៩. កិំសីលសុត្តំ

៣២៦. ‘‘កិំសីលោ កិំសមាចារោ, កានិ កម្មានិ ព្រូហយំ;

នរោ សម្មា និវិដ្ឋស្ស, ឧត្តមត្ថញ្ច បាបុណេ’’.

៣២៧. ‘‘វុឌ្ឍាបចាយី អនុសូយកោ សិយា, កាលញ្ញូ [កាលញ្ញុ (សី. ស្យា.)] ចស្ស គរូនំ [គរូនំ (សី.)] ទស្សនាយ;

ធម្មិំ កថំ ឯរយិតំ ខណញ្ញូ, សុណេយ្យ សក្កច្ច សុភាសិតានិ.

៣២៨. ‘‘កាលេន គច្ឆេ គរូនំ សកាសំ, ថម្ភំ និរំកត្វា [និរាកត្វា (?) និ + អា + ករ + ត្វា] និវាតវុត្តិ;

អត្ថំ ធម្មំ សំយមំ ព្រហ្មចរិយំ, អនុស្សរេ ចេវ សមាចរេ ច.

៣២៩. ‘‘ធម្មារាមោ ធម្មរតោ, ធម្មេ ឋិតោ ធម្មវិនិច្ឆយញ្ញូ;

នេវាចរេ ធម្មសន្ទោសវាទំ, តច្ឆេហិ នីយេថ សុភាសិតេហិ.

៣៣០. ‘‘ហស្សំ ជប្បំ បរិទេវំ បទោសំ, មាយាកតំ កុហនំ គិទ្ធិ មានំ;

សារម្ភំ កក្កសំ កសាវញ្ច មុច្ឆំ [សារម្ភ កក្កស្ស កសាវ មុច្ឆំ (ស្យា. បី.)], ហិត្វា ចរេ វីតមទោ ឋិតត្តោ.

៣៣១. ‘‘វិញ្ញាតសារានិ សុភាសិតានិ, សុតញ្ច វិញ្ញាតសមាធិសារំ;

ន តស្ស បញ្ញា ច សុតញ្ច វឌ្ឍតិ, យោ សាហសោ ហោតិ នរោ បមត្តោ.

៣៣២. ‘‘ធម្មេ ច យេ អរិយបវេទិតេ រតា,

អនុត្តរា តេ វចសា មនសា កម្មុនា ច;

តេ សន្តិសោរច្ចសមាធិសណ្ឋិតា,

សុតស្ស បញ្ញាយ ច សារមជ្ឈគូ’’តិ.

កិំសីលសុត្តំ នវមំ និដ្ឋិតំ.