៦. សតបត្តង្គបញ្ហោ

៦. ‘‘ភន្តេ នាគសេន, ‘សតបត្តស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, សតបត្តោ រវិត្វា បរេសំ ខេមំ វា ភយំ វា អាចិក្ខតិ, ឯវមេវ ខោ, មហារាជ, យោគិនា យោគាវចរេន បរេសំ ធម្មំ ទេសយមានេន វិនិបាតំ ភយតោ ទស្សយិតព្ពំ, និព្ពានំ ខេមតោ ទស្សយិតព្ពំ. ឥទំ, មហារាជ, សតបត្តស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន បិណ្ឌោលភារទ្វាជេន –

‘‘‘និរយេ ភយសន្តាសំ, និព្ពានេ វិបុលំ សុខំ;

ឧភយានេតានត្ថានិ ទស្សេតព្ពានិ យោគិនា’’’តិ.

សតបត្តង្គបញ្ហោ ឆដ្ឋោ.