១០. សញ្ញាលក្ខណបញ្ហោ

១០. ‘‘ភន្តេ នាគសេន, កិំលក្ខណា សញ្ញា’’តិ? ‘‘សញ្ជាននលក្ខណា, មហារាជ, សញ្ញា. កិំ សញ្ជានាតិ? នីលម្បិ សញ្ជានាតិ, បីតម្បិ សញ្ជានាតិ, លោហិតម្បិ សញ្ជានាតិ, ឱទាតម្បិ សញ្ជានាតិ, មញ្ជិដ្ឋម្បិ [មញ្ជេដ្ឋម្បិ (សី. បី.)] សញ្ជានាតិ. ឯវំ ខោ, មហារាជ, សញ្ជាននលក្ខណា សញ្ញា’’តិ.

‘‘ឱបម្មំ ករោហី’’តិ. ‘‘យថា, មហារាជ, រញ្ញោ ភណ្ឌាគារិកោ ភណ្ឌាគារំ បវិសិត្វា នីលបីតលោហិតោទាតមញ្ជិដ្ឋានិ [មញ្ជេដ្ឋានិ (សី. បី.)] រាជភោគានិ រូបានិ បស្សិត្វា សញ្ជានាតិ. ឯវំ ខោ, មហារាជ, សញ្ជាននលក្ខណា សញ្ញា’’តិ.

‘‘កល្លោសិ, ភន្តេ នាគសេនា’’តិ.

សញ្ញាលក្ខណបញ្ហោ ទសមោ.