៤១៦. បរន្តបជាតកំ (៧-២-១១)

១៥៤. អាគមិស្សតិ មេ បាបំ, អាគមិស្សតិ មេ ភយំ;

តទា ហិ ចលិតា សាខា, មនុស្សេន មិគេន វា.

១៥៥. ភីរុយា នូន មេ កាមោ, អវិទូរេ វសន្តិយា;

ករិស្សតិ កិសំ បណ្ឌុំ, សាវ សាខា បរន្តបំ.

១៥៦. សោចយិស្សតិ មំ កន្តា, គាមេ វសមនិន្ទិតា;

ករិស្សតិ កិសំ បណ្ឌុំ, សាវ សាខា បរន្តបំ.

១៥៧. តយា មំ អសិតាបង្គិ [ហសិតាបង្គិ (សី. ស្យា. បី.)], សិតានិ [មិហិតានិ (សី. ស្យា. បី.)] ភណិតានិ ច;

កិសំ បណ្ឌុំ ករិស្សន្តិ, សាវ សាខា បរន្តបំ.

១៥៨. អគមា នូន សោ សទ្ទោ, អសំសិ នូន សោ តវ;

អក្ខាតំ នូន តំ តេន, យោ តំ សាខមកម្បយិ.

១៥៩. ឥទំ ខោ តំ សមាគម្ម, មម ពាលស្ស ចិន្តិតំ;

តទា ហិ ចលិតា សាខា, មនុស្សេន មិគេន វា.

១៦០. តថេវ ត្វំ អវេទេសិ, អវញ្ចិ [អវជ្ឈិ (ក.)] បិតរំ មម;

ហន្ត្វា សាខាហិ ឆាទេន្តោ, អាគមិស្សតិ មេ [តេ (ស្យា. ក.)] ភយន្តិ.

បរន្តបជាតកំ ឯកាទសមំ.

គន្ធារវគ្គោ ទុតិយោ.

តស្សុទ្ទានំ –

វរគាម មហាកបិ ភគ្គវ ច, ទឡ្ហធម្ម សកុញ្ជរ កេសវរោ;

ឧរគោ វិធុរោ បុន ជាគរតំ, អថ កោសលាធិប បរន្តប ចាតិ.

អថ វគ្គុទ្ទានំ –

អថ សត្តនិបាតម្ហិ, វគ្គំ មេ ភណតោ សុណ;

កុក្កុ ច បុន គន្ធារោ, ទ្វេវ គុត្តា មហេសិនាតិ.

សត្តកនិបាតំ និដ្ឋិតំ.