១. ឧបចិកង្គបញ្ហោ

១. ‘‘ភន្តេ នាគសេន, ‘ឧបចិកាយ ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, ឧបចិកា ឧបរិ ឆទនំ កត្វា អត្តានំ បិទហិត្វា គោចរាយ ចរតិ, ឯវមេវ ខោ, មហារាជ, យោគិនា យោគាវចរេន សីលសំវរឆទនំ កត្វា មានសំ បិទហិត្វា បិណ្ឌាយ ចរិតព្ពំ, សីលសំវរឆទនេន ខោ, មហារាជ, យោគី យោគាវចរោ សព្ពភយសមតិក្កន្តោ ហោតិ. ឥទំ, មហារាជ, ឧបចិកាយ ឯកំ អង្គំ គហេតព្ពំ, ភាសិតម្បេតំ, មហារាជ, ថេរេន ឧបសេនេន វង្គន្តបុត្តេន –

‘‘‘សីលសំវរឆទនំ, យោគី កត្វាន មានសំ;

អនុបលិត្តោ លោកេន, ភយា ច បរិមុច្ចតី’’’តិ.

ឧបចិកង្គបញ្ហោ បឋមោ.