២. អាមគន្ធសុត្តំ

២៤២. ‘‘សាមាកចិង្គូលកចីនកានិ ច, បត្តប្ផលំ មូលផលំ គវិប្ផលំ;

ធម្មេន លទ្ធំ សតមស្នមានា [សតមសមានា (សី. បី.), សតមស្សមានា (ស្យា. កំ.)], ន កាមកាមា អលិកំ ភណន្តិ.

២៤៣. ‘‘យទស្នមានោ សុកតំ សុនិដ្ឋិតំ, បរេហិ ទិន្នំ បយតំ បណីតំ;

សាលីនមន្នំ បរិភុញ្ជមានោ, សោ ភុញ្ជសី កស្សប អាមគន្ធំ.

២៤៤. ‘‘ន អាមគន្ធោ មម កប្បតីតិ, ឥច្ចេវ ត្វំ ភាសសិ ព្រហ្មពន្ធុ;

សាលីនមន្នំ បរិភុញ្ជមានោ, សកុន្តមំសេហិ សុសង្ខតេហិ;

បុច្ឆាមិ តំ កស្សប ឯតមត្ថំ, កថំ បការោ តវ អាមគន្ធោ’’.

២៤៥. ‘‘បាណាតិបាតោ វធឆេទពន្ធនំ, ថេយ្យំ មុសាវាទោ និកតិវញ្ចនានិ ច;

អជ្ឈេនកុត្តំ [អជ្ឈេន កុជ្ជំ (សី. បី.)] បរទារសេវនា, ឯសាមគន្ធោ ន ហិ មំសភោជនំ.

២៤៦. ‘‘យេ ឥធ កាមេសុ អសញ្ញតា ជនា, រសេសុ គិទ្ធា អសុចិភាវមស្សិតា [អសុចីកមិស្សិតា (សី. ស្យា. កំ. បី.)];

នត្ថិកទិដ្ឋី វិសមា ទុរន្នយា, ឯសាមគន្ធោ ន ហិ មំសភោជនំ.

២៤៧. ‘‘យេ លូខសា ទារុណា បិដ្ឋិមំសិកា [យេ លូខរសា ទារុណា បរបិដ្ឋិមំសិកា (ក.)], មិត្តទ្ទុនោ និក្ករុណាតិមានិនោ;

អទានសីលា ន ច ទេន្តិ កស្សចិ, ឯសាមគន្ធោ ន ហិ មំសភោជនំ.

២៤៨. ‘‘កោធោ មទោ ថម្ភោ បច្ចុបដ្ឋាបនា [បច្ចុដ្ឋាបនា ច (សី. ស្យា.), បច្ចុដ្ឋាបនា (បី.)], មាយា ឧសូយា ភស្សសមុស្សយោ ច;

មានាតិមានោ ច អសព្ភិ សន្ថវោ, ឯសាមគន្ធោ ន ហិ មំសភោជនំ.

២៤៩. ‘‘យេ បាបសីលា ឥណឃាតសូចកា, វោហារកូដា ឥធ បាដិរូបិកា [បាតិរូបិកា (?)];

នរាធមា យេធ ករោន្តិ កិព្ពិសំ, ឯសាមគន្ធោ ន ហិ មំសភោជនំ.

២៥០. ‘‘យេ ឥធ បាណេសុ អសញ្ញតា ជនា, បរេសមាទាយ វិហេសមុយ្យុតា;

ទុស្សីលលុទ្ទា ផរុសា អនាទរា, ឯសាមគន្ធោ ន ហិ មំសភោជនំ.

២៥១. ‘‘ឯតេសុ គិទ្ធា វិរុទ្ធាតិបាតិនោ, និច្ចុយ្យុតា បេច្ច តមំ វជន្តិ យេ;

បតន្តិ សត្តា និរយំ អវំសិរា, ឯសាមគន្ធោ ន ហិ មំសភោជនំ.

២៥២. ‘‘ន មច្ឆមំសានមនាសកត្តំ [ន មច្ឆមំសំ ន អនាសកត្តំ (សី. អដ្ឋ មូលបាឋោ), ន មំច្ឆមំសានានាសកត្តំ (ស្យា. ក.)], ន នគ្គិយំ ន មុណ្ឌិយំ ជដាជល្លំ;

ខរាជិនានិ នាគ្គិហុត្តស្សុបសេវនា, យេ វាបិ លោកេ អមរា ពហូ តបា;

មន្តាហុតី យញ្ញមុតូបសេវនា, សោធេន្តិ មច្ចំ អវិតិណ្ណកង្ខំ.

២៥៣. ‘‘យោ តេសុ [សោតេសុ (សី. បី.)] គុត្តោ វិទិតិន្ទ្រិយោ ចរេ, ធម្មេ ឋិតោ អជ្ជវមទ្ទវេ រតោ;

សង្គាតិគោ សព្ពទុក្ខប្បហីនោ, ន លិប្បតិ [ន លិម្បតិ (ស្យា. កំ ក.)] ទិដ្ឋសុតេសុ ធីរោ’’.

២៥៤. ឥច្ចេតមត្ថំ ភគវា បុនប្បុនំ, អក្ខាសិ នំ [តំ (សី. បី.)] វេទយិ មន្តបារគូ;

ចិត្រាហិ គាថាហិ មុនី បកាសយិ, និរាមគន្ធោ អសិតោ ទុរន្នយោ.

២៥៥. សុត្វាន ពុទ្ធស្ស សុភាសិតំ បទំ, និរាមគន្ធំ សព្ពទុក្ខប្បនូទនំ;

នីចមនោ វន្ទិ តថាគតស្ស, តត្ថេវ បព្ពជ្ជមរោចយិត្ថាតិ.

អាមគន្ធសុត្តំ ទុតិយំ និដ្ឋិតំ.