១៤. សមាធិបញ្ហោ

១៤. រាជា អាហ ‘‘ភន្តេ នាគសេន, កិំលក្ខណោ សមាធី’’តិ? ‘‘បមុខលក្ខណោ, មហារាជ, សមាធិ, យេ កេចិ កុសលា ធម្មា, សព្ពេ តេ សមាធិបមុខា ហោន្តិ សមាធិនិន្នា សមាធិបោណា សមាធិបព្ភារា’’តិ.

‘‘ឱបម្មំ ករោហី’’តិ. ‘‘យថា, មហារាជ, កូដាគារស្ស យា យាចិ គោបានសិយោ, សព្ពា តា កូដង្គមា ហោន្តិ កូដនិន្នា កូដសមោសរណា, កូដំ តាសំ អគ្គមក្ខាយតិ. ឯវមេវ ខោ, មហារាជ, យេ កេចិ កុសលា ធម្មា, សព្ពេ តេ សមាធិបមុខា ហោន្តិ សមាធិនិន្នា សមាធិបោណា សមាធិបព្ភារាតិ.

‘‘ភិយ្យោ ឱបម្មំ ករោហី’’តិ. ‘‘យថា, មហារាជ, កោចិ រាជា ចតុរង្គិនិយា សេនាយ សទ្ធិំ សង្គាមំ ឱតរេយ្យ, សព្ពាវ សេនា ហត្ថី ច អស្សា ច រថា ច បត្តី ច តប្បមុខា [តម្បមុខា (ស្យា. ក.)] ភវេយ្យុំ តន្និន្នា តប្បោណា តប្បព្ភារា តំ យេវ អនុបរិយាយេយ្យុំ. ឯវមេវ ខោ, មហារាជ, យេ កេចិ កុសលា ធម្មា, សព្ពេ តេ សមាធិបមុខា ហោន្តិ សមាធិនិន្នា សមាធិបោណា សមាធិបព្ភារា. ឯវំ ខោ, មហារាជ, បមុខលក្ខណោ សមាធិ. ភាសិតម្បេតំ, មហារាជ, ភគវតា – ‘‘សមាធិំ, ភិក្ខវេ, ភាវេថ, សមាហិតោ, ភិក្ខវេ, ភិក្ខុ យថាភូតំ បជានាតី’’តិ.

‘‘កល្លោសិ, ភន្តេ នាគសេនា’’តិ.

សមាធិបញ្ហោ ចុទ្ទសមោ.