៣. ឧន្ទូរង្គបញ្ហោ

៣. ‘‘ភន្តេ នាគសេន, ‘ឧន្ទូរស្ស [ឧន្ទុរស្ស (ស្យា. ក.)] ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, ឧន្ទូរោ ឥតោចិតោ ច វិចរន្តោ អាហារូបាសីសកោ យេវ ចរតិ, ឯវមេវ ខោ, មហារាជ, យោគិនា យោគាវចរេន ឥតោចិតោ ច វិចរន្តេន យោនិសោ មនសិការូបាសីសកេនេវ ភវិតព្ពំ. ឥទំ, មហារាជ, ឧន្ទូរស្ស ឯកំ អង្គំ គហេតព្ពំ. ភាសិតម្បេតំ, មហារាជ, ថេរេន ឧបសេនេន វង្គន្តបុត្តេន –

‘‘‘ធម្មាសីសំ [ធម្មសីសំ (សី. បី.)] ករិត្វាន, វិហរន្តោ វិបស្សកោ;

អនោលីនោ វិហរតិ, ឧបសន្តោ សទា សតោ’’’តិ.

ឧន្ទូរង្គបញ្ហោ តតិយោ.