៣. បញ្ចាយតនកម្មនិព្ពត្តបញ្ហោ

៣. រាជា អាហ ‘‘ភន្តេ នាគសេន, យានិមានិ បញ្ចាយតនានិ, កិំ នុ តានិ នានាកម្មេហិ និព្ពត្តានិ, ឧទាហុ ឯកេន កម្មេនា’’តិ? ‘‘នានាកម្មេហិ, មហារាជ, និព្ពត្តានិ, ន ឯកេន កម្មេនា’’តិ.

‘‘ឱបម្មំ ករោហី’’តិ. ‘‘តំ កិំ មញ្ញសិ, មហារាជ, ឯកស្មិំ ខេត្តេ នានាពីជានិ វប្បេយ្យុំ, តេសំ នានាពីជានំ នានាផលានិ និព្ពត្តេយ្យុ’’ន្តិ? ‘‘អាម, ភន្តេ, និព្ពត្តេយ្យុ’’ន្តិ. ‘‘ឯវមេវ ខោ, មហារាជ, យានិ យានិ បញ្ចាយតនានិ, តានិ តានិ នានាកម្មេហិ និព្ពត្តានិ, ន ឯកេន កម្មេនា’’តិ.

‘‘កល្លោសិ, ភន្តេ នាគសេនា’’តិ.

បញ្ចាយតនកម្មនិព្ពត្តបញ្ហោ តតិយោ.