១០. ឧដ្ឋានសុត្តំ

៣៣៣. ឧដ្ឋហថ និសីទថ, កោ អត្ថោ សុបិតេន វោ;

អាតុរានញ្ហិ កា និទ្ទា, សល្លវិទ្ធាន រុប្បតំ.

៣៣៤. ឧដ្ឋហថ និសីទថ, ទឡ្ហំ សិក្ខថ សន្តិយា;

មា វោ បមត្តេ វិញ្ញាយ, មច្ចុរាជា អមោហយិត្ថ វសានុគេ.

៣៣៥. យាយ ទេវា មនុស្សា ច, សិតា តិដ្ឋន្តិ អត្ថិកា;

តរថេតំ វិសត្តិកំ, ខណោ វោ [ខណោ វេ (បី. ក.)] មា ឧបច្ចគា;

ខណាតីតា ហិ សោចន្តិ, និរយម្ហិ សមប្បិតា.

៣៣៦. បមាទោ រជោ បមាទោ, បមាទានុបតិតោ រជោ;

អប្បមាទេន វិជ្ជាយ, អព្ពហេ [អព្ពូឡ្ហេ (ស្យា. បី.), អព្ពុហេ (ក. អដ្ឋ.)] សល្លមត្តនោតិ.

ឧដ្ឋានសុត្តំ ទសមំ និដ្ឋិតំ.