៧. បាបបុញ្ញានំ អប្បានប្បភាវបញ្ហោ

៧. រាជា អាហ ‘‘ភន្តេ នាគសេន, កតរំ នុ ខោ ពហុតរំ បុញ្ញំ វា អបុញ្ញំ វា’’តិ? ‘‘បុញ្ញំ ខោ, មហារាជ, ពហុតរំ, អបុញ្ញំ ថោក’’ន្តិ. ‘‘កេន ការណេនា’’តិ? ‘‘អបុញ្ញំ ខោ, មហារាជ, ករោន្តោ វិប្បដិសារី ហោតិ ‘បាបកម្មំ មយា កត’ន្តិ, តេន បាបំ ន វឌ្ឍតិ. បុញ្ញំ ខោ, មហារាជ, ករោន្តោ អវិប្បដិសារី ហោតិ, អវិប្បដិសារិនោ បាមោជ្ជំ ជាយតិ, បមុទិតស្ស បីតិ ជាយតិ, បីតិមនស្ស កាយោ បស្សម្ភតិ, បស្សទ្ធកាយោ សុខំ វេទេតិ, សុខិនោ ចិត្តំ សមាធិយតិ, សមាហិតោ យថាភូតំ បជានាតិ, តេន ការណេន បុញ្ញំ វឌ្ឍតិ. បុរិសោ ខោ, មហារាជ, ឆិន្នហត្ថបាទោ ភគវតោ ឯកំ ឧប្បលហត្ថំ ទត្វា ឯកនវុតិកប្បានិ វិនិបាតំ ន គច្ឆិស្សតិ. ឥមិនាបិ, មហារាជ, ការណេន ភណាមិ ‘បុញ្ញំ ពហុតរំ, អបុញ្ញំ ថោក’’’ន្តិ.

‘‘កល្លោសិ, ភន្តេ នាគសេនា’’តិ.

បាបបុញ្ញានំ អប្បានប្បភាវបញ្ហោ សត្តមោ.