១១. អស្សាសបស្សាសនិរោធបញ្ហោ

១១. រាជា អាហ ‘‘ភន្តេ នាគសេន, តុម្ហេ ឯវំ ភណថ ‘សក្កា អស្សាសបស្សាសេ និរោធេតុ’’’ន្តិ? ‘‘អាម, មហារាជ, សក្កា អស្សាសបស្សាសេ និរោធេតុ’’ន្តិ. ‘‘កថំ, ភន្តេ នាគសេន, សក្កា អស្សាសបស្សាសេ និរោធេតុ’’ន្តិ. ‘‘តំ កិំ មញ្ញសិ, មហារាជ, សុតបុព្ពោ តេ កោចិ កាកច្ឆមានោ’’តិ. ‘‘អាម, ភន្តេ, សុតបុព្ពោ’’តិ. ‘‘កិំ នុ ខោ, មហារាជ, សោ សទ្ទោ កាយេ នមិតេ វិរមេយ្យា’’តិ. ‘‘អាម, ភន្តេ, វិរមេយ្យា’’តិ. ‘‘សោ ហិ នាម, មហារាជ, សទ្ទោ អភាវិតកាយស្ស អភាវិតសីលស្ស អភាវិតចិត្តស្ស អភាវិតបញ្ញស្ស កាយេ នមិតេ វិរមិស្សតិ, កិំ បន ភាវិតកាយស្ស ភាវិតសីលស្ស ភាវិតចិត្តស្ស ភាវិតបញ្ញស្ស ចតុត្ថជ្ឈានំ សមាបន្នស្ស អស្សាសបស្សាសា ន និរុជ្ឈិស្សន្តី’’តិ.

‘‘កល្លោសិ, ភន្តេ នាគសេនា’’តិ.

អស្សាសបស្សាសនិរោធបញ្ហោ ឯកាទសមោ.