៦. មេឃង្គបញ្ហោ

៦. ‘‘ភន្តេ នាគសេន, ‘មេឃស្ស បញ្ច អង្គានិ គហេតព្ពានី’តិ យំ វទេសិ, កតមានិ តានិ បញ្ច អង្គានិ គហេតព្ពានី’’តិ? ‘‘យថា, មហារាជ, មេឃោ ឧប្បន្នំ រជោជល្លំ វូបសមេតិ, ឯវមេវ ខោ, មហារាជ, យោគិនា យោគាវចរេន ឧប្បន្នំ កិលេសរជោជល្លំ វូបសមេតព្ពំ. ឥទំ, មហារាជ, មេឃស្ស បឋមំ អង្គំ គហេតព្ពំ.

‘‘បុន ចបរំ, មហារាជ, មេឃោ បថវិយា ឧណ្ហំ និព្ពាបេតិ, ឯវមេវ ខោ, មហារាជ, យោគិនា យោគាវចរេន មេត្តាភាវនាយ សទេវកោ លោកោ និព្ពាបេតព្ពោ. ឥទំ, មហារាជ, មេឃស្ស ទុតិយំ អង្គំ គហេតព្ពំ.

‘‘បុន ចបរំ, មហារាជ, មេឃោ សព្ពពីជានិ វិរុហាបេតិ, ឯវមេវ ខោ, មហារាជ, យោគិនា យោគាវចរេន សព្ពសត្តានំ សទ្ធំ ឧប្បាទេត្វា តំ សទ្ធាពីជំ តីសុ សម្បត្តីសុ រោបេតព្ពំ, ទិព្ពមានុសិកាសុ សុខសម្បត្តីសុ យាវបរមត្ថនិព្ពានសុខសម្បត្តិ. ឥទំ, មហារាជ, មេឃស្ស តតិយំ អង្គំ គហេតព្ពំ.

‘‘បុន ចបរំ, មហារាជ, មេឃោ ឧតុតោ សមុដ្ឋហិត្វា ធរណិតលរុហេ តិណរុក្ខលតាគុម្ពឱសធិវនប្បតយោ បរិរក្ខតិ, ឯវមេវ ខោ, មហារាជ, យោគិនា យោគាវចរេន យោនិសោ មនសិការំ និព្ពត្តេត្វា តេន យោនិសោ មនសិការេន សមណធម្មោ បរិរក្ខិតព្ពោ, យោនិសោ មនសិការមូលកា សព្ពេ កុសលា ធម្មា. ឥទំ, មហារាជ, មេឃស្ស ចតុត្ថំ អង្គំ គហេតព្ពំ.

‘‘បុន ចបរំ, មហារាជ, មេឃោ វស្សមានោ នទិតឡាកបោក្ខរណិយោ កន្ទរបទរសរសោព្ភឧទបានានិ ច បរិបូរេតិ ឧទកធារាហិ, ឯវមេវ ខោ, មហារាជ, យោគិនា យោគាវចរេន អាគមបរិយត្តិយា ធម្មមេឃមភិវស្សយិត្វា អធិគមកាមានំ មានសំ បរិបូរយិតព្ពំ. ឥទំ, មហារាជ, មេឃស្ស បញ្ចមំ អង្គំ គហេតព្ពំ. ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –

‘‘‘ពោធនេយ្យំ ជនំ ទិស្វា, សតសហស្សេបិ យោជនេ;

ខណេន ឧបគន្ត្វាន, ពោធេតិ តំ មហាមុនី’’’តិ.

មេឃង្គបញ្ហោ ឆដ្ឋោ.