត្តមំ នរំ’’.

៨៥៥. ‘‘វីតតណ្ហោ បុរា ភេទា, (ឥតិ ភគវា) បុព្ពមន្តមនិស្សិតោ;

វេមជ្ឈេ នុបសង្ខេយ្យោ, តស្ស នត្ថិ បុរក្ខតំ.

៨៥៦. ‘‘អក្កោធនោ អសន្តាសី, អវិកត្ថី អកុក្កុចោ;

មន្តភាណី [មន្តាភាណី (ស្យា. បី.)] អនុទ្ធតោ, ស វេ វាចាយតោ មុនិ.

៨៥៧. ‘‘និរាសត្តិ អនាគតេ, អតីតំ នានុសោចតិ;

វិវេកទស្សី ផស្សេសុ, ទិដ្ឋីសុ ច ន នីយតិ [និយ្យតិ (ពហូសុ)].

៨៥៨. ‘‘បតិលីនោ អកុហកោ, អបិហាលុ អមច្ឆរី;

អប្បគព្ភោ អជេគុច្ឆោ, បេសុណេយ្យេ ច នោ យុតោ.

៨៥៩. ‘‘សាតិយេសុ អនស្សាវី, អតិមានេ ច នោ យុតោ;

សណ្ហោ ច បដិភានវា [បដិភាណវា (ស្យា. បី.)], ន សទ្ធោ ន វិរជ្ជតិ.

៨៦០. ‘‘លាភកម្យា ន សិក្ខតិ, អលាភេ ច ន កុប្បតិ;

អវិរុទ្ធោ ច តណ្ហាយ, រសេសុ នានុគិជ្ឈតិ.

៨៦១. ‘‘ឧបេក្ខកោ សទា សតោ, ន លោកេ មញ្ញតេ សមំ;

ន វិសេសី ន នីចេយ្យោ, តស្ស នោ សន្តិ ឧស្សទា.

៨៦២. ‘‘យស្ស និស្សយនា [និស្សយតា (សី. ស្យា. បី.)] នត្ថិ, ញត្វា ធម្មំ អនិស្សិតោ;

ភវាយ វិភវាយ វា, តណ្ហា យស្ស ន វិជ្ជតិ.

៨៦៣. ‘‘តំ ព្រូមិ ឧបសន្តោតិ, កាមេសុ អនបេក្ខិនំ;

គន្ថា តស្ស ន វិជ្ជន្តិ, អតរី សោ វិសត្តិកំ.

៨៦៤. ‘‘ន តស្ស បុត្តា បសវោ, ខេត្តំ វត្ថុញ្ច វិជ្ជតិ;

អត្តា វាបិ និរត្តា វា [អត្តំ វាបិ និរត្តំ វា (ពហូសុ)], ន តស្មិំ ឧបលព្ភតិ.

៨៦៥. ‘‘យេន នំ វជ្ជុំ បុថុជ្ជនា, អថោ សមណព្រាហ្មណា;

តំ តស្ស អបុរក្ខតំ, តស្មា វាទេសុ នេជតិ.

៨៦៦. ‘‘វីតគេធោ អមច្ឆរី, ន ឧស្សេសុ វទតេ មុនិ;

ន សមេសុ ន ឱមេសុ, កប្បំ នេតិ អកប្បិយោ.

៨៦៧. ‘‘យស្ស លោកេ សកំ នត្ថិ, អសតា ច ន សោចតិ;

ធម្មេសុ ច ន គច្ឆតិ, ស វេ សន្តោតិ វុច្ចតី’’តិ.

បុរាភេទសុត្តំ ទសមំ និដ្ឋិតំ.