៥. នកុលង្គបញ្ហោ

៥. ‘‘ភន្តេ នាគសេន, ‘នកុលស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, នកុលោ ឧរគមុបគច្ឆន្តោ ភេសជ្ជេន កាយំ បរិភាវេត្វា ឧរគមុបគច្ឆតិ គហេតុំ, ឯវមេវ ខោ, មហារាជ, យោគិនា យោគាវចរេន កោធាឃាតពហុលំ កលហវិគ្គហវិវាទវិរោធាភិភូតំ លោកមុបគច្ឆន្តេន មេត្តាភេសជ្ជេន មានសំ អនុលិម្បិតព្ពំ. ឥទំ, មហារាជ, នកុលស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន សារិបុត្តេន ធម្មសេនាបតិនា –

‘‘‘តស្មា សកំ បរេសម្បិ, កាតព្ពា មេត្តភាវនា;

មេត្តចិត្តេន ផរិតព្ពំ, ឯតំ ពុទ្ធាន សាសន’’’ន្តិ.

នកុលង្គបញ្ហោ បញ្ចមោ.