១០. កឋិនតបនបញ្ហោ

១០. ‘‘ភន្តេ នាគសេន, កិស្ស ហេមន្តេ សូរិយោ កឋិនំ តបតិ, នោ តថា គិម្ហេ’’តិ? ‘‘គិម្ហេ, មហារាជ, អនុបហតំ ហោតិ រជោជល្លំ, វាតក្ខុភិតា រេណូ គគនានុគតា ហោន្តិ, អាកាសេបិ អព្ភា សុពហលា ហោន្តិ, មហាវាតោ ច អធិមត្តំ វាយតិ, តេ សព្ពេ នានាកុលា សមាយុតា សូរិយរំសិយោ បិទហន្តិ, តេន គិម្ហេ សូរិយោ មន្ទំ តបតិ.

‘‘ហេមន្តេ បន, មហារាជ, ហេដ្ឋា បថវី និព្ពុតា ហោតិ, ឧបរិ មហាមេឃោ ឧបដ្ឋិតោ ហោតិ, ឧបសន្តំ ហោតិ រជោជល្លំ, រេណុ ច សន្តសន្តំ គគនេ ចរតិ, វិគតវលាហកោ ច ហោតិ អាកាសោ, វាតោ ច មន្ទមន្ទំ វាយតិ, ឯតេសំ ឧបរតិយា វិសុទ្ធា [វិសទា (សី. បី.)] ហោន្តិ សូរិយរំសិយោ, ឧបឃាតវិមុត្តស្ស សូរិយស្ស តាបោ អតិ វិយ តបតិ. ឥទមេត្ថ, មហារាជ, ការណំ, យេន ការណេន សូរិយោ ហេមន្តេ កឋិនំ តបតិ, នោ តថា គិម្ហេ’’តិ. ‘‘សព្ពីតិមុត្តោ, ភន្តេ, សូរិយោ កឋិនំ តបតិ, មេឃាទិសហគតោ កឋិនំ ន តបតី’’តិ.

កឋិនតបនបញ្ហោ ទសមោ.

និប្បបញ្ចវគ្គោ ទុតិយោ.

ឥមស្មិំ វគ្គេ ទស បញ្ហា.