១. សីហង្គបញ្ហោ

១. ‘‘ភន្តេ នាគសេន, ‘សីហស្ស សត្ត អង្គានិ គហេតព្ពានី’តិ យំ វទេសិ, កតមានិ តានិ សត្ត អង្គានិ គហេតព្ពានី’’តិ? ‘‘យថា, មហារាជ, សីហោ នាម សេតវិមលបរិសុទ្ធបណ្ឌរោ, ឯវមេវ ខោ, មហារាជ, យោគិនា យោគាវចរេន សេតវិមលបរិសុទ្ធបណ្ឌរចិត្តេន ព្យបគតកុក្កុច្ចេន ភវិតព្ពំ. ឥទំ, មហារាជ, សីហស្ស បឋមំ អង្គំ គហេតព្ពំ.

‘‘បុន ចបរំ, មហារាជ, សីហោ ចតុចរណោ វិក្កន្តចារី, ឯវមេវ ខោ, មហារាជ, យោគិនា យោគាវចរេន ចតុរិទ្ធិបាទចរណេន ភវិតព្ពំ. ឥទំ, មហារាជ, សីហស្ស ទុតិយំ អង្គំ គហេតព្ពំ.

‘‘បុន ចបរំ, មហារាជ, សីហោ អភិរូបរុចិរកេសរី, ឯវមេវ ខោ, មហារាជ, យោគិនា យោគាវចរេន អភិរូបរុចិរសីលកេសរិនា ភវិតព្ពំ. ឥទំ, មហារាជ, សីហស្ស តតិយំ អង្គំ គហេតព្ពំ.

‘‘បុន ចបរំ, មហារាជ, សីហោ ជីវិតបរិយាទានេបិ ន កស្សចិ ឱនមតិ, ឯវមេវ ខោ, មហារាជ, យោគិនា យោគាវចរេន ចីវរបិណ្ឌបាតសេនាសនគិលានបច្ចយភេសជ្ជបរិក្ខារបរិយាទានេបិ ន កស្សចិ ឱនមិតព្ពំ. ឥទំ, មហារាជ, សីហស្ស ចតុត្ថំ អង្គំ គហេតព្ពំ.

‘‘បុន ចបរំ, មហារាជ, សីហោ សបទានភក្ខោ យស្មិំ ឱកាសេ និបតតិ, តត្ថេវ យាវទត្ថំ ភក្ខយតិ, ន វរមំសំ វិចិនាតិ, ឯវមេវ ខោ, មហារាជ, យោគិនា យោគាវចរេន សបទានភក្ខេន ភវិតព្ពំ, ន កុលានិ វិចិនិតព្ពានិ, ន បុព្ពគេហំ ហិត្វា កុលានិ ឧបសង្កមិតព្ពានិ, ន ភោជនំ វិចិនិតព្ពំ, យស្មិំ ឱកាសេ កពឡំ អាទីយតិ, តស្មិំ យេវ ឱកាសេ ភុញ្ជិតព្ពំ សរីរយាបនត្ថំ [សរីរយាបនមត្តំ (សី. បី.)], ន វរភោជនំ វិចិនិតព្ពំ. ឥទំ, មហារាជ, សីហស្ស បញ្ចមំ អង្គំ គហេតព្ពំ.

‘‘បុន ចបរំ, មហារាជ, សីហោ អសន្និធិភក្ខោ, សកិំ គោចរំ ភក្ខយិត្វា ន បុន តំ ឧបគច្ឆតិ, ឯវមេវ ខោ, មហារាជ, យោគិនា យោគាវចរេន អសន្និធិការបរិភោគិនា ភវិតព្ពំ. ឥទំ, មហារាជ, សីហស្ស ឆដ្ឋំ អង្គំ គហេតព្ពំ.

‘‘បុន ចបរំ, មហារាជ, សីហោ ភោជនំ អលទ្ធា ន បរិតស្សតិ, លទ្ធាបិ ភោជនំ អគធិតោ [អគថិតោ (សី.)] អមុច្ឆិតោ អនជ្ឈោសន្នោ បរិភុញ្ជតិ, ឯវមេវ ខោ, មហារាជ, យោគិនា យោគាវចរេន ភោជនំ អលទ្ធា ន បរិតស្សិតព្ពំ, លទ្ធាបិ ភោជនំ អគធិតេន អមុច្ឆិតេន អនជ្ឈោសន្នេន អាទីនវទស្សាវិនា និស្សរណបញ្ញេន បរិភុញ្ជិតព្ពំ. ឥទំ, មហារាជ, សីហស្ស សត្តមំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន សំយុត្តនិកាយវរេ ថេរំ មហាកស្សបំ បរិកិត្តយមានេន –

‘សន្តុដ្ឋោយំ, ភិក្ខវេ, កស្សបោ ឥតរីតរេន បិណ្ឌបាតេន, ឥតរីតរបិណ្ឌបាតសន្តុដ្ឋិយា ច វណ្ណវាទី, ន ច បិណ្ឌបាតហេតុ អនេសនំ អប្បតិរូបំ អាបជ្ជតិ, អលទ្ធា ច បិណ្ឌបាតំ ន បរិតស្សតិ, លទ្ធា ច បិណ្ឌបាតំ អគធិតោ អមុច្ឆិតោ អនជ្ឈោសន្នោ អាទីនវទស្សាវី និស្សរណបញ្ញោ បរិភុញ្ជតី’’’តិ.

សីហង្គបញ្ហោ បឋមោ.