៨. នាវាសុត្តំ

៣១៨. យស្មា ហិ ធម្មំ បុរិសោ វិជញ្ញា, ឥន្ទំវ នំ ទេវតា បូជយេយ្យ;

សោ បូជិតោ តស្មិ បសន្នចិត្តោ, ពហុស្សុតោ បាតុករោតិ ធម្មំ.

៣១៩. តទដ្ឋិកត្វាន និសម្ម ធីរោ, ធម្មានុធម្មំ បដិបជ្ជមានោ;

វិញ្ញូ វិភាវី និបុណោ ច ហោតិ, យោ តាទិសំ ភជតិ អប្បមត្តោ.

៣២០. ខុទ្ទញ្ច ពាលំ ឧបសេវមានោ, អនាគតត្ថញ្ច ឧសូយកញ្ច;

ឥធេវ ធម្មំ អវិភាវយិត្វា, អវិតិណ្ណកង្ខោ មរណំ ឧបេតិ.

៣២១. យថា នរោ អាបគមោតរិត្វា, មហោទកំ សលិលំ សីឃសោតំ;

សោ វុយ្ហមានោ អនុសោតគាមី, កិំ សោ បរេ សក្ខតិ តារយេតុំ.

៣២២. តថេវ ធម្មំ អវិភាវយិត្វា, ពហុស្សុតានំ អនិសាមយត្ថំ;

សយំ អជានំ អវិតិណ្ណកង្ខោ, កិំ សោ បរេ សក្ខតិ និជ្ឈបេតុំ.

៣២៣. យថាបិ នាវំ ទឡ្ហមារុហិត្វា, ផិយេន [បិយេន (សី. ស្យា.)] រិត្តេន សមង្គិភូតោ;

សោ តារយេ តត្ថ ពហូបិ អញ្ញេ, តត្រូបយញ្ញូ កុសលោ មុតីមា [មតីមា (ស្យា. ក.)].

៣២៤. ឯវម្បិ យោ វេទគុ ភាវិតត្តោ, ពហុស្សុតោ ហោតិ អវេធធម្មោ;

សោ ខោ បរេ និជ្ឈបយេ បជានំ, សោតាវធានូបនិសូបបន្នេ.

៣២៥. តស្មា ហវេ សប្បុរិសំ ភជេថ, មេធាវិនញ្ចេវ ពហុស្សុតញ្ច;

អញ្ញាយ អត្ថំ បដិបជ្ជមានោ, វិញ្ញាតធម្មោ ស សុខំ [សោ សុខំ (សី.)] លភេថាតិ.

នាវាសុត្តំ អដ្ឋមំ និដ្ឋិតំ.