៧. ព្រាហ្មណធម្មិកសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ សម្ពហុលា កោសលកា ព្រាហ្មណមហាសាលា ជិណ្ណា វុឌ្ឍា មហល្លកា អទ្ធគតា វយោអនុប្បត្តា យេន ភគវា តេនុបសង្កមិំសុ; ឧបសង្កមិត្វា ភគវតា សទ្ធិំ សម្មោទិំសុ. សម្មោទនីយំ កថំ សារណីយំ វីតិសារេត្វា ឯកមន្តំ និសីទិំសុ. ឯកមន្តំ និសិន្នា ខោ តេ ព្រាហ្មណមហាសាលា ភគវន្តំ ឯតទវោចុំ – ‘‘សន្ទិស្សន្តិ នុ ខោ, ភោ គោតម, ឯតរហិ ព្រាហ្មណា បោរាណានំ ព្រាហ្មណានំ ព្រាហ្មណធម្មេ’’តិ? ‘‘ន ខោ, ព្រាហ្មណា, សន្ទិស្សន្តិ ឯតរហិ ព្រាហ្មណា បោរាណានំ ព្រាហ្មណានំ ព្រាហ្មណធម្មេ’’តិ. ‘‘សាធុ នោ ភវំ គោតមោ បោរាណានំ ព្រាហ្មណានំ ព្រាហ្មណធម្មំ ភាសតុ, សចេ ភោតោ គោតមស្ស អគរូ’’តិ. ‘‘តេន ហិ, ព្រាហ្មណា, សុណាថ, សាធុកំ មនសិ ករោថ, ភាសិស្សាមី’’តិ. ‘‘ឯវំ, ភោ’’តិ ខោ តេ ព្រាហ្មណមហាសាលា ភគវតោ បច្ចស្សោសុំ. ភគវា ឯតទវោច –

២៨៦. ‘‘ឥសយោ បុព្ពកា អាសុំ, សញ្ញតត្តា តបស្សិនោ;

បញ្ច កាមគុណេ ហិត្វា, អត្តទត្ថមចារិសុំ.

២៨៧. ‘‘ន បសូ ព្រាហ្មណានាសុំ, ន ហិរញ្ញំ ន ធានិយំ;

សជ្ឈាយធនធញ្ញាសុំ, ព្រហ្មំ និធិមបាលយុំ.

២៨៨. ‘‘យំ នេសំ បកតំ អាសិ, ទ្វារភត្តំ ឧបដ្ឋិតំ;

សទ្ធាបកតមេសានំ, ទាតវេ តទមញ្ញិសុំ.

២៨៩. ‘‘នានារត្តេហិ វត្ថេហិ, សយនេហាវសថេហិ ច;

ផីតា ជនបទា រដ្ឋា, តេ នមស្សិំសុ ព្រាហ្មណេ.

២៩០. ‘‘អវជ្ឈា ព្រាហ្មណា អាសុំ, អជេយ្យា ធម្មរក្ខិតា;

ន នេ កោចិ និវារេសិ, កុលទ្វារេសុ សព្ពសោ.

២៩១. ‘‘អដ្ឋចត្តាលីសំ វស្សានិ, (កោមារ) ព្រហ្មចរិយំ ចរិំសុ តេ;

វិជ្ជាចរណបរិយេដ្ឋិំ, អចរុំ ព្រាហ្មណា បុរេ.

២៩២. ‘‘ន ព្រាហ្មណា អញ្ញមគមុំ, នបិ ភរិយំ កិណិំសុ តេ;

សម្បិយេនេវ សំវាសំ, សង្គន្ត្វា សមរោចយុំ.

២៩៣. ‘‘អញ្ញត្រ តម្ហា សមយា, ឧតុវេរមណិំ បតិ;

អន្តរា មេថុនំ ធម្មំ, នាស្សុ គច្ឆន្តិ ព្រាហ្មណា.

២៩៤. ‘‘ព្រហ្មចរិយញ្ច សីលញ្ច, អជ្ជវំ មទ្ទវំ តបំ;

សោរច្ចំ អវិហិំសញ្ច, ខន្តិញ្ចាបិ អវណ្ណយុំ.

២៩៥. ‘‘យោ នេសំ បរមោ អាសិ, ព្រហ្មា ទឡ្ហបរក្កមោ;

ស វាបិ មេថុនំ ធម្មំ, សុបិនន្តេបិ នាគមា.

២៩៦. ‘‘តស្ស វត្តមនុសិក្ខន្តា, ឥធេកេ វិញ្ញុជាតិកា;

ព្រហ្មចរិយញ្ច សីលញ្ច, ខន្តិញ្ចាបិ អវណ្ណយុំ.

២៩៧. ‘‘តណ្ឌុលំ សយនំ វត្ថំ, សប្បិតេលញ្ច យាចិយ;

ធម្មេន សមោធានេត្វា, តតោ យញ្ញមកប្បយុំ.

២៩៨. ‘‘ឧបដ្ឋិតស្មិំ យញ្ញស្មិំ, នាស្សុ គាវោ ហនិំសុ តេ;

យថា មាតា បិតា ភាតា, អញ្ញេ វាបិ ច ញាតកា;

គាវោ នោ បរមា មិត្តា, យាសុ ជាយន្តិ ឱសធា.

២៩៩. ‘‘អន្នទា ពលទា ចេតា, វណ្ណទា សុខទា តថា [សុខទា ច តា (ក.)];

ឯតមត្ថវសំ ញត្វា, នាស្សុ គាវោ ហនិំសុ តេ.

៣០០. ‘‘សុខុមាលា មហាកាយា, វណ្ណវន្តោ យសស្សិនោ;

ព្រាហ្មណា សេហិ ធម្មេហិ, កិច្ចាកិច្ចេសុ ឧស្សុកា;

យាវ លោកេ អវត្តិំសុ, សុខមេធិត្ថយំ បជា.

៣០១. ‘‘តេសំ អាសិ វិបល្លាសោ, ទិស្វាន អណុតោ អណុំ;

រាជិនោ ច វិយាការំ, នារិយោ សមលង្កតា.

៣០២. ‘‘រថេ ចាជញ្ញសំយុត្តេ, សុកតេ ចិត្តសិព្ពនេ;

និវេសនេ និវេសេ ច, វិភត្តេ ភាគសោ មិតេ.

៣០៣. ‘‘គោមណ្ឌលបរិព្យូឡ្ហំ, នារីវរគណាយុតំ;

ឧឡារំ មានុសំ ភោគំ, អភិជ្ឈាយិំសុ ព្រាហ្មណា.

៣០៤. ‘‘តេ តត្ថ មន្តេ គន្ថេត្វា, ឱក្កាកំ តទុបាគមុំ;

បហូតធនធញ្ញោសិ, យជស្សុ ពហុ តេ វិត្តំ;

យជស្សុ ពហុ តេ ធនំ.

៣០៥. ‘‘តតោ ច រាជា សញ្ញត្តោ, ព្រាហ្មណេហិ រថេសភោ;

អស្សមេធំ បុរិសមេធំ, សម្មាបាសំ វាជបេយ្យំ និរគ្គឡំ;

ឯតេ យាគេ យជិត្វាន, ព្រាហ្មណានមទា ធនំ.

៣០៦. ‘‘គាវោ សយនញ្ច វត្ថញ្ច, នារិយោ សមលង្កតា;

រថេ ចាជញ្ញសំយុត្តេ, សុកតេ ចិត្តសិព្ពនេ.

៣០៧. ‘‘និវេសនានិ រម្មានិ, សុវិភត្តានិ ភាគសោ;

នានាធញ្ញស្ស បូរេត្វា, ព្រាហ្មណានមទា ធនំ.

៣០៨. ‘‘តេ ច តត្ថ ធនំ លទ្ធា, សន្និធិំ សមរោចយុំ;

តេសំ ឥច្ឆាវតិណ្ណានំ, ភិយ្យោ តណ្ហា បវឌ្ឍថ;

តេ តត្ថ មន្តេ គន្ថេត្វា, ឱក្កាកំ បុនមុបាគមុំ.

៣០៩. ‘‘យថា អាបោ ច បថវី ច, ហិរញ្ញំ ធនធានិយំ;

ឯវំ គាវោ មនុស្សានំ, បរិក្ខារោ សោ ហិ បាណិនំ;

យជស្សុ ពហុ តេ វិត្តំ, យជស្សុ ពហុ តេ ធនំ.

៣១០. ‘‘តតោ ច រាជា សញ្ញត្តោ, ព្រាហ្មណេហិ រថេសភោ;

នេកា សតសហស្សិយោ, គាវោ យញ្ញេ អឃាតយិ.

៣១១. ‘‘ន បាទា ន វិសាណេន, នាស្សុ ហិំសន្តិ កេនចិ;

គាវោ ឯឡកសមានា, សោរតា កុម្ភទូហនា;

តា វិសាណេ គហេត្វាន, រាជា សត្ថេន ឃាតយិ.

៣១២. ‘‘តតោ ទេវា បិតរោ ច [តតោ ច ទេវា បិតរោ (សី. ស្យា.)], ឥន្ទោ អសុររក្ខសា;

អធម្មោ ឥតិ បក្កន្ទុំ, យំ សត្ថំ និបតី គវេ.

៣១៣. ‘‘តយោ រោគា បុរេ អាសុំ, ឥច្ឆា អនសនំ ជរា;

បសូនញ្ច សមារម្ភា, អដ្ឋានវុតិមាគមុំ.

៣១៤. ‘‘ឯសោ អធម្មោ ទណ្ឌានំ, ឱក្កន្តោ បុរាណោ អហុ;

អទូសិកាយោ ហញ្ញន្តិ, ធម្មា ធំសន្តិ [ធំសេន្តិ (សី. បី.)] យាជកា.

៣១៥. ‘‘ឯវមេសោ អណុធម្មោ, បោរាណោ វិញ្ញុគរហិតោ;

យត្ថ ឯទិសកំ បស្សតិ, យាជកំ គរហតី [គរហី (ក.)] ជនោ.

៣១៦. ‘‘ឯវំ ធម្មេ វិយាបន្នេ, វិភិន្នា សុទ្ទវេស្សិកា;

បុថូ វិភិន្នា ខត្តិយា, បតិំ ភរិយាវមញ្ញថ.

៣១៧. ‘‘ខត្តិយា ព្រហ្មពន្ធូ ច, យេ ចញ្ញេ គោត្តរក្ខិតា;

ជាតិវាទំ និរំកត្វា [និរាកត្វា (?) យថា អនិរាកតជ្ឈានោតិ], កាមានំ វសមន្វគុ’’ន្តិ.

ឯវំ វុត្តេ, តេ ព្រាហ្មណមហាសាលា ភគវន្តំ ឯតទវោចុំ – ‘‘អភិក្កន្តំ, ភោ គោតម…បេ. … ឧបាសកេ នោ ភវំ គោតមោ ធារេតុ អជ្ជតគ្គេ បាណុបេតេ សរណំ គតេ’’តិ.

ព្រាហ្មណធម្មិកសុត្តំ សត្តមំ និដ្ឋិតំ.