១២. ទ្វយតានុបស្សនាសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ បុព្ពារាមេ មិគារមាតុបាសាទេ. តេន ខោ បន សមយេន ភគវា តទហុបោសថេ បន្នរសេ បុណ្ណាយ បុណ្ណមាយ រត្តិយា ភិក្ខុសង្ឃបរិវុតោ អព្ភោកាសេ និសិន្នោ ហោតិ. អថ ខោ ភគវា តុណ្ហីភូតំ តុណ្ហីភូតំ ភិក្ខុសង្ឃំ អនុវិលោកេត្វា ភិក្ខូ អាមន្តេសិ –

‘‘‘យេ តេ, ភិក្ខវេ, កុសលា ធម្មា អរិយា និយ្យានិកា សម្ពោធគាមិនោ, តេសំ វោ, ភិក្ខវេ, កុសលានំ ធម្មានំ អរិយានំ និយ្យានិកានំ សម្ពោធគាមីនំ កា ឧបនិសា សវនាយា’តិ ឥតិ ចេ, ភិក្ខវេ, បុច្ឆិតារោ អស្សុ, តេ ឯវមស្សុ វចនីយា – ‘យាវទេវ ទ្វយតានំ ធម្មានំ យថាភូតំ ញាណាយា’តិ. កិញ្ច ទ្វយតំ វទេថ?

(១) ‘‘ឥទំ ទុក្ខំ, អយំ ទុក្ខសមុទយោតិ អយមេកានុបស្សនា. អយំ ទុក្ខនិរោធោ, អយំ ទុក្ខនិរោធគាមិនី បដិបទាតិ, អយំ ទុតិយានុបស្សនា. ឯវំ សម្មា ទ្វយតានុបស្សិនោ ខោ, ភិក្ខវេ, ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ ទ្វិន្នំ ផលានំ អញ្ញតរំ ផលំ បាដិកង្ខំ – ទិដ្ឋេវ ធម្មេ អញ្ញា, សតិ វា ឧបាទិសេសេ អនាគាមិតា’’តិ.

ឥទមវោច ភគវា. ឥទំ វត្វាន សុគតោ អថាបរំ ឯតទវោច សត្ថា –

៧២៩. ‘‘យេ ទុក្ខំ នប្បជានន្តិ, អថោ ទុក្ខស្ស សម្ភវំ;

យត្ថ ច សព្ពសោ ទុក្ខំ, អសេសំ ឧបរុជ្ឈតិ;

តញ្ច មគ្គំ ន ជានន្តិ, ទុក្ខូបសមគាមិនំ.

៧៣០. ‘‘ចេតោវិមុត្តិហីនា តេ, អថោ បញ្ញាវិមុត្តិយា;

អភព្ពា តេ អន្តកិរិយាយ, តេ វេ ជាតិជរូបគា.

៧៣១. ‘‘យេ ច ទុក្ខំ បជានន្តិ, អថោ ទុក្ខស្ស សម្ភវំ;

យត្ថ ច សព្ពសោ ទុក្ខំ, អសេសំ ឧបរុជ្ឈតិ;

តញ្ច មគ្គំ បជានន្តិ, ទុក្ខូបសមគាមិនំ.

៧៣២. ‘‘ចេតោវិមុត្តិសម្បន្នា, អថោ បញ្ញាវិមុត្តិយា;

ភព្ពា តេ អន្តកិរិយាយ, ន តេ ជាតិជរូបគា’’តិ.

(២) ‘‘‘សិយា អញ្ញេនបិ បរិយាយេន សម្មា ទ្វយតានុបស្សនា’តិ, ឥតិ ចេ, ភិក្ខវេ, បុច្ឆិតារោ អស្សុ; ‘សិយា’តិស្សុ វចនីយា. កថញ្ច សិយា? យំ កិញ្ចិ ទុក្ខំ សម្ភោតិ សព្ពំ ឧបធិបច្ចយាតិ, អយមេកានុបស្សនា. ឧបធីនំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៣៣. ‘‘ឧបធិនិទានា បភវន្តិ ទុក្ខា, យេ កេចិ លោកស្មិមនេករូបា;

យោ វេ អវិទ្វា ឧបធិំ ករោតិ, បុនប្បុនំ ទុក្ខមុបេតិ មន្ទោ;

តស្មា បជានំ ឧបធិំ ន កយិរា, ទុក្ខស្ស ជាតិប្បភវានុបស្សី’’តិ.

(៣) ‘‘‘សិយា អញ្ញេនបិ បរិយាយេន សម្មា ទ្វយតានុបស្សនា’តិ, ឥតិ ចេ, ភិក្ខវេ, បុច្ឆិតារោ អស្សុ; ‘សិយា’តិស្សុ វចនីយា. កថញ្ច សិយា? យំ កិញ្ចិ ទុក្ខំ សម្ភោតិ សព្ពំ អវិជ្ជាបច្ចយាតិ, អយមេកានុបស្សនា. អវិជ្ជាយ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៣៤. ‘‘ជាតិមរណសំសារំ, យេ វជន្តិ បុនប្បុនំ;

ឥត្ថភាវញ្ញថាភាវំ, អវិជ្ជាយេវ សា គតិ.

៧៣៥. ‘‘អវិជ្ជា ហាយំ មហាមោហោ, យេនិទំ សំសិតំ ចិរំ;

វិជ្ជាគតា ច យេ សត្តា, ន តេ គច្ឆន្តិ [នាគច្ឆន្តិ (សី. បី.)] បុនព្ភវ’’ន្តិ.

(៤) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ សង្ខារបច្ចយាតិ, អយមេកានុបស្សនា. សង្ខារានំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៣៦. ‘‘យំ កិញ្ចិ ទុក្ខំ សម្ភោតិ, សព្ពំ សង្ខារបច្ចយា;

សង្ខារានំ និរោធេន, នត្ថិ ទុក្ខស្ស សម្ភវោ.

៧៣៧. ‘‘ឯតមាទីនវំ ញត្វា, ទុក្ខំ សង្ខារបច្ចយា;

សព្ពសង្ខារសមថា, សញ្ញានំ ឧបរោធនា;

ឯវំ ទុក្ខក្ខយោ ហោតិ, ឯតំ ញត្វា យថាតថំ.

៧៣៨. ‘‘សម្មទ្ទសា វេទគុនោ, សម្មទញ្ញាយ បណ្ឌិតា;

អភិភុយ្យ មារសំយោគំ, ន គច្ឆន្តិ [នាគច្ឆន្តិ (សី. បី.)] បុនព្ភវ’’ន្តិ.

(៥) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ វិញ្ញាណបច្ចយាតិ, អយមេកានុបស្សនា. វិញ្ញាណស្ស ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៣៩. ‘‘យំ កិញ្ចិ ទុក្ខំ សម្ភោតិ, សព្ពំ វិញ្ញាណបច្ចយា;

វិញ្ញាណស្ស និរោធេន, នត្ថិ ទុក្ខស្ស សម្ភវោ.

៧៤០. ‘‘ឯតមាទីនវំ ញត្វា, ទុក្ខំ វិញ្ញាណបច្ចយា;

វិញ្ញាណូបសមា ភិក្ខុ, និច្ឆាតោ បរិនិព្ពុតោ’’តិ.

(៦) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ ផស្សបច្ចយាតិ, អយមេកានុបស្សនា. ផស្សស្ស ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៤១. ‘‘តេសំ ផស្សបរេតានំ, ភវសោតានុសារិនំ;

កុម្មគ្គបដិបន្នានំ, អារា សំយោជនក្ខយោ.

៧៤២. ‘‘យេ ច ផស្សំ បរិញ្ញាយ, អញ្ញាយុបសមេ [បញ្ញាយ ឧបសមេ (ស្យា.)] រតា;

តេ វេ ផស្សាភិសមយា, និច្ឆាតា បរិនិព្ពុតា’’តិ.

(៧) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ វេទនាបច្ចយាតិ, អយមេកានុបស្សនា. វេទនានំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៤៣. ‘‘សុខំ វា យទិ វា ទុក្ខំ, អទុក្ខមសុខំ សហ;

អជ្ឈត្តញ្ច ពហិទ្ធា ច, យំ កិញ្ចិ អត្ថិ វេទិតំ.

៧៤៤. ‘‘ឯតំ ទុក្ខន្តិ ញត្វាន, មោសធម្មំ បលោកិនំ [បលោកិតំ (សី.)];

ផុស្ស ផុស្ស វយំ បស្សំ, ឯវំ តត្ថ វិជានតិ [វិរជ្ជតិ (ក. សី.)];

វេទនានំ ខយា ភិក្ខុ, និច្ឆាតោ បរិនិព្ពុតោ’’តិ.

(៨) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ តណ្ហាបច្ចយាតិ, អយមេកានុបស្សនា. តណ្ហាយ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៤៥. ‘‘តណ្ហាទុតិយោ បុរិសោ, ទីឃមទ្ធាន សំសរំ;

ឥត្ថភាវញ្ញថាភាវំ, សំសារំ នាតិវត្តតិ.

៧៤៦. ‘‘ឯតមាទីនវំ ញត្វា, តណ្ហំ [តណ្ហា (ពហូសុ) ឥតិវុត្តកេ ១៥ បស្សិតព្ពំ] ទុក្ខស្ស សម្ភវំ;

វីតតណ្ហោ អនាទានោ, សតោ ភិក្ខុ បរិព្ពជេ’’តិ.

(៩) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ ឧបាទានបច្ចយាតិ, អយមេកានុបស្សនា. ឧបាទានានំ [ឧបាទានស្ស (ស្យា. ក.)] ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៤៧. ‘‘ឧបាទានបច្ចយា ភវោ, ភូតោ ទុក្ខំ និគច្ឆតិ;

ជាតស្ស មរណំ ហោតិ, ឯសោ ទុក្ខស្ស សម្ភវោ.

៧៤៨. ‘‘តស្មា ឧបាទានក្ខយា, សម្មទញ្ញាយ បណ្ឌិតា;

ជាតិក្ខយំ អភិញ្ញាយ, ន គច្ឆន្តិ បុនព្ភវ’’ន្តិ.

(១០) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ អារម្ភបច្ចយាតិ, អយមេកានុបស្សនា. អារម្ភានំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៤៩. ‘‘យំ កិញ្ចិ ទុក្ខំ សម្ភោតិ, សព្ពំ អារម្ភបច្ចយា;

អារម្ភានំ និរោធេន, នត្ថិ ទុក្ខស្ស សម្ភវោ.

៧៥០. ‘‘ឯតមាទីនវំ ញត្វា, ទុក្ខំ អារម្ភបច្ចយា;

សព្ពារម្ភំ បដិនិស្សជ្ជ, អនារម្ភេ វិមុត្តិនោ.

៧៥១. ‘‘ឧច្ឆិន្នភវតណ្ហស្ស, សន្តចិត្តស្ស ភិក្ខុនោ;

វិក្ខីណោ [វិតិណ្ណោ (សី.)] ជាតិសំសារោ, នត្ថិ តស្ស បុនព្ភវោ’’តិ.

(១១) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ អាហារបច្ចយាតិ, អយមេកានុបស្សនា. អាហារានំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៥២. ‘‘យំ កិញ្ចិ ទុក្ខំ សម្ភោតិ, សព្ពំ អាហារបច្ចយា;

អាហារានំ និរោធេន, នត្ថិ ទុក្ខស្ស សម្ភវោ.

៧៥៣. ‘‘ឯតមាទីនវំ ញត្វា, ទុក្ខំ អាហារបច្ចយា;

សព្ពាហារំ បរិញ្ញាយ, សព្ពាហារមនិស្សិតោ.

៧៥៤. ‘‘អារោគ្យំ សម្មទញ្ញាយ, អាសវានំ បរិក្ខយា;

សង្ខាយ សេវី ធម្មដ្ឋោ, សង្ខ្យំ [សង្ខំ (សី. បី.)] នោបេតិ វេទគូ’’តិ.

(១២) ‘‘សិយា អញ្ញេនបិ…បេ… កថញ្ច សិយា? យំ កិញ្ចិ ទុក្ខំ សម្ភោតិ សព្ពំ ឥញ្ជិតបច្ចយាតិ, អយមេកានុបស្សនា. ឥញ្ជិតានំ ត្វេវ អសេសវិរាគនិរោធា នត្ថិ ទុក្ខស្ស សម្ភវោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៥៥. ‘‘យំ កិញ្ចិ ទុក្ខំ សម្ភោតិ, សព្ពំ ឥញ្ជិតបច្ចយា;

ឥញ្ជិតានំ និរោធេន, នត្ថិ ទុក្ខស្ស សម្ភវោ.

៧៥៦. ‘‘ឯតមាទីនវំ ញត្វា, ទុក្ខំ ឥញ្ជិតបច្ចយា;

តស្មា ហិ ឯជំ វោស្សជ្ជ, សង្ខារេ ឧបរុន្ធិយ;

អនេជោ អនុបាទានោ, សតោ ភិក្ខុ បរិព្ពជេ’’តិ.

(១៣) ‘‘សិយា អញ្ញេនបិ…បេ… កថញ្ច សិយា? និស្សិតស្ស ចលិតំ ហោតីតិ, អយមេកានុបស្សនា. អនិស្សិតោ ន ចលតីតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៥៧. ‘‘អនិស្សិតោ ន ចលតិ, និស្សិតោ ច ឧបាទិយំ;

ឥត្ថភាវញ្ញថាភាវំ, សំសារំ នាតិវត្តតិ.

៧៥៨. ‘‘ឯតមាទីនវំ ញត្វា, និស្សយេសុ មហព្ភយំ;

អនិស្សិតោ អនុបាទានោ, សតោ ភិក្ខុ បរិព្ពជេ’’តិ.

(១៤) ‘‘សិយា អញ្ញេនបិ…បេ… កថញ្ច សិយា? រូបេហិ, ភិក្ខវេ, អរូបា [អារុប្បា (សី. បី.)] សន្តតរាតិ, អយមេកានុបស្សនា. អរូបេហិ និរោធោ សន្តតរោតិ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៥៩. ‘‘យេ ច រូបូបគា សត្តា, យេ ច អរូបដ្ឋាយិនោ [អារុប្បវាសិនោ (សី. បី.)];

និរោធំ អប្បជានន្តា, អាគន្តារោ បុនព្ភវំ.

៧៦០. ‘‘យេ ច រូបេ បរិញ្ញាយ, អរូបេសុ អសណ្ឋិតា [សុសណ្ឋិតា (សី. ស្យា. បី.)];

និរោធេ យេ វិមុច្ចន្តិ, តេ ជនា មច្ចុហាយិនោ’’តិ.

(១៥) ‘‘សិយា អញ្ញេនបិ…បេ… កថញ្ច សិយា? យំ, ភិក្ខវេ, សទេវកស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ឥទំ សច្ចន្តិ ឧបនិជ្ឈាយិតំ តទមរិយានំ ឯតំ មុសាតិ យថាភូតំ សម្មប្បញ្ញាយ សុទិដ្ឋំ, អយមេកានុបស្សនា. យំ, ភិក្ខវេ, សទេវកស្ស…បេ… សទេវមនុស្សាយ ឥទំ មុសាតិ ឧបនិជ្ឈាយិតំ, តទមរិយានំ ឯតំ សច្ចន្តិ យថាភូតំ សម្មប្បញ្ញាយ សុទិដ្ឋំ, អយំ ទុតិយានុបស្សនា. ឯវំ សម្មា…បេ… អថាបរំ ឯតទវោច សត្ថា –

៧៦១. ‘‘អនត្តនិ អត្តមានិំ [អត្តមានី (ស្យា.), អត្តមានំ (បី. ក.)], បស្ស លោកំ សទេវកំ;

និវិដ្ឋំ នាមរូបស្មិំ, ឥទំ សច្ចន្តិ មញ្ញតិ.

៧៦២. ‘‘យេន យេន ហិ មញ្ញន្តិ, តតោ តំ ហោតិ អញ្ញថា;

តញ្ហិ តស្ស មុសា ហោតិ, មោសធម្មញ្ហិ ឥត្តរំ.

៧៦៣. ‘‘អមោសធម្មំ និព្ពានំ, តទរិយា សច្ចតោ វិទូ;

តេ វេ សច្ចាភិសមយា, និច្ឆាតា បរិនិព្ពុតា’’តិ.

(១៦) ‘‘‘សិយា អញ្ញេនបិ បរិយាយេន សម្មា ទ្វយតានុបស្សនា’តិ, ឥតិ ចេ, ភិក្ខវេ, បុច្ឆិតារោ អស្សុ; ‘សិយា’តិស្សុ វចនីយា. កថញ្ច សិយា? យំ, ភិក្ខវេ, សទេវកស្ស លោកស្ស សមារកស្ស សព្រហ្មកស្ស សស្សមណព្រាហ្មណិយា បជាយ សទេវមនុស្សាយ ឥទំ សុខន្តិ ឧបនិជ្ឈាយិតំ, តទមរិយានំ ឯតំ ទុក្ខន្តិ យថាភូតំ សម្មប្បញ្ញាយ សុទិដ្ឋំ, អយមេកានុបស្សនា. យំ, ភិក្ខវេ, សទេវកស្ស…បេ… សទេវមនុស្សាយ ឥទំ ទុក្ខន្តិ ឧបនិជ្ឈាយិតំ តទមរិយានំ ឯតំ សុខន្តិ យថាភូតំ សម្មប្បញ្ញាយ សុទិដ្ឋំ, អយំ ទុតិយានុបស្សនា. ឯវំ សម្មា ទ្វយតានុបស្សិនោ ខោ, ភិក្ខវេ, ភិក្ខុនោ អប្បមត្តស្ស អាតាបិនោ បហិតត្តស្ស វិហរតោ ទ្វិន្នំ ផលានំ អញ្ញតរំ ផលំ បាដិកង្ខំ – ទិដ្ឋេវ ធម្មេ អញ្ញា, សតិ វា ឧបាទិសេសេ អនាគាមិតាតិ. ឥទមវោច ភគវា. ឥទំ វត្វាន សុគតោ អថាបរំ ឯតទវោច សត្ថា –

៧៦៤. ‘‘រូបា សទ្ទា រសា គន្ធា, ផស្សា ធម្មា ច កេវលា;

ឥដ្ឋា កន្តា មនាបា ច, យាវតត្ថីតិ វុច្ចតិ.

៧៦៥. ‘‘សទេវកស្ស លោកស្ស, ឯតេ វោ សុខសម្មតា;

យត្ថ ចេតេ និរុជ្ឈន្តិ, តំ នេសំ ទុក្ខសម្មតំ.

៧៦៦. ‘‘សុខន្តិ ទិដ្ឋមរិយេហិ, សក្កាយស្សុបរោធនំ;

បច្ចនីកមិទំ ហោតិ, សព្ពលោកេន បស្សតំ.

៧៦៧. ‘‘យំ បរេ សុខតោ អាហុ, តទរិយា អាហុ ទុក្ខតោ;

យំ បរេ ទុក្ខតោ អាហុ, តទរិយា សុខតោ វិទូ.

៧៦៨. ‘‘បស្ស ធម្មំ ទុរាជានំ, សម្បមូឡ្ហេត្ថវិទ្ទសុ [សម្បមូឡ្ហេត្ថ អវិទ្ទសុ (សី. បី.), សម្មូឡ្ហេត្ថ អវិទ្ទសុ (?)];

និវុតានំ តមោ ហោតិ, អន្ធការោ អបស្សតំ.

៧៦៩. ‘‘សតញ្ច វិវដំ ហោតិ, អាលោកោ បស្សតាមិវ;

សន្តិកេ ន វិជានន្តិ, មគ្គា ធម្មស្ស កោវិទា.

៧៧០. ‘‘ភវរាគបរេតេហិ, ភវសោតានុសារិភិ;

មារធេយ្យានុបន្នេហិ, នាយំ ធម្មោ សុសម្ពុធោ.

៧៧១. ‘‘កោ នុ អញ្ញត្រមរិយេហិ, បទំ សម្ពុទ្ធុមរហតិ;

យំ បទំ សម្មទញ្ញាយ, បរិនិព្ពន្តិ អនាសវា’’តិ.

ឥទមវោច ភគវា. អត្តមនា តេ ភិក្ខូ ភគវតោ ភាសិតំ អភិនន្ទុន្តិ. ឥមស្មិំ ច [ឥមស្មិំ ខោ (សី.)] បន វេយ្យាករណស្មិំ ភញ្ញមានេ សដ្ឋិមត្តានំ ភិក្ខូនំ អនុបាទាយ អាសវេហិ ចិត្តានិ វិមុច្ចិំសូតិ.

ទ្វយតានុបស្សនាសុត្តំ ទ្វាទសមំ និដ្ឋិតំ.

តស្សុទ្ទានំ –

សច្ចំ ឧបធិ អវិជ្ជា ច, សង្ខារេ វិញ្ញាណបញ្ចមំ;

ផស្សវេទនិយា តណ្ហា, ឧបាទានារម្ភអាហារា;

ឥញ្ជិតំ ចលិតំ រូបំ, សច្ចំ ទុក្ខេន សោឡសាតិ.

មហាវគ្គោ តតិយោ និដ្ឋិតោ.