៦. ធម្មចរិយសុត្តំ

២៧៦. ធម្មចរិយំ ព្រហ្មចរិយំ, ឯតទាហុ វសុត្តមំ;

បព្ពជិតោបិ ចេ ហោតិ, អគារា អនគារិយំ.

២៧៧. សោ ចេ មុខរជាតិកោ, វិហេសាភិរតោ មគោ;

ជីវិតំ តស្ស បាបិយោ, រជំ វឌ្ឍេតិ អត្តនោ.

២៧៨. កលហាភិរតោ ភិក្ខុ, មោហធម្មេន អាវុតោ;

អក្ខាតម្បិ ន ជានាតិ, ធម្មំ ពុទ្ធេន ទេសិតំ.

២៧៩. វិហេសំ ភាវិតត្តានំ, អវិជ្ជាយ បុរក្ខតោ;

សំកិលេសំ ន ជានាតិ, មគ្គំ និរយគាមិនំ.

២៨០. វិនិបាតំ សមាបន្នោ, គព្ភា គព្ភំ តមា តមំ;

ស វេ តាទិសកោ ភិក្ខុ, បេច្ច ទុក្ខំ និគច្ឆតិ.

២៨១. គូថកូបោ យថា អស្ស, សម្បុណ្ណោ គណវស្សិកោ;

យោ ច ឯវរូបោ អស្ស, ទុព្ពិសោធោ ហិ សាង្គណោ.

២៨២. យំ ឯវរូបំ ជានាថ, ភិក្ខវោ គេហនិស្សិតំ;

បាបិច្ឆំ បាបសង្កប្បំ, បាបអាចារគោចរំ.

២៨៣. សព្ពេ សមគ្គា ហុត្វាន, អភិនិព្ពជ្ជិយាថ [អភិនិព្ពជ្ជយាថ (សី. បី. អ. និ. ៨.១០)] នំ;

ការណ្ឌវំ [ការណ្ឌំ វ (ស្យា. ក.) អ. និ. ៨.១០] និទ្ធមថ, កសម្ពុំ អបកស្សថ [អវកស្សថ (សី. ស្យា. ក.)].

២៨៤. តតោ បលាបេ [បលាសេ (ក.)] វាហេថ, អស្សមណេ សមណមានិនេ;

និទ្ធមិត្វាន បាបិច្ឆេ, បាបអាចារគោចរេ.

២៨៥. សុទ្ធា សុទ្ធេហិ សំវាសំ, កប្បយវ្ហោ បតិស្សតា;

តតោ សមគ្គា និបកា, ទុក្ខស្សន្តំ ករិស្សថាតិ.

ធម្មចរិយសុត្តំ [កបិលសុត្តំ (អដ្ឋ.)] ឆដ្ឋំ និដ្ឋិតំ.