៥. សីហវគ្គោ

១. សីហង្គបញ្ហោ

១. ‘‘ភន្តេ នាគសេន, ‘សីហស្ស សត្ត អង្គានិ គហេតព្ពានី’តិ យំ វទេសិ, កតមានិ តានិ សត្ត អង្គានិ គហេតព្ពានី’’តិ? ‘‘យថា, មហារាជ, សីហោ នាម សេតវិមលបរិសុទ្ធបណ្ឌរោ, ឯវមេវ ខោ, មហារាជ, យោគិនា យោគាវចរេន សេតវិមលបរិសុទ្ធបណ្ឌរចិត្តេន ព្យបគតកុក្កុច្ចេន ភវិតព្ពំ. ឥទំ, មហារាជ, សីហស្ស បឋមំ អង្គំ គហេតព្ពំ.

‘‘បុន ចបរំ, មហារាជ, សីហោ ចតុចរណោ វិក្កន្តចារី, ឯវមេវ ខោ, មហារាជ, យោគិនា យោគាវចរេន ចតុរិទ្ធិបាទចរណេន ភវិតព្ពំ. ឥទំ, មហារាជ, សីហស្ស ទុតិយំ អង្គំ គហេតព្ពំ.

‘‘បុន ចបរំ, មហារាជ, សីហោ អភិរូបរុចិរកេសរី, ឯវមេវ ខោ, មហារាជ, យោគិនា យោគាវចរេន អភិរូបរុចិរសីលកេសរិនា ភវិតព្ពំ. ឥទំ, មហារាជ, សីហស្ស តតិយំ អង្គំ គហេតព្ពំ.

‘‘បុន ចបរំ, មហារាជ, សីហោ ជីវិតបរិយាទានេបិ ន កស្សចិ ឱនមតិ, ឯវមេវ ខោ, មហារាជ, យោគិនា យោគាវចរេន ចីវរបិណ្ឌបាតសេនាសនគិលានបច្ចយភេសជ្ជបរិក្ខារបរិយាទានេបិ ន កស្សចិ ឱនមិតព្ពំ. ឥទំ, មហារាជ, សីហស្ស ចតុត្ថំ អង្គំ គហេតព្ពំ.

‘‘បុន ចបរំ, មហារាជ, សីហោ សបទានភក្ខោ យស្មិំ ឱកាសេ និបតតិ, តត្ថេវ យាវទត្ថំ ភក្ខយតិ, ន វរមំសំ វិចិនាតិ, ឯវមេវ ខោ, មហារាជ, យោគិនា យោគាវចរេន សបទានភក្ខេន ភវិតព្ពំ, ន កុលានិ វិចិនិតព្ពានិ, ន បុព្ពគេហំ ហិត្វា កុលានិ ឧបសង្កមិតព្ពានិ, ន ភោជនំ វិចិនិតព្ពំ, យស្មិំ ឱកាសេ កពឡំ អាទីយតិ, តស្មិំ យេវ ឱកាសេ ភុញ្ជិតព្ពំ សរីរយាបនត្ថំ [សរីរយាបនមត្តំ (សី. បី.)], ន វរភោជនំ វិចិនិតព្ពំ. ឥទំ, មហារាជ, សីហស្ស បញ្ចមំ អង្គំ គហេតព្ពំ.

‘‘បុន ចបរំ, មហារាជ, សីហោ អសន្និធិភក្ខោ, សកិំ គោចរំ ភក្ខយិត្វា ន បុន តំ ឧបគច្ឆតិ, ឯវមេវ ខោ, មហារាជ, យោគិនា យោគាវចរេន អសន្និធិការបរិភោគិនា ភវិតព្ពំ. ឥទំ, មហារាជ, សីហស្ស ឆដ្ឋំ អង្គំ គហេតព្ពំ.

‘‘បុន ចបរំ, មហារាជ, សីហោ ភោជនំ អលទ្ធា ន បរិតស្សតិ, លទ្ធាបិ ភោជនំ អគធិតោ [អគថិតោ (សី.)] អមុច្ឆិតោ អនជ្ឈោសន្នោ បរិភុញ្ជតិ, ឯវមេវ ខោ, មហារាជ, យោគិនា យោគាវចរេន ភោជនំ អលទ្ធា ន បរិតស្សិតព្ពំ, លទ្ធាបិ ភោជនំ អគធិតេន អមុច្ឆិតេន អនជ្ឈោសន្នេន អាទីនវទស្សាវិនា និស្សរណបញ្ញេន បរិភុញ្ជិតព្ពំ. ឥទំ, មហារាជ, សីហស្ស សត្តមំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន សំយុត្តនិកាយវរេ ថេរំ មហាកស្សបំ បរិកិត្តយមានេន –

‘សន្តុដ្ឋោយំ, ភិក្ខវេ, កស្សបោ ឥតរីតរេន បិណ្ឌបាតេន, ឥតរីតរបិណ្ឌបាតសន្តុដ្ឋិយា ច វណ្ណវាទី, ន ច បិណ្ឌបាតហេតុ អនេសនំ អប្បតិរូបំ អាបជ្ជតិ, អលទ្ធា ច បិណ្ឌបាតំ ន បរិតស្សតិ, លទ្ធា ច បិណ្ឌបាតំ អគធិតោ អមុច្ឆិតោ អនជ្ឈោសន្នោ អាទីនវទស្សាវី និស្សរណបញ្ញោ បរិភុញ្ជតី’’’តិ.

សីហង្គបញ្ហោ បឋមោ.

២. ចក្កវាកង្គបញ្ហោ

២. ‘‘ភន្តេ នាគសេន, ‘ចក្កវាកស្ស តីណិ អង្គានិ គហេតព្ពានី’តិ យំ វទេសិ, កតមានិ តានិ តីណិ អង្គានិ គហេតព្ពានីតិ’’? ‘‘យថា, មហារាជ, ចក្កវាកោ យាវ ជីវិតបរិយាទានា ទុតិយិកំ ន វិជហតិ, ឯវមេវ ខោ, មហារាជ, យោគិនា យោគាវចរេន យាវ ជីវិតបរិយាទានា យោនិសោ មនសិការោ ន វិជហិតព្ពោ. ឥទំ, មហារាជ, ចក្កវាកស្ស បឋមំ អង្គំ គហេតព្ពំ.

‘‘បុន ចបរំ, មហារាជ, ចក្កវាកោ សេវាលបណកភក្ខោ, តេន ច សន្តុដ្ឋិំ អាបជ្ជតិ, តាយ ច សន្តុដ្ឋិយា ពលេន ច វណ្ណេន ច ន បរិហាយតិ, ឯវមេវ ខោ, មហារាជ, យោគិនា យោគាវចរេន យថាលាភសន្តោសោ ករណីយោ, យថាលាភសន្តុដ្ឋោ ខោ, មហារាជ, យោគី យោគាវចរោ ន បរិហាយតិ សីលេន, ន បរិហាយតិ សមាធិនា, ន បរិហាយតិ បញ្ញាយ, ន បរិហាយតិ វិមុត្តិយា, ន បរិហាយតិ វិមុត្តិញាណទស្សនេន, ន បរិហាយតិ សព្ពេហិ កុសលេហិ ធម្មេហិ. ឥទំ, មហារាជ, ចក្កវាកស្ស ទុតិយំ អង្គំ គហេតព្ពំ.

‘‘បុន ចបរំ, មហារាជ, ចក្កវាកោ បាណេ ន វិហេឋយតិ, ឯវមេវ ខោ, មហារាជ, យោគិនា យោគាវចរេន និហិតទណ្ឌេន និហិតសត្ថេន លជ្ជិនា ទយាបន្នេន សព្ពបាណភូតហិតានុកម្បិនា ភវិតព្ពំ. ឥទំ, មហារាជ, ចក្កវាកស្ស តតិយំ អង្គំ គហេតព្ពំ. ភាសតម្បេតំ, មហារាជ, ភគវតា ទេវាតិទេវេន ចក្កវាកជាតកេ –

‘‘‘យោ ន ហន្តិ ន ឃាតេតិ, ន ជិនាតិ ន ជាបយេ;

មេត្តំសោ [អហិំសា (សី. បី.)] សព្ពភូតេសុ, វេរំ តស្ស ន កេនចី’’’តិ.

ចក្កវាកង្គបញ្ហោ ទុតិយោ.

៣. បេណាហិកង្គបញ្ហោ

៣. ‘‘ភន្តេ នាគសេន, ‘បេណាហិកាយ ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, បេណាហិកា សកបតិម្ហិ ឧសូយាយ ឆាបកេ ន បោសយតិ, ឯវមេវ ខោ, មហារាជ, យោគិនា យោគាវចរេន សកមនេ [សកមនោ (ក.)] កិលេសេ ឧប្បន្នេ ឧសូយាយិតព្ពំ, សតិបដ្ឋានេន សម្មាសំវរសុសិរេ បក្ខិបិត្វា មនោទ្វារេ កាយគតាសតិ ភាវេតព្ពា. ឥទំ, មហារាជ, បេណាហិកាយ បឋមំ អង្គំ គហេតព្ពំ.

‘‘បុន ចបរំ, មហារាជ, បេណាហិកា បវនេ ទិវសំ គោចរំ ចរិត្វា សាយំ បក្ខិគណំ ឧបេតិ អត្តនោ គុត្តិយា, ឯវមេវ ខោ, មហារាជ, យោគិនា យោគាវចរេន ឯកកេន បវិវេកំ សេវិតព្ពំ សំយោជនបរិមុត្តិយា, តត្រ រតិំ អលភមានេន ឧបវាទភយបរិរក្ខណាយ សង្ឃំ ឱសរិត្វា សង្ឃរក្ខិតេន វសិតព្ពំ. ឥទំ, មហារាជ, បេណាហិកាយ ទុតិយំ អង្គំ គហេតព្ពំ. ភាសិតម្បេតំ, មហារាជ, ព្រហ្មុនា សហម្បតិនា ភគវតោ សន្តិកេ –

‘‘‘សេវេថ បន្តានិ សេនាសនានិ, ចរេយ្យ សំយោជនវិប្បមោក្ខា;

សចេ រតិំ នាធិគច្ឆេយ្យ តត្ថ, សង្ឃេ វសេ រក្ខិតត្តោ សតីមា’’’តិ.

បេណាហិកង្គបញ្ហោ តតិយោ.

៤. ឃរកបោតង្គបញ្ហោ

៤. ‘‘ភន្តេ នាគសេន, ‘ឃរកបោតស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, ឃរកបោតោ បរគេហេ វសមានោ ន តេសំ កិញ្ចិ ភណ្ឌស្ស និមិត្តំ គណ្ហាតិ, មជ្ឈត្តោ វសតិ សញ្ញាពហុលោ, ឯវមេវ ខោ, មហារាជ, យោគិនា យោគាវចរេន បរកុលំ ឧបគតេន តស្មិំ កុលេ ឥត្ថីនំ វា បុរិសានំ វា មញ្ចេ វា បីឋេ វា វត្ថេ វា អលង្ការេ វា ឧបភោគេ វា បរិភោគេ វា ភោជនវិកតីសុ វា ន និមិត្តំ គហេតព្ពំ, មជ្ឈត្តេន ភវិតព្ពំ, សមណសញ្ញា បច្ចុបដ្ឋបេតព្ពា. ឥទំ, មហារាជ, ឃរកបោតស្ស ឯកំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន ចូឡនារទជាតកេ –

‘‘‘បវិសិត្វា បរកុលំ, បានត្ថំ ភោជនាយ វា [បានេសុ ភោជនេសុ វា (សី. បី.)];

មិតំ ខាទេ មិតំ ភុញ្ជេ, ន ច រូបេ មនំ ករេ’’’តិ.

ឃរកបោតង្គបញ្ហោ ចតុត្ថោ.

៥. ឧលូកង្គបញ្ហោ

៥. ‘‘ភន្តេ នាគសេន, ‘ឧលូកស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, ឧលូកោ កាកេហិ បដិវិរុទ្ធោ, រត្តិំ កាកសង្ឃំ គន្ត្វា ពហូបិ កាកេ ហនតិ, ឯវមេវ ខោ, មហារាជ, យោគិនា យោគាវចរេន អញ្ញាណេន បដិវិរុទ្ធោ កាតព្ពោ, ឯកេន រហោ និសីទិត្វា អញ្ញាណំ សម្បមទ្ទិតព្ពំ, មូលតោ ឆិន្ទិតព្ពំ. ឥទំ, មហារាជ, ឧលូកស្ស បឋមំ គហេតព្ពំ.

‘‘បុន ចបរំ, មហារាជ, ឧលូកោ សុប្បដិសល្លីនោ ហោតិ, ឯវមេវ ខោ, មហារាជ, យោគិនា យោគាវចរេន បដិសល្លានារាមេន ភវិតព្ពំ បដិសល្លានរតេន. ឥទំ, មហារាជ, ឧលូកស្ស ទុតិយំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន សំយុត្តនិកាយវរេ –

‘‘‘ឥធ, ភិក្ខវេ, ភិក្ខុ បដិសល្លានារាមោ បដិសល្លានរតោ ‘‘ឥទំ ទុក្ខ’’ន្តិ យថាភូតំ បជានាតិ, ‘‘អយំ ទុក្ខសមុទយោ’’តិ យថា ភូថំ បជានាតិ, ‘‘អយំ ទុក្ខនិរោធោ’’តិ យថាភូតំ បជានាតិ, ‘‘អយំ ទុក្ខនិរោធគាមិនី បដិបទា’’តិ យថាភូតំ បជានាតី’’’តិ.

ឧលូកង្គបញ្ហោ បញ្ចមោ.

៦. សតបត្តង្គបញ្ហោ

៦. ‘‘ភន្តេ នាគសេន, ‘សតបត្តស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, សតបត្តោ រវិត្វា បរេសំ ខេមំ វា ភយំ វា អាចិក្ខតិ, ឯវមេវ ខោ, មហារាជ, យោគិនា យោគាវចរេន បរេសំ ធម្មំ ទេសយមានេន វិនិបាតំ ភយតោ ទស្សយិតព្ពំ, និព្ពានំ ខេមតោ ទស្សយិតព្ពំ. ឥទំ, មហារាជ, សតបត្តស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន បិណ្ឌោលភារទ្វាជេន –

‘‘‘និរយេ ភយសន្តាសំ, និព្ពានេ វិបុលំ សុខំ;

ឧភយានេតានត្ថានិ ទស្សេតព្ពានិ យោគិនា’’’តិ.

សតបត្តង្គបញ្ហោ ឆដ្ឋោ.

៧. វគ្គុលិង្គបញ្ហោ

៧. ‘‘ភន្តេ នាគសេន, ‘វគ្គុលិស្ស ទ្វេ អង្គានិ គហេតព្ពានី’តិ យំ វទេសិ, កតមានិ តានិ ទ្វេ អង្គានិ គហេតព្ពានី’’តិ? ‘‘យថា, មហារាជ, វគ្គុលិ គេហំ បវិសិត្វា វិចរិត្វា និក្ខមតិ, ន តត្ថ បលិពុទ្ធតិ, ឯវមេវ ខោ, មហារាជ, យោគិនា យោគាវចរេន គាមំ បិណ្ឌាយ បវិសិត្វា សបទានំ វិចរិត្វា បដិលទ្ធលាភេន ខិប្បមេវ និក្ខមិតព្ពំ, ន តត្ថ បលិពុទ្ធេន ភវិតព្ពំ. ឥទំ, មហារាជ, វគ្គុលិស្ស បឋមំ អង្គំ គហេតព្ពំ.

‘‘បុន ចបរំ, មហារាជ, វគ្គុលិ បរគេហេ វសមានោ ន តេសំ បរិហានិំ ករោតិ, ឯវមេវ ខោ, មហារាជ, យោគិនា យោគាវចរេន កុលានិ ឧបសង្កមិត្វា អតិយាចនាយ វា វិញ្ញត្តិពហុលតាយ វា កាយទោសពហុលតាយ វា អតិភាណិតាយ វា សមានសុខទុក្ខតាយ វា ន តេសំ កោចិ វិប្បដិសារោ ករណីយោ, នបិ តេសំ មូលកម្មំ បរិហាបេតព្ពំ, សព្ពថា វឌ្ឍិ យេវ ឥច្ឆិតព្ពា. ឥទំ, មហារាជ, វគ្គុលិស្ស ទុតិយំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន ទីឃនិកាយវរេ លក្ខណសុត្តន្តេ –

‘‘‘សទ្ធាយ សីលេន សុតេន ពុទ្ធិយា, ចាគេន ធម្មេន ពហូហិ សាធុហិ;

ធនេន ធញ្ញេន ច ខេត្តវត្ថុនា, បុត្តេហិ ទារេហិ ចតុប្បទេហិ ច.

‘‘‘ញាតីហិ មិត្តេហិ ច ពន្ធវេហិ, ពលេន វណ្ណេន សុខេន ចូភយំ;

កថំ ន ហាយេយ្យុំ បរេតិ ឥច្ឆតិ, អត្ថសមិទ្ធិញ្ច បនាភិកង្ខតី’’’តិ.

វគ្គុលិង្គបញ្ហោ សត្តមោ.

៨. ជលូកង្គបញ្ហោ

៨. ‘‘ភន្តេ នាគសេន, ‘ជលូកាយ ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, ជលូកា យត្ថ អល្លីយតិ, តត្ថេវ ទឡ្ហំ អល្លីយិត្វា រុហិរំ បិវតិ, ឯវមេវ ខោ, មហារាជ, យោគិនា យោគាវចរេន យស្មិំ អារម្មណេ ចិត្តំ អល្លីយតិ, តំ អារម្មណំ វណ្ណតោ ច សណ្ឋានតោ ច ទិសតោ ច ឱកាសតោ ច បរិច្ឆេទតោ ច លិង្គតោ ច និមិត្តតោ ច ទឡ្ហំ បតិដ្ឋាបេត្វា តេនេវារម្មណេន វិមុត្តិរសមសេចនកំ បាតព្ពំ. ឥទំ, មហារាជ, ជលូកាយ ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន អនុរុទ្ធេន –

‘‘‘បរិសុទ្ធេន ចិត្តេន, អារម្មណេ បតិដ្ឋាយ;

តេន ចិត្តេន បាតព្ពំ, វិមុត្តិរសមសេចន’’’ន្តិ.

ជលូកង្គបញ្ហោ អដ្ឋមោ.

៩. សប្បង្គបញ្ហោ

៩. ‘‘ភន្តេ នាគសេន, ‘សប្បស្ស តីណិ អង្គានិ គហេតព្ពានី’តិ យំ វទេសិ, កតមានិ តានិ តីណិ អង្គានិ គហេតព្ពានី’’តិ? ‘‘យថា, មហារាជ, សប្បោ ឧរេន គច្ឆតិ, ឯវមេវ ខោ, មហារាជ, យោគិនា យោគាវចរេន បញ្ញាយ ចរិតព្ពំ, បញ្ញាយ ចរមានស្ស ខោ, មហារាជ, យោគិនោ ចិត្តំ ញាយេ ចរតិ, វិលក្ខណំ វិវជ្ជេតិ, សលក្ខណំ ភាវេតិ. ឥទំ, មហារាជ, សប្បស្ស បឋមំ អង្គំ គហេតព្ពំ.

‘‘បុន ចបរំ, មហារាជ, សប្បោ ចរមានោ ឱសធំ បរិវជ្ជេន្តោ ចរតិ, ឯវមេវ ខោ, មហារាជ, យោគិនា យោគាវចរេន ទុច្ចរិតំ បរិវជ្ជេន្តេន ចរិតព្ពំ. ឥទំ, មហារាជ, សប្បស្ស ទុតិយំ អង្គំ គហេតព្ពំ.

‘‘បុន ចបរំ, មហារាជ, សប្បោ មនុស្សេ ទិស្វា តប្បតិ [មនុស្សំ ទិស្វា កម្បតិ (ក.)] សោចតិ ចិន្តយតិ, ឯវមេវ ខោ មហារាជ យោគិនា យោគាវចរេន កុវិតក្កេ, វិតក្កេត្វា អរតិំ ឧប្បាទយិត្វា តប្បិតព្ពំ សោចិតព្ពំ ចិន្តយិតព្ពំ ‘បមាទេន មេ ទិវសោ វីតិនាមិតោ, ន សោ បុន សក្កា លទ្ធុ’ន្តិ. ឥទំ, មហារាជ, សប្បស្ស តតិយំ អង្គំ គហេតព្ពំ. ភាសិតម្បេតំ, មហារាជ, ភគវតា ភល្លាដិយជាតកេ ទ្វិន្នំ កិន្នរានំ –

‘‘‘មយេករត្តំ [យមេករត្តិំ (សី. បី.)] វិប្បវសិម្ហ លុទ្ទ, អកាមកា អញ្ញមញ្ញំ សរន្តា;

តមេករត្តំ [តមេករត្តិំ (សី. បី.)] អនុតប្បមានា, សោចាម ‘សា រត្តិ បុន នហេស្សតី’’’តិ.

សប្បង្គបញ្ហោ នវមោ.

១០. អជគរង្គបញ្ហោ

១០. ‘‘ភន្តេ នាគសេន, ‘អជគរស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, អជគរោ មហតិមហាកាយោ ពហូបិ ទិវសេ ឩនូទរោ ទីនតរោ កុច្ឆិបូរំ អាហារំ ន លភតិ, អបរិបុណ្ណោ យេវ យាវទេវ សរីរយាបនមត្តកេន យាបេតិ, ឯវមេវ ខោ, មហារាជ, យោគិនោ យោគាវចរស្ស ភិក្ខាចរិយប្បសុតស្ស បរបិណ្ឌមុបគតស្ស បរទិន្នប្បាដិកង្ខិស្ស សយំគាហប្បដិវិរតស្ស ទុល្លភំ ឧទរបរិបូរំ អាហារំ, អបិ ច អត្ថវសិកេន កុលបុត្តេន ចត្តារោ បញ្ច អាលោបេ អភុញ្ជិត្វា អវសេសំ ឧទកេន បរិបូរេតព្ពំ. ឥទំ, មហារាជ, អជគរស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –

‘‘‘អល្លំ សុក្ខំ វា ភុញ្ជន្តោ, ន ពាឡ្ហំ សុហិតោ សិយា;

ឩនូទរោ មិតាហារោ, សតោ ភិក្ខុ បរិព្ពជេ.

‘‘‘ចត្តារោ បញ្ច អាលោបេ, អភុត្វា ឧទកំ បិវេ;

អលំ ផាសុ វិហារាយ, បហិតត្តស្ស ភិក្ខុនោ’’’តិ.

អជគរង្គបញ្ហោ ទសមោ.

សីហវគ្គោ បញ្ចមោ.

តស្សុទ្ទានំ –

កេសរី ចក្កវាកោ ច, បេណាហិ ឃរកបោតកោ;

ឧលូកោ សតបត្តោ ច, វគ្គុលិ ច ជលូបិកា;

សប្បោ អជគរោ ចេវ, វគ្គោ តេន បវុច្ចតីតិ.