៧. សរាគវីតរាគនានាករណបញ្ហោ

៧. រាជា អាហ ‘‘ភន្តេ នាគសេន, កិំ នានាករណំ សរាគស្ស ច វីតរាគស្ស ចា’’តិ? ‘‘ឯកោ ខោ, មហារាជ, អជ្ឈោសិតោ, ឯកោ អនជ្ឈោសិតោ’’តិ. ‘‘កិំ ឯតំ, ភន្តេ, អជ្ឈោសិតោ អនជ្ឈោសិតោ នាមា’’តិ? ‘‘ឯកោ ខោ, មហារាជ, អត្ថិកោ, ឯកោ អនត្ថិកោ’’តិ. ‘‘បស្សាមហំ, ភន្តេ, ឯវរូបំ យោ ច សរាគោ, យោ ច វីតរាគោ, សព្ពោបេសោ សោភនំ យេវ ឥច្ឆតិ ខាទនីយំ វា ភោជនីយំ វា, ន កោចិ បាបកំ ឥច្ឆតី’’តិ. ‘‘អវីតរាគោ ខោ, មហារាជ, រសបដិសំវេទី ច រសរាគបដិសំវេទី ច ភោជនំ ភុញ្ជតិ, វីតរាគោ បន រសបដិសំវេទី ភោជនំ ភុញ្ជតិ, នោ ច ខោ រសរាគបដិសំវេទី’’តិ.

‘‘កល្លោសិ, ភន្តេ នាគសេនា’’តិ.

សរាគវីតរាគនានាករណបញ្ហោ សត្តមោ.