៣. ហិរិសុត្តំ

២៥៦. ហិរិំ តរន្តំ វិជិគុច្ឆមានំ, តវាហមស្មិ [សខាហមស្មិ (សី. ស្យា. កំ. បី.)] ឥតិ ភាសមានំ;

សយ្ហានិ កម្មានិ អនាទិយន្តំ, នេសោ មមន្តិ ឥតិ នំ វិជញ្ញា.

២៥៧. អនន្វយំ [អត្ថន្វយំ (ក.)] បិយំ វាចំ, យោ មិត្តេសុ បកុព្ពតិ;

អករោន្តំ ភាសមានំ, បរិជានន្តិ បណ្ឌិតា.

២៥៨. ន សោ មិត្តោ យោ សទា អប្បមត្តោ, ភេទាសង្កី រន្ធមេវានុបស្សី;

យស្មិញ្ច សេតិ ឧរសីវ បុត្តោ, ស វេ មិត្តោ យោ បរេហិ អភេជ្ជោ.

២៥៩. បាមុជ្ជករណំ ឋានំ, បសំសាវហនំ សុខំ;

ផលានិសំសោ ភាវេតិ, វហន្តោ បោរិសំ ធុរំ.

២៦០. បវិវេករសំ បិត្វា, រសំ ឧបសមស្ស ច;

និទ្ទរោ ហោតិ និប្បាបោ, ធម្មបីតិរសំ បិវន្តិ.

ហិរិសុត្តំ តតិយំ និដ្ឋិតំ.