៧. កូបង្គបញ្ហោ

៧. ‘‘ភន្តេ នាគសេន, ‘កូបស្ស ឯកំ អង្គំ គហេតព្ព’ន្តិ យំ វទេសិ, កតមំ តំ ឯកំ អង្គំ គហេតព្ព’’ន្តិ? ‘‘យថា, មហារាជ, កូបោ រជ្ជុញ្ច វរត្តញ្ច លង្ការញ្ច ធារេតិ, ឯវមេវ ខោ, មហារាជ, យោគិនា យោគាវចរេន សតិសម្បជញ្ញសមន្នាគតេន ភវិតព្ពំ, អភិក្កន្តេ បដិក្កន្តេ អាលោកិតេ វិលោកិតេ សមិញ្ជិតេ បសារិតេ សង្ឃាដិបត្តចីវរធារណេ អសិតេ បីតេ ខាយិតេ សាយិតេ ឧច្ចារបស្សាវកម្មេ គតេ ឋិតេ និសិន្នេ សុត្តេ ជាគរិតេ ភាសិតេ តុណ្ហីភាវេ សម្បជានការិនា ភវិតព្ពំ. ឥទំ, មហារាជ, កូបស្ស ឯកំ អង្គំ គហេតព្ពំ. ភាសិតម្បេតំ, មហារាជ, ភគវតា ទេវាតិទេវេន ‘សតោ, ភិក្ខវេ, ភិក្ខុ វិហរេយ្យ សម្បជានោ, អយំ វោ អម្ហាកំ អនុសាសនី’’’តិ.

កូបង្គបញ្ហោ សត្តមោ.