១៤. ធម្មិកសុត្តំ

ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ ធម្មិកោ ឧបាសកោ បញ្ចហិ ឧបាសកសតេហិ សទ្ធិំ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ ធម្មិកោ ឧបាសកោ ភគវន្តំ គាថាហិ អជ្ឈភាសិ –

៣៧៨. ‘‘បុច្ឆាមិ តំ គោតម ភូរិបញ្ញ, កថំករោ សាវកោ សាធុ ហោតិ;

យោ វា អគារា អនគារមេតិ, អគារិនោ វា បនុបាសកាសេ.

៣៧៩. ‘‘តុវញ្ហិ លោកស្ស សទេវកស្ស, គតិំ បជានាសិ បរាយណញ្ច;

ន ចត្ថិ តុល្យោ និបុណត្ថទស្សី, តុវញ្ហិ ពុទ្ធំ បវរំ វទន្តិ.

៣៨០. ‘‘សព្ពំ តុវំ ញាណមវេច្ច ធម្មំ, បកាសេសិ សត្តេ អនុកម្បមានោ;

វិវដ្ដច្ឆទោសិ សមន្តចក្ខុ, វិរោចសិ វិមលោ សព្ពលោកេ.

៣៨១. ‘‘អាគញ្ឆិ តេ សន្តិកេ នាគរាជា, ឯរាវណោ នាម ជិនោតិ សុត្វា;

សោបិ តយា មន្តយិត្វាជ្ឈគមា, សាធូតិ សុត្វាន បតីតរូបោ.

៣៨២. ‘‘រាជាបិ តំ វេស្សវណោ កុវេរោ, ឧបេតិ ធម្មំ បរិបុច្ឆមានោ;

តស្សាបិ ត្វំ បុច្ឆិតោ ព្រូសិ ធីរ, សោ ចាបិ សុត្វាន បតីតរូបោ.

៣៨៣. ‘‘យេ កេចិមេ តិត្ថិយា វាទសីលា, អាជីវកា វា យទិ វា និគណ្ឋា;

បញ្ញាយ តំ នាតិតរន្តិ សព្ពេ, ឋិតោ វជន្តំ វិយ សីឃគាមិំ.

៣៨៤. ‘‘យេ កេចិមេ ព្រាហ្មណា វាទសីលា, វុទ្ធា ចាបិ ព្រាហ្មណា សន្តិ កេចិ;

សព្ពេ តយិ អត្ថពទ្ធា ភវន្តិ, យេ ចាបិ អញ្ញេ វាទិនោ មញ្ញមានា.

៣៨៥. ‘‘អយញ្ហិ ធម្មោ និបុណោ សុខោ ច, យោយំ តយា ភគវា សុប្បវុត្តោ;

តមេវ សព្ពេបិ [សព្ពេ មយំ (ស្យា.)] សុស្សូសមានា, តំ នោ វទ បុច្ឆិតោ ពុទ្ធសេដ្ឋ.

៣៨៦. ‘‘សព្ពេបិ មេ ភិក្ខវោ សន្និសិន្នា, ឧបាសកា ចាបិ តថេវ សោតុំ;

សុណន្តុ ធម្មំ វិមលេនានុពុទ្ធំ, សុភាសិតំ វាសវស្សេវ ទេវា’’.

៣៨៧. ‘‘សុណាថ មេ ភិក្ខវោ សាវយាមិ វោ, ធម្មំ ធុតំ តញ្ច ចរាថ សព្ពេ;

ឥរិយាបថំ បព្ពជិតានុលោមិកំ, សេវេថ នំ អត្ថទសោ មុតីមា.

៣៨៨. ‘‘នោ វេ វិកាលេ វិចរេយ្យ ភិក្ខុ, គាមេ ច បិណ្ឌាយ ចរេយ្យ កាលេ;

អកាលចារិញ្ហិ សជន្តិ សង្គា, តស្មា វិកាលេ ន ចរន្តិ ពុទ្ធា.

៣៨៩. ‘‘រូបា ច សទ្ទា ច រសា ច គន្ធា, ផស្សា ច យេ សម្មទយន្តិ សត្តេ;

ឯតេសុ ធម្មេសុ វិនេយ្យ ឆន្ទំ, កាលេន សោ បវិសេ បាតរាសំ.

៣៩០. ‘‘បិណ្ឌញ្ច ភិក្ខុ សមយេន លទ្ធា, ឯកោ បដិក្កម្ម រហោ និសីទេ;

អជ្ឈត្តចិន្តី ន មនោ ពហិទ្ធា, និច្ឆារយេ សង្គហិតត្តភាវោ.

៣៩១. ‘‘សចេបិ សោ សល្លបេ សាវកេន, អញ្ញេន វា កេនចិ ភិក្ខុនា វា;

ធម្មំ បណីតំ តមុទាហរេយ្យ, ន បេសុណំ នោបិ បរូបវាទំ.

៣៩២. ‘‘វាទញ្ហិ ឯកេ បដិសេនិយន្តិ, ន តេ បសំសាម បរិត្តបញ្ញេ;

តតោ តតោ នេ បសជន្តិ សង្គា, ចិត្តញ្ហិ តេ តត្ថ គមេន្តិ ទូរេ.

៣៩៣. ‘‘បិណ្ឌំ វិហារំ សយនាសនញ្ច, អាបញ្ច សង្ឃាដិរជូបវាហនំ;

សុត្វាន ធម្មំ សុគតេន ទេសិតំ, សង្ខាយ សេវេ វរបញ្ញសាវកោ.

៣៩៤. ‘‘តស្មា ហិ បិណ្ឌេ សយនាសនេ ច, អាបេ ច សង្ឃាដិរជូបវាហនេ;

ឯតេសុ ធម្មេសុ អនូបលិត្តោ, ភិក្ខុ យថា បោក្ខរេ វារិពិន្ទុ.

៣៩៥. ‘‘គហដ្ឋវត្តំ បន វោ វទាមិ, យថាករោ សាវកោ សាធុ ហោតិ;

ន ហេស [ន ហេសោ (សី.)] លព្ភា សបរិគ្គហេន, ផស្សេតុំ យោ កេវលោ ភិក្ខុធម្មោ.

៣៩៦. ‘‘បាណំ ន ហនេ [ន ហានេ (សី.)] ន ច ឃាតយេយ្យ, ន ចានុជញ្ញា ហនតំ បរេសំ;

សព្ពេសុ ភូតេសុ និធាយ ទណ្ឌំ, យេ ថាវរា យេ ច តសា សន្តិ [តសន្តិ (សី. បី.)] លោកេ.

៣៩៧. ‘‘តតោ អទិន្នំ បរិវជ្ជយេយ្យ, កិញ្ចិ ក្វចិ សាវកោ ពុជ្ឈមានោ;

ន ហារយេ ហរតំ នានុជញ្ញា, សព្ពំ អទិន្នំ បរិវជ្ជយេយ្យ.

៣៩៨. ‘‘អព្រហ្មចរិយំ បរិវជ្ជយេយ្យ, អង្គារកាសុំ ជលិតំវ វិញ្ញូ;

អសម្ភុណន្តោ បន ព្រហ្មចរិយំ, បរស្ស ទារំ ន អតិក្កមេយ្យ.

៣៩៩. ‘‘សភគ្គតោ វា បរិសគ្គតោ វា, ឯកស្ស វេកោ [ចេតោ (សី. ស្យា.)] ន មុសា ភណេយ្យ;

ន ភាណយេ ភណតំ នានុជញ្ញា, សព្ពំ អភូតំ បរិវជ្ជយេយ្យ.

៤០០. ‘‘មជ្ជញ្ច បានំ ន សមាចរេយ្យ, ធម្មំ ឥមំ រោចយេ យោ គហដ្ឋោ;

ន បាយយេ បិវតំ នានុជញ្ញា, ឧម្មាទនន្តំ ឥតិ នំ វិទិត្វា.

៤០១. ‘‘មទា ហិ បាបានិ ករោន្តិ ពាលា, ការេន្តិ ចញ្ញេបិ ជនេ បមត្តេ;

ឯតំ អបុញ្ញាយតនំ វិវជ្ជយេ, ឧម្មាទនំ មោហនំ ពាលកន្តំ.

៤០២. ‘‘បាណំ ន ហនេ ន ចាទិន្នមាទិយេ, មុសា ន ភាសេ ន ច មជ្ជបោ សិយា;

អព្រហ្មចរិយា វិរមេយ្យ មេថុនា, រត្តិំ ន ភុញ្ជេយ្យ វិកាលភោជនំ.

៤០៣. ‘‘មាលំ ន ធារេ ន ច គន្ធមាចរេ, មញ្ចេ ឆមាយំ វ សយេថ សន្ថតេ;

ឯតញ្ហិ អដ្ឋង្គិកមាហុបោសថំ, ពុទ្ធេន ទុក្ខន្តគុនា បកាសិតំ.

៤០៤. ‘‘តតោ ច បក្ខស្សុបវស្សុបោសថំ, ចាតុទ្ទសិំ បញ្ចទសិញ្ច អដ្ឋមិំ;

បាដិហារិយបក្ខញ្ច បសន្នមានសោ, អដ្ឋង្គុបេតំ សុសមត្តរូបំ.

៤០៥. ‘‘តតោ ច បាតោ ឧបវុត្ថុបោសថោ, អន្នេន បានេន ច ភិក្ខុសង្ឃំ;

បសន្នចិត្តោ អនុមោទមានោ, យថារហំ សំវិភជេថ វិញ្ញូ.

៤០៦. ‘‘ធម្មេន មាតាបិតរោ ភរេយ្យ, បយោជយេ ធម្មិកំ សោ វណិជ្ជំ;

ឯតំ គិហី វត្តយមប្បមត្តោ, សយម្បភេ នាម ឧបេតិ ទេវេ’’តិ.

ធម្មិកសុត្តំ ចុទ្ទសមំ និដ្ឋិតំ.

ចូឡវគ្គោ ទុតិយោ និដ្ឋិតោ.