៤. មង្គលសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ អញ្ញតរា ទេវតា អភិក្កន្តាយ រត្តិយា អភិក្កន្តវណ្ណា កេវលកប្បំ ជេតវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតា ខោ សា ទេវតា ភគវន្តំ គាថាយ អជ្ឈភាសិ –

២៦១. ‘‘ពហូ ទេវា មនុស្សា ច, មង្គលានិ អចិន្តយុំ;

អាកង្ខមានា សោត្ថានំ, ព្រូហិ មង្គលមុត្តមំ’’.

២៦២. ‘‘អសេវនា ច ពាលានំ, បណ្ឌិតានញ្ច សេវនា;

បូជា ច បូជនេយ្យានំ [បូជនីយានំ (សី. ស្យា. កំ. បី.)], ឯតំ មង្គលមុត្តមំ.

២៦៣. ‘‘បតិរូបទេសវាសោ ច, បុព្ពេ ច កតបុញ្ញតា;

អត្តសម្មាបណិធិ [អត្តសម្មាបណីធី (កត្ថចិ)] ច, ឯតំ មង្គលមុត្តមំ.

២៦៤. ‘‘ពាហុសច្ចញ្ច សិប្បញ្ច, វិនយោ ច សុសិក្ខិតោ;

សុភាសិតា ច យា វាចា, ឯតំ មង្គលមុត្តមំ.

២៦៥. ‘‘មាតាបិតុ ឧបដ្ឋានំ, បុត្តទារស្ស សង្គហោ;

អនាកុលា ច កម្មន្តា, ឯតំ មង្គលមុត្តមំ.

២៦៦. ‘‘ទានញ្ច ធម្មចរិយា ច, ញាតកានញ្ច សង្គហោ;

អនវជ្ជានិ កម្មានិ, ឯតំ មង្គលមុត្តមំ.

២៦៧. ‘‘អារតី វិរតី បាបា, មជ្ជបានា ច សំយមោ;

អប្បមាទោ ច ធម្មេសុ, ឯតំ មង្គលមុត្តមំ.

២៦៨. ‘‘គារវោ ច និវាតោ ច, សន្តុដ្ឋិ ច កតញ្ញុតា;

កាលេន ធម្មស្សវនំ [ធម្មសវណំ (កត្ថចិ), ធម្មសវនំ (សី. ក.)], ឯតំ មង្គលមុត្តមំ.

២៦៩. ‘‘ខន្តី ច សោវចស្សតា, សមណានញ្ច ទស្សនំ;

កាលេន ធម្មសាកច្ឆា, ឯតំ មង្គលមុត្តមំ.

២៧០. ‘‘តបោ ច ព្រហ្មចរិយញ្ច, អរិយសច្ចាន ទស្សនំ;

និព្ពានសច្ឆិកិរិយា ច, ឯតំ មង្គលមុត្តមំ.

២៧១. ‘‘ផុដ្ឋស្ស លោកធម្មេហិ, ចិត្តំ យស្ស ន កម្បតិ;

អសោកំ វិរជំ ខេមំ, ឯតំ មង្គលមុត្តមំ.

២៧២. ‘‘ឯតាទិសានិ កត្វាន, សព្ពត្ថមបរាជិតា;

សព្ពត្ថ សោត្ថិំ គច្ឆន្តិ, តំ តេសំ មង្គលមុត្តម’’ន្តិ.

មង្គលសុត្តំ ចតុត្ថំ និដ្ឋិតំ.