១៣. សម្មាបរិព្ពាជនីយសុត្តំ

៣៦១. ‘‘បុច្ឆាមិ មុនិំ បហូតបញ្ញំ,

តិណ្ណំ បារង្គតំ បរិនិព្ពុតំ ឋិតត្តំ;

និក្ខម្ម ឃរា បនុជ្ជ កាមេ, កថំ ភិក្ខុ

សម្មា សោ លោកេ បរិព្ពជេយ្យ’’.

៣៦២. ‘‘យស្ស មង្គលា សមូហតា, (ឥតិ ភគវា)

ឧប្បាតា សុបិនា ច លក្ខណា ច;

សោ មង្គលទោសវិប្បហីនោ,

សម្មា សោ លោកេ បរិព្ពជេយ្យ.

៣៦៣. ‘‘រាគំ វិនយេថ មានុសេសុ, ទិព្ពេសុ កាមេសុ ចាបិ ភិក្ខុ;

អតិក្កម្ម ភវំ សមេច្ច ធម្មំ, សម្មា សោ លោកេ បរិព្ពជេយ្យ.

៣៦៤. ‘‘វិបិដ្ឋិកត្វាន បេសុណានិ, កោធំ កទរិយំ ជហេយ្យ ភិក្ខុ;

អនុរោធវិរោធវិប្បហីនោ, សម្មា សោ លោកេ បរិព្ពជេយ្យ.

៣៦៥. ‘‘ហិត្វាន បិយញ្ច អប្បិយញ្ច, អនុបាទាយ អនិស្សិតោ កុហិញ្ចិ;

សំយោជនិយេហិ វិប្បមុត្តោ, សម្មា សោ លោកេ បរិព្ពជេយ្យ.

៣៦៦. ‘‘ន សោ ឧបធីសុ សារមេតិ, អាទានេសុ វិនេយ្យ ឆន្ទរាគំ;

សោ អនិស្សិតោ អនញ្ញនេយ្យោ, សម្មា សោ លោកេ បរិព្ពជេយ្យ.

៣៦៧. ‘‘វចសា មនសា ច កម្មុនា ច, អវិរុទ្ធោ សម្មា វិទិត្វា ធម្មំ;

និព្ពានបទាភិបត្ថយានោ, សម្មា សោ លោកេ បរិព្ពជេយ្យ.

៣៦៨. ‘‘យោ វន្ទតិ មន្តិ នុណ្ណមេយ្យ [នុន្នមេយ្យ (?)], អក្កុដ្ឋោបិ ន សន្ធិយេថ ភិក្ខុ;

លទ្ធា បរភោជនំ ន មជ្ជេ, សម្មា សោ លោកេ បរិព្ពជេយ្យ.

៣៦៩. ‘‘លោភញ្ច ភវញ្ច វិប្បហាយ, វិរតោ ឆេទនពន្ធនា ច [ឆេទនពន្ធនតោ (សី. ស្យា.)] ភិក្ខុ;

សោ តិណ្ណកថំកថោ វិសល្លោ, សម្មា សោ លោកេ បរិព្ពជេយ្យ.

៣៧០. ‘‘សារុប្បំ អត្តនោ វិទិត្វា, នោ ច ភិក្ខុ ហិំសេយ្យ កញ្ចិ លោកេ;

យថា តថិយំ វិទិត្វា ធម្មំ, សម្មា សោ លោកេ បរិព្ពជេយ្យ.

៣៧១. ‘‘យស្សានុសយា ន សន្តិ កេចិ, មូលា ច [មូលា (សី. ស្យា.)] អកុសលា សមូហតាសេ;

សោ និរាសោ [និរាសយោ (សី.), និរាសសោ (ស្យា.)] អនាសិសានោ [អនាសយានោ (សី. បី.), អនាសសានោ (ស្យា.)], សម្មា សោ លោកេ បរិព្ពជេយ្យ.

៣៧២. ‘‘អាសវខីណោ បហីនមានោ, សព្ពំ រាគបថំ ឧបាតិវត្តោ;

ទន្តោ បរិនិព្ពុតោ ឋិតត្តោ, សម្មា សោ លោកេ បរិព្ពជេយ្យ.

៣៧៣. ‘‘សទ្ធោ សុតវា និយាមទស្សី, វគ្គគតេសុ ន វគ្គសារិ ធីរោ;

លោភំ ទោសំ វិនេយ្យ បដិឃំ, សម្មា សោ លោកេ បរិព្ពជេយ្យ.

៣៧៤. ‘‘សំសុទ្ធជិនោ វិវដ្ដច្ឆទោ, ធម្មេសុ វសី បារគូ អនេជោ;

សង្ខារនិរោធញាណកុសលោ, សម្មា សោ លោកេ បរិព្ពជេយ្យ.

៣៧៥. ‘‘អតីតេសុ អនាគតេសុ ចាបិ, កប្បាតីតោ អតិច្ចសុទ្ធិបញ្ញោ;

សព្ពាយតនេហិ វិប្បមុត្តោ, សម្មា សោ លោកេ បរិព្ពជេយ្យ.

៣៧៦. ‘‘អញ្ញាយ បទំ សមេច្ច ធម្មំ, វិវដំ ទិស្វាន បហានមាសវានំ;

សព្ពុបធីនំ បរិក្ខយានោ [បរិក្ខយា (បី.)], សម្មា សោ លោកេ បរិព្ពជេយ្យ’’.

៣៧៧. ‘‘អទ្ធា ហិ ភគវា តថេវ ឯតំ, យោ សោ ឯវំវិហារី ទន្តោ ភិក្ខុ;

សព្ពសំយោជនយោគវីតិវត្តោ [សព្ពសំយោជនិយេ ច វីតិវត្តោ (សី. ស្យា. បី.)], សម្មា សោ លោកេ បរិព្ពជេយ្យា’’តិ.

សម្មាបរិព្ពាជនីយសុត្តំ តេរសមំ និដ្ឋិតំ.