៨. សល្លសុត្តំ

៥៧៩. អនិមិត្តមនញ្ញាតំ, មច្ចានំ ឥធ ជីវិតំ;

កសិរញ្ច បរិត្តញ្ច, តញ្ច ទុក្ខេន សំយុតំ.

៥៨០. ន ហិ សោ ឧបក្កមោ អត្ថិ, យេន ជាតា ន មិយ្យរេ;

ជរម្បិ បត្វា មរណំ, ឯវំធម្មា ហិ បាណិនោ.

៥៨១. ផលានមិវ បក្កានំ, បាតោ បតនតោ [បបតតោ (សី. បី. អដ្ឋ.)] ភយំ;

ឯវំ ជាតាន មច្ចានំ, និច្ចំ មរណតោ ភយំ.

៥៨២. យថាបិ កុម្ភការស្ស, កតា មត្តិកភាជនា;

សព្ពេ ភេទនបរិយន្តា [ភេទបរិយន្តា (ស្យា.)], ឯវំ មច្ចាន ជីវិតំ.

៥៨៣. ទហរា ច មហន្តា ច, យេ ពាលា យេ ច បណ្ឌិតា;

សព្ពេ មច្ចុវសំ យន្តិ, សព្ពេ មច្ចុបរាយណា.

៥៨៤. តេសំ មច្ចុបរេតានំ, គច្ឆតំ បរលោកតោ;

ន បិតា តាយតេ បុត្តំ, ញាតី វា បន ញាតកេ.

៥៨៥. បេក្ខតំ យេវ ញាតីនំ, បស្ស លាលបតំ បុថុ;

ឯកមេកោវ មច្ចានំ, គោវជ្ឈោ វិយ នីយតិ [និយ្យតិ (ពហូសុ)].

៥៨៦. ឯវមព្ភាហតោ លោកោ, មច្ចុនា ច ជរាយ ច;

តស្មា ធីរា ន សោចន្តិ, វិទិត្វា លោកបរិយាយំ.

៥៨៧. យស្ស មគ្គំ ន ជានាសិ, អាគតស្ស គតស្ស វា;

ឧភោ អន្តេ អសម្បស្សំ, និរត្ថំ បរិទេវសិ.

៥៨៨. បរិទេវយមានោ ចេ, កិញ្ចិទត្ថំ ឧទព្ពហេ;

សម្មូឡ្ហោ ហិំសមត្តានំ, កយិរា ចេ នំ វិចក្ខណោ.

៥៨៩. ន ហិ រុណ្ណេន សោកេន, សន្តិំ បប្បោតិ ចេតសោ;

ភិយ្យស្សុប្បជ្ជតេ ទុក្ខំ, សរីរំ ចុបហញ្ញតិ.

៥៩០. កិសោ វិវណ្ណោ ភវតិ, ហិំសមត្តានមត្តនា;

ន តេន បេតា បាលេន្តិ, និរត្ថា បរិទេវនា.

៥៩១. សោកមប្បជហំ ជន្តុ, ភិយ្យោ ទុក្ខំ និគច្ឆតិ;

អនុត្ថុនន្តោ កាលង្កតំ [កាលកតំ (សី. ស្យា.)], សោកស្ស វសមន្វគូ.

៥៩២. អញ្ញេបិ បស្ស គមិនេ, យថាកម្មូបគេ នរេ;

មច្ចុនោ វសមាគម្ម, ផន្ទន្តេវិធ បាណិនោ.

៥៩៣. យេន យេន ហិ មញ្ញន្តិ, តតោ តំ ហោតិ អញ្ញថា;

ឯតាទិសោ វិនាភាវោ, បស្ស លោកស្ស បរិយាយំ.

៥៩៤. អបិ វស្សសតំ ជីវេ, ភិយ្យោ វា បន មាណវោ;

ញាតិសង្ឃា វិនា ហោតិ, ជហាតិ ឥធ ជីវិតំ.

៥៩៥. តស្មា អរហតោ សុត្វា, វិនេយ្យ បរិទេវិតំ;

បេតំ កាលង្កតំ ទិស្វា, នេសោ លព្ភា មយា ឥតិ.

៥៩៦. យថា សរណមាទិត្តំ, វារិនា បរិនិព្ពយេ [បរិនិព្ពុតោ (សី. ក.)];

ឯវម្បិ ធីរោ សបញ្ញោ, បណ្ឌិតោ កុសលោ នរោ;

ខិប្បមុប្បតិតំ សោកំ, វាតោ តូលំវ ធំសយេ.

៥៩៧. បរិទេវំ បជប្បញ្ច, ទោមនស្សញ្ច អត្តនោ;

អត្តនោ សុខមេសានោ, អព្ពហេ សល្លមត្តនោ.

៥៩៨. អព្ពុឡ្ហសល្លោ អសិតោ, សន្តិំ បប្បុយ្យ ចេតសោ;

សព្ពសោកំ អតិក្កន្តោ, អសោកោ ហោតិ និព្ពុតោតិ.

សល្លសុត្តំ អដ្ឋមំ និដ្ឋិតំ.