៥. សូចិលោមសុត្តំ

ឯវំ មេ សុតំ – ឯកំ សមយំ ភគវា គយាយំ វិហរតិ ដង្កិតមញ្ចេ សូចិលោមស្ស យក្ខស្ស ភវនេ. តេន ខោ បន សមយេន ខរោ ច យក្ខោ សូចិលោមោ ច យក្ខោ ភគវតោ អវិទូរេ អតិក្កមន្តិ. អថ ខោ ខរោ យក្ខោ សូចិលោមំ យក្ខំ ឯតទវោច – ‘‘ឯសោ សមណោ’’តិ. ‘‘នេសោ សមណោ, សមណកោ ឯសោ. យាវាហំ ជានាមិ [យាវ ជានាមិ (សី. បី.)] យទិ វា សោ សមណោ [យទិ វា សមណោ (ស្យា.)], យទិ វា សោ សមណកោ’’តិ [យទិ វា សមណកោតិ (សី. ស្យា. បី.)].

អថ ខោ សូចិលោមោ យក្ខោ យេន ភគវា តេនុបសង្កមិ; ឧបសង្កមិត្វា ភគវតោ កាយំ ឧបនាមេសិ. អថ ខោ ភគវា កាយំ អបនាមេសិ. អថ ខោ សូចិលោមោ យក្ខោ ភគវន្តំ ឯតទវោច – ‘‘ភាយសិ មំ, សមណា’’តិ? ‘‘ន ខ្វាហំ តំ, អាវុសោ, ភាយាមិ; អបិ ច តេ សប្ផស្សោ បាបកោ’’តិ.

‘‘បញ្ហំ តំ, សមណ, បុច្ឆិស្សាមិ. សចេ មេ ន ព្យាករិស្សសិ, ចិត្តំ វា តេ ខិបិស្សាមិ, ហទយំ វា តេ ផាលេស្សាមិ, បាទេសុ វា គហេត្វា បារគង្គាយ ខិបិស្សាមី’’តិ.

‘‘ន ខ្វាហំ តំ, អាវុសោ, បស្សាមិ សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ យោ មេ ចិត្តំ វា ខិបេយ្យ ហទយំ វា ផាលេយ្យ បាទេសុ វា គហេត្វា បារគង្គាយ ខិបេយ្យ. អបិ ច ត្វំ, អាវុសោ, បុច្ឆ យទាកង្ខសី’’តិ. អថ ខោ សូចិលោមោ យក្ខោ ភគវន្តំ គាថាយ អជ្ឈភាសិ –

២៧៣. ‘‘រាគោ ច ទោសោ ច កុតោនិទានា, អរតី រតី លោមហំសោ កុតោជា;

កុតោ សមុដ្ឋាយ មនោវិតក្កា, កុមារកា ធង្កមិវោស្សជន្តិ’’.

២៧៤. ‘‘រាគោ ច ទោសោ ច ឥតោនិទានា, អរតី រតី លោមហំសោ ឥតោជា;

ឥតោ សមុដ្ឋាយ មនោវិតក្កា, កុមារកា ធង្កមិវោស្សជន្តិ.

២៧៤. ‘‘ស្នេហជា អត្តសម្ភូតា, និគ្រោធស្សេវ ខន្ធជា;

បុថូ វិសត្តា កាមេសុ, មាលុវាវ វិតតាវនេ.

២៧៥. ‘‘យេ នំ បជានន្តិ យតោនិទានំ, តេ នំ វិនោទេន្តិ សុណោហិ យក្ខ;

តេ ទុត្តរំ ឱឃមិមំ តរន្តិ, អតិណ្ណបុព្ពំ អបុនព្ភវាយា’’តិ.

សូចិលោមសុត្តំ បញ្ចមំ និដ្ឋិតំ.