១២. និគ្រោធកប្បសុត្តំ

ឯវំ មេ សុតំ – ឯកំ សមយំ ភគវា អាឡវិយំ វិហរតិ អគ្គាឡវេ ចេតិយេ. តេន ខោ បន សមយេន អាយស្មតោ វង្គីសស្ស ឧបជ្ឈាយោ និគ្រោធកប្បោ នាម ថេរោ អគ្គាឡវេ ចេតិយេ អចិរបរិនិព្ពុតោ ហោតិ. អថ ខោ អាយស្មតោ វង្គីសស្ស រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘‘បរិនិព្ពុតោ នុ ខោ មេ ឧបជ្ឈាយោ ឧទាហុ នោ បរិនិព្ពុតោ’’តិ? អថ ខោ អាយស្មា វង្គីសោ សាយន្ហសមយំ បដិសល្លានា វុដ្ឋិតោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ អាយស្មា វង្គីសោ ភគវន្តំ ឯតទវោច – ‘‘ឥធ មយ្ហំ, ភន្តេ, រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘បរិនិព្ពុតោ នុ ខោ មេ ឧបជ្ឈាយោ, ឧទាហុ នោ បរិនព្ពុតោ’’’តិ. អថ ខោ អាយស្មា វង្គីសោ ឧដ្ឋាយាសនា ឯកំសំ ចីវរំ កត្វា យេន ភគវា តេនញ្ជលិំ បណាមេត្វា ភគវន្តំ គាថាយ អជ្ឈភាសិ –

៣៤៥. ‘‘បុច្ឆាម [បុច្ឆាមិ (ក.)] សត្ថារមនោមបញ្ញំ, ទិដ្ឋេវ ធម្មេ យោ វិចិកិច្ឆានំ ឆេត្តា;

អគ្គាឡវេ កាលមកាសិ ភិក្ខុ, ញាតោ យសស្សី អភិនិព្ពុតត្តោ.

៣៤៦. ‘‘និគ្រោធកប្បោ ឥតិ តស្ស នាមំ, តយា កតំ ភគវា ព្រាហ្មណស្ស;

សោ តំ នមស្សំ អចរិ មុត្យបេក្ខោ, អារទ្ធវីរិយោ ទឡ្ហធម្មទស្សី.

៣៤៧. ‘‘តំ សាវកំ សក្យ [សក្ក (សី. ស្យា. បី.)] មយម្បិ សព្ពេ, អញ្ញាតុមិច្ឆាម សមន្តចក្ខុ;

សមវដ្ឋិតា នោ សវនាយ សោតា, តុវំ នោ សត្ថា ត្វមនុត្តរោសិ.

៣៤៨. ‘‘ឆិន្ទេវ នោ វិចិកិច្ឆំ ព្រូហិ មេតំ, បរិនិព្ពុតំ វេទយ ភូរិបញ្ញ;

មជ្ឈេវ [មជ្ឈេ ច (ស្យា. ក.)] នោ ភាស សមន្តចក្ខុ, សក្កោវ ទេវាន សហស្សនេត្តោ.

៣៤៩. ‘‘យេ កេចិ គន្ថា ឥធ មោហមគ្គា, អញ្ញាណបក្ខា វិចិកិច្ឆឋានា;

តថាគតំ បត្វា ន តេ ភវន្តិ, ចក្ខុញ្ហិ ឯតំ បរមំ នរានំ.

៣៥០. ‘‘នោ ចេ ហិ ជាតុ បុរិសោ កិលេសេ, វាតោ យថា អព្ភធនំ វិហានេ;

តមោវស្ស និវុតោ សព្ពលោកោ, ន ជោតិមន្តោបិ នរា តបេយ្យុំ.

៣៥១. ‘‘ធីរា ច បជ្ជោតករា ភវន្តិ, តំ តំ អហំ វីរ [ធីរ (សី. ស្យា.)] តថេវ មញ្ញេ;

វិបស្សិនំ ជានមុបាគមុម្ហា [ជានមុបគមម្ហា (សី. ស្យា.)], បរិសាសុ នោ អាវិករោហិ កប្បំ.

៣៥២. ‘‘ខិប្បំ គិរំ ឯរយ វគ្គុ វគ្គុំ, ហំសោវ បគ្គយ្ហ សណិកំ [សណិំ (ស្យា. បី.)] និកូជ;

ពិន្ទុស្សរេន សុវិកប្បិតេន, សព្ពេវ តេ ឧជ្ជុគតា សុណោម.

៣៥៣. ‘‘បហីនជាតិមរណំ អសេសំ, និគ្គយ្ហ ធោនំ [ធោតំ (សី.)] វទេស្សាមិ ធម្មំ;

ន កាមការោ ហិ បុថុជ្ជនានំ, សង្ខេយ្យការោ ច [សង្ខយ្យការោវ (ក.)] តថាគតានំ.

៣៥៤. ‘‘សម្បន្នវេយ្យាករណំ តវេទំ, សមុជ្ជុបញ្ញស្ស [សមុជ្ជបញ្ញស្ស (ស្យា. ក.)] សមុគ្គហីតំ;

អយមញ្ជលី បច្ឆិមោ សុប្បណាមិតោ, មា មោហយី ជានមនោមបញ្ញ.

៣៥៥. ‘‘បរោវរំ [វរាវរំ (កត្ថចិ)] អរិយធម្មំ វិទិត្វា, មា មោហយី ជានមនោមវីរ;

វារិំ យថា ឃម្មនិ ឃម្មតត្តោ, វាចាភិកង្ខាមិ សុតំ បវស្ស [សុតស្ស វស្ស (ស្យា.)].

៣៥៦. ‘‘យទត្ថិកំ [យទត្ថិយំ (បី.), យទត្ថិតំ (ក.)] ព្រហ្មចរិយំ អចរី, កប្បាយនោ កច្ចិស្ស តំ អមោឃំ;

និព្ពាយិ សោ អាទុ សឧបាទិសេសោ, យថា វិមុត្តោ អហុ តំ សុណោម’’.

៣៥៧. ‘‘អច្ឆេច្ឆិ [អឆេជ្ជិ (ក.)] តណ្ហំ ឥធ នាមរូបេ, (ឥតិ ភគវា)

កណ្ហស្ស [តណ្ហាយ (ក.)] សោតំ ទីឃរត្តានុសយិតំ;

អតារិ ជាតិំ មរណំ អសេសំ,’’

ឥច្ចព្រវី ភគវា បញ្ចសេដ្ឋោ.

៣៥៨. ‘‘ឯស សុត្វា បសីទាមិ, វចោ តេ ឥសិសត្តម;

អមោឃំ កិរ មេ បុដ្ឋំ, ន មំ វញ្ចេសិ ព្រាហ្មណោ.

៣៥៩. ‘‘យថាវាទី តថាការី, អហុ ពុទ្ធស្ស សាវកោ;

អច្ឆិទា មច្ចុនោ ជាលំ, តតំ មាយាវិនោ ទឡ្ហំ.

៣៦០. ‘‘អទ្ទសា ភគវា អាទិំ, ឧបាទានស្ស កប្បិយោ;

អច្ចគា វត កប្បាយនោ, មច្ចុធេយ្យំ សុទុត្តរ’’ន្តិ.

និគ្រោធកប្បសុត្តំ ទ្វាទសមំ និដ្ឋិតំ.