៥. អសង្កមនបដិសន្ទហនបញ្ហោ

៥. រាជា អាហ ‘‘ភន្តេ នាគសេន, ន ច សង្កមតិ បដិសន្ទហតិ ចា’’តិ? ‘‘អាម, មហារាជ, ន ច សង្កមតិ បដិសន្ទហតិ ចា’’តិ. ‘‘កថំ, ភន្តេ នាគសេន, ន ច សង្កមតិ បដិសន្ទហតិ ច, ឱបម្មំ ករោហី’’តិ? ‘‘យថា, មហារាជ, កោចិទេវ បុរិសោ បទីបតោ បទីបំ បទីបេយ្យ, កិំនុ ខោ សោ, មហារាជ, បទីបោ បទីបម្ហា សង្កន្តោ’’តិ? ‘‘ន ហិ, ភន្តេ’’តិ. ‘‘ឯវមេវ ខោ, មហារាជ, ន ច សង្កមតិ បដិសន្ទហតិ ចា’’តិ.

‘‘ភិយ្យោ ឱបម្មំ ករោហី’’តិ. ‘‘អភិជានាសិ នុ, ត្វំ មហារាជ, ទហរកោ សន្តោ សិលោកាចរិយស្ស សន្តិកេ កិញ្ចិ សិលោកំ គហិត’’ន្តិ? ‘‘អាម, ភន្តេ’’តិ. ‘‘កិំនុ ខោ, មហារាជ, សោ សិលោកោ អាចរិយម្ហា សង្កន្តោ’’តិ? ‘‘ន ហិ, ភន្តេ’’តិ. ‘‘ឯវមេវ ខោ, មហារាជ, ន ច សង្កមតិ បដិសន្ទហតិ ចាតិ.

‘‘កល្លោសិ, ភន្តេ នាគសេនា’’តិ.

អសង្កមនបដិសន្ទហនបញ្ហោ បញ្ចមោ.