៥. មាឃសុត្តំ

ឯវំ មេ សុតំ – ឯក សមយំ ភគវា រាជគហេ វិហរតិ គិជ្ឈកូដេ បព្ពតេ. អថ ខោ មាឃោ មាណវោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ. សម្មោទនីយំ កថំ សារណីយំ វីតិសារេត្វា ឯកមន្តំ និសីទិ. ឯកមន្តំ និសិន្នោ ខោ មាឃោ មាណវោ ភគវន្តំ ឯតទវោច –

‘‘អហញ្ហិ, ភោ គោតម, ទាយកោ ទានបតិ វទញ្ញូ យាចយោគោ; ធម្មេន ភោគេ បរិយេសាមិ; ធម្មេន ភោគេ បរិយេសិត្វា ធម្មលទ្ធេហិ ភោគេហិ ធម្មាធិគតេហិ ឯកស្សបិ ទទាមិ ទ្វិន្នម្បិ តិណ្ណម្បិ ចតុន្នម្បិ បញ្ចន្នម្បិ ឆន្នម្បិ សត្តន្នម្បិ អដ្ឋន្នម្បិ នវន្នម្បិ ទសន្នម្បិ ទទាមិ, វីសាយបិ តិំសាយបិ ចត្តាលីសាយបិ បញ្ញាសាយបិ ទទាមិ, សតស្សបិ ទទាមិ, ភិយ្យោបិ ទទាមិ. កច្ចាហំ, ភោ គោតម, ឯវំ ទទន្តោ ឯវំ យជន្តោ ពហុំ បុញ្ញំ បសវាមី’’តិ?

‘‘តគ្ឃ ត្វំ, មាណវ, ឯវំ ទទន្តោ ឯវំ យជន្តោ ពហុំ បុញ្ញំ បសវសិ. យោ ខោ, មាណវ, ទាយកោ ទានបតិ វទញ្ញូ យាចយោគោ; ធម្មេន ភោគេ បរិយេសតិ; ធម្មេន ភោគេ បរិយេសិត្វា ធម្មលទ្ធេហិ ភោគេហិ ធម្មាធិគតេហិ ឯកស្សបិ ទទាតិ…បេ… សតស្សបិ ទទាតិ, ភិយ្យោបិ ទទាតិ, ពហុំ សោ បុញ្ញំ បសវតី’’តិ. អថ ខោ មាឃោ មាណវោ ភគវន្តំ គាថាយ អជ្ឈភាសិ –

៤៩១. ‘‘បុច្ឆាមហំ គោតមំ វទញ្ញុំ, (ឥតិ មាឃោ មាណវោ)

កាសាយវាសិំ អគហំ [អគិហំ (សី.), អគេហំ (បី.)] ចរន្តំ;

យោ យាចយោគោ ទានបតិ [ទានបតី (សី. ស្យា. បី.)] គហដ្ឋោ, បុញ្ញត្ថិកោ [បុញ្ញបេខោ (សី. បី. ក.)] យជតិ បុញ្ញបេក្ខោ;

ទទំ បរេសំ ឥធ អន្នបានំ, កថំ ហុតំ យជមានស្ស សុជ្ឈេ’’.

៤៩២. ‘‘យោ យាចយោគោ ទានបតិ គហដ្ឋោ, (មាឃាតិ ភគវា)

បុញ្ញត្ថិកោ យជតិ បុញ្ញបេក្ខោ;

ទទំ បរេសំ ឥធ អន្នបានំ, អារាធយេ ទក្ខិណេយ្យេភិ តាទិ’’.

៤៩៣. ‘‘យោ យាចយោគោ ទានបតិ គហដ្ឋោ, (ឥតិ មាឃោ មាណវោ)

បុញ្ញត្ថិកោ យជតិ បុញ្ញបេក្ខោ;

ទទំ បរេសំ ឥធ អន្នបានំ, អក្ខាហិ មេ ភគវា ទក្ខិណេយ្យេ’’.

៤៩៤. ‘‘យេ វេ អសត្តា [អលគ្គា (ស្យា.)] វិចរន្តិ លោកេ, អកិញ្ចនា កេវលិនោ យតត្តា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៤៩៥. ‘‘យេ សព្ពសំយោជនពន្ធនច្ឆិទា, ទន្តា វិមុត្តា អនីឃា និរាសា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៤៩៦. ‘‘យេ សព្ពសំយោជនវិប្បមុត្តា, ទន្តា វិមុត្តា អនីឃា និរាសា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៤៩៧. ‘‘រាគញ្ច ទោសញ្ច បហាយ មោហំ, ខីណាសវា វូសិតព្រហ្មចរិយា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៤៩៨. ‘‘យេសុ ន មាយា វសតិ ន មានោ, ខីណាសវា វូសិតព្រហ្មចរិយា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៤៩៩. ‘‘យេ វីតលោភា អមមា និរាសា, ខីណាសវា វូសិតព្រហ្មចរិយា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០០. ‘‘យេ វេ ន តណ្ហាសុ ឧបាតិបន្នា, វិតរេយ្យ ឱឃំ អមមា ចរន្តិ;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០១. ‘‘យេសំ តណ្ហា នត្ថិ កុហិញ្ចិ លោកេ, ភវាភវាយ ឥធ វា ហុរំ វា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០២. ‘‘យេ កាមេ ហិត្វា អគហា ចរន្តិ, សុសញ្ញតត្តា តសរំវ ឧជ្ជុំ;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៣. ‘‘យេ វីតរាគា សុសមាហិតិន្ទ្រិយា, ចន្ទោវ រាហុគ្គហណា បមុត្តា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៤. ‘‘សមិតាវិនោ វីតរាគា អកោបា, យេសំ គតី នត្ថិធ វិប្បហាយ;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៥. ‘‘ជហិត្វា ជាតិមរណំ អសេសំ, កថំកថិំ សព្ពមុបាតិវត្តា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៦. ‘‘យេ អត្តទីបា វិចរន្តិ លោកេ, អកិញ្ចនា សព្ពធិ វិប្បមុត្តា;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៧. ‘‘យេ ហេត្ថ ជានន្តិ យថា តថា ឥទំ, អយមន្តិមា នត្ថិ បុនព្ភវោតិ;

កាលេន តេសុ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ.

៥០៨. ‘‘យោ វេទគូ ឈានរតោ សតីមា, សម្ពោធិបត្តោ សរណំ ពហូនំ;

កាលេន តម្ហិ ហព្យំ បវេច្ឆេ, យោ ព្រាហ្មណោ បុញ្ញបេក្ខោ យជេថ’’.

៥០៩. ‘‘អទ្ធា អមោឃា មម បុច្ឆនា អហុ, អក្ខាសិ មេ ភគវា ទក្ខិណេយ្យេ;

ត្វញ្ហេត្ថ ជានាសិ យថា តថា ឥទំ, តថា ហិ តេ វិទិតោ ឯស ធម្មោ.

៥១០. ‘‘យោ យាចយោគោ ទានបតិ គហដ្ឋោ, (ឥតិ មាឃោ មាណវោ)

បុញ្ញត្ថិកោ យជតិ បុញ្ញបេក្ខោ;

ទទំ បរេសំ ឥធ អន្នបានំ,

អក្ខាហិ មេ ភគវា យញ្ញសម្បទំ’’.

៥១១. ‘‘យជស្សុ យជមានោ មាឃាតិ ភគវា, សព្ពត្ថ ច វិប្បសាទេហិ ចិត្តំ;

អារម្មណំ យជមានស្ស យញ្ញោ, ឯត្ថប្បតិដ្ឋាយ ជហាតិ ទោសំ.

៥១២. ‘‘សោ វីតរាគោ បវិនេយ្យ ទោសំ, មេត្តំ ចិត្តំ ភាវយមប្បមាណំ;

រត្តិន្ទិវំ សតតមប្បមត្តោ, សព្ពា ទិសា ផរតិ អប្បមញ្ញំ’’.

៥១៣. ‘‘កោ សុជ្ឈតិ មុច្ចតិ ពជ្ឈតី ច, កេនត្តនា គច្ឆតិ [កេនត្ថេនា គច្ឆតិ (ក.)] ព្រហ្មលោកំ;

អជានតោ មេ មុនិ ព្រូហិ បុដ្ឋោ, ភគវា ហិ មេ សក្ខិ ព្រហ្មជ្ជទិដ្ឋោ;

តុវញ្ហិ នោ ព្រហ្មសមោសិ សច្ចំ, កថំ ឧបបជ្ជតិ ព្រហ្មលោកំ ជុតិម’’.

៥១៤. ‘‘យោ យជតិ តិវិធំ យញ្ញសម្បទំ, (មាឃាតិ ភគវា)

អារាធយេ ទក្ខិណេយ្យេភិ តាទិ;

ឯវំ យជិត្វា សម្មា យាចយោគោ,

ឧបបជ្ជតិ ព្រហ្មលោកន្តិ ព្រូមី’’តិ.

ឯវំ វុត្តេ, មាឃោ មាណវោ ភគវន្តំ ឯតទវោច – ‘‘អភិក្កន្តំ, ភោ គោតម…បេ… អជ្ជតគ្គេ បាណុបេតំ សរណំ គត’’ន្តិ.

មាឃសុត្តំ បញ្ចមំ និដ្ឋិតំ.