២. គន្ធារវគ្គោ

៤០៦. គន្ធារជាតកំ (៧-២-១)

៧៦. ហិត្វា គាមសហស្សានិ, បរិបុណ្ណានិ សោឡស;

កោដ្ឋាគារានិ ផីតានិ, សន្និធិំ ទានិ កុព្ពសិ.

៧៧. ហិត្វា គន្ធារវិសយំ, បហូតធនធារិយំ [ធានិយំ (សី. បី.), ធញ្ញន្តិ អត្ថោ];

បសាសនតោ [បសាសនិតោ (សី. ស្យា.), បសាសនាតោ (បី.)] និក្ខន្តោ, ឥធ ទានិ បសាសសិ.

៧៨. ធម្មំ ភណាមិ វេទេហ, អធម្មោ មេ ន រុច្ចតិ;

ធម្មំ មេ ភណមានស្ស, ន បាបមុបលិម្បតិ.

៧៩. យេន កេនចិ វណ្ណេន, បរោ លភតិ រុប្បនំ;

មហត្ថិយម្បិ ចេ វាចំ, ន តំ ភាសេយ្យ បណ្ឌិតោ.

៨០. កាមំ រុប្បតុ វា មា វា, ភុសំវ វិកិរីយតុ;

ធម្មំ មេ ភណមានស្ស, ន បាបមុបលិម្បតិ.

៨១. នោ ចេ អស្ស សកា ពុទ្ធិ, វិនយោ វា សុសិក្ខិតោ;

វនេ អន្ធមហិំសោវ [អន្ធមហិសោវ (សី. បី.)] ចរេយ្យ ពហុកោ ជនោ.

៨២. យស្មា ច បនិធេកច្ចេ, អាចេរម្ហិ [អាចារម្ហិ (សី. បី.)] សុសិក្ខិតា;

តស្មា វិនីតវិនយា, ចរន្តិ សុសមាហិតាតិ.

គន្ធារជាតកំ បឋមំ.

៤០៧. មហាកបិជាតកំ (៧-២-២)

៨៣. អត្តានំ សង្កមំ កត្វា, យោ សោត្ថិំ សមតារយិ;

កិំ ត្វំ តេសំ កិមេ [កិមោ (សី. បី.), កិំ មេ (ស្យា.)] តុយ្ហំ, ហោន្តិ ឯតេ [ហេតេ (ស្យា.), សោ តេ (ក.)] មហាកបិ.

៨៤. រាជាហំ ឥស្សរោ តេសំ, យូថស្ស បរិហារកោ;

តេសំ សោកបរេតានំ, ភីតានំ តេ អរិន្ទម.

៨៥. ឧល្លង្ឃយិត្វា [ស លង្ឃយិត្វា (បី.), សុលង្ឃយិត្វា (ក.)] អត្តានំ, វិស្សដ្ឋធនុនោ សតំ;

តតោ អបរបាទេសុ, ទឡ្ហំ ពន្ធំ លតាគុណំ.

៨៦. ឆិន្នព្ភមិវ វាតេន, នុណ្ណោ [នុន្នោ (សី.)] រុក្ខំ ឧបាគមិំ;

សោហំ អប្បភវំ តត្ថ, សាខំ ហត្ថេហិ អគ្គហិំ.

៨៧. តំ មំ វិយាយតំ សន្តំ, សាខាយ ច លតាយ ច;

សមនុក្កមន្តា បាទេហិ, សោត្ថិំ សាខាមិគា គតា.

៨៨. តំ មំ ន តបតេ ពន្ធោ, មតោ [វធោ (សី. ស្យា. បី.)] មេ ន តបេស្សតិ;

សុខមាហរិតំ តេសំ, យេសំ រជ្ជមការយិំ.

៨៩. ឯសា តេ ឧបមា រាជ, តំ សុណោហិ អរិន្ទម [អត្ថសន្ទស្សនី កតា (បី.)];

រញ្ញា រដ្ឋស្ស យោគ្គស្ស, ពលស្ស និគមស្ស ច;

សព្ពេសំ សុខមេដ្ឋព្ពំ, ខត្តិយេន បជានតាតិ.

មហាកបិជាតកំ ទុតិយំ.

៤០៨. កុម្ភការជាតកំ (៧-២-៣)

៩០. អម្ពាហមទ្ទំ វនមន្តរស្មិំ, នីលោភាសំ ផលិតំ [ផលិនំ (បី.)] សំវិរូឡ្ហំ;

តមទ្ទសំ ផលហេតុ វិភគ្គំ, តំ ទិស្វា ភិក្ខាចរិយំ ចរាមិ.

៩១. សេលំ សុមដ្ឋំ នរវីរនិដ្ឋិតំ [នរវិទ្ទុនិដ្ឋិតំ (ក.)], នារី យុគំ ធារយិ អប្បសទ្ទំ;

ទុតិយញ្ច អាគម្ម អហោសិ សទ្ទោ, តំ ទិស្វា ភិក្ខាចរិយំ ចរាមិ.

៩២. ទិជា ទិជំ កុណបមាហរន្តំ, ឯកំ សមានំ ពហុកា សមេច្ច;

អាហារហេតូ បរិបាតយិំសុ, តំ ទិស្វា ភិក្ខាចរិយំ ចរាមិ.

៩៣. ឧសភាហមទ្ទំ យូថស្ស មជ្ឈេ, ចលក្កកុំ វណ្ណពលូបបន្នំ;

តមទ្ទសំ កាមហេតុ វិតុន្នំ, តំ ទិស្វា ភិក្ខាចរិយំ ចរាមិ.

៩៤. ករណ្ឌកោ [ករណ្ឌុនាម (សី. បី.)] កលិង្គានំ, គន្ធារានញ្ច នគ្គជិ;

និមិរាជា វិទេហានំ, បញ្ចាលានញ្ច ទុម្មុខោ;

ឯតេ រដ្ឋានិ ហិត្វាន, បព្ពជិំសុ អកិញ្ចនា.

៩៥. សព្ពេបិមេ ទេវសមា សមាគតា, អគ្គី យថា បជ្ជលិតោ តថេវិមេ;

អហម្បិ ឯកោ ចរិស្សាមិ ភគ្គវិ, ហិត្វាន កាមានិ យថោធិកានិ.

៩៦. អយមេវ កាលោ ន ហិ អញ្ញោ អត្ថិ, អនុសាសិតា មេ ន ភវេយ្យ បច្ឆា;

អហម្បិ ឯកា ចរិស្សាមិ ភគ្គវ, សកុណីវ មុត្តា បុរិសស្ស ហត្ថា.

៩៧. អាមំ បក្កញ្ច ជានន្តិ, អថោ លោណំ អលោណកំ;

តមហំ ទិស្វាន បព្ពជិំ, ចរេវ ត្វំ ចរាមហន្តិ.

កុម្ភការជាតកំ តតិយំ.

៤០៩. ទឡ្ហធម្មជាតកំ (៧-២-៤)

៩៨. អហំ ចេ ទឡ្ហធម្មស្ស [ទឡ្ហធម្មាយ (បី.)], វហន្តិ នាភិរាធយិំ;

ធរន្តី ឧរសិ សល្លំ, យុទ្ធេ វិក្កន្តចារិនី.

៩៩. នូន រាជា ន ជានាតិ [ន ហ នូន រាជា ជានាតិ (សី. បី.)], មម វិក្កមបោរិសំ;

សង្គាមេ សុកតន្តានិ, ទូតវិប្បហិតានិ ច.

១០០. សា នូនាហំ មរិស្សាមិ, អពន្ធុ អបរាយិនី [អបរាយិណី (សី.), អបរាយណី (?)];

តទា ហិ [តថា ហិ (បី.)] កុម្ភការស្ស, ទិន្នា ឆកណហារិកា.

១០១. យាវតាសីសតី បោសោ, តាវទេវ បវីណតិ;

អត្ថាបាយេ ជហន្តិ នំ, ឱដ្ឋិព្យាធិំវ ខត្តិយោ.

១០២. យោ បុព្ពេ កតកល្យាណោ, កតត្ថោ នាវពុជ្ឈតិ;

អត្ថា តស្ស បលុជ្ជន្តិ, យេ ហោន្តិ អភិបត្ថិតា.

១០៣. យោ បុព្ពេ កតកល្យាណោ, កតត្ថោ មនុពុជ្ឈតិ;

អត្ថា តស្ស បវឌ្ឍន្តិ, យេ ហោន្តិ អភិបត្ថិតា.

១០៤. តំ វោ វទាមិ ភទ្ទន្តេ [ភទ្ទំ វោ (សី. ស្យា. បី.)], យាវន្តេត្ថ សមាគតា;

សព្ពេ កតញ្ញុនោ ហោថ, ចិរំ សគ្គម្ហិ ឋស្សថាតិ.

ទឡ្ហធម្មជាតកំ ចតុត្ថំ.

៤១០. សោមទត្តជាតកំ (៧-២-៥)

១០៥. យោ មំ បុរេ បច្ចុឌ្ឌេតិ [បច្ចុទេតិ (សី. ស្យា. បី.), បច្ចុដ្ឋេតិ (ក.)], អរញ្ញេ ទូរមាយតោ;

សោ ន ទិស្សតិ មាតង្គោ, សោមទត្តោ កុហិំ គតោ.

១០៦. អយំ វា សោ មតោ សេតិ, អល្លសិង្គំវ វច្ឆិតោ [អល្លបិង្កវ ឆិជ្ជិតោ (សី. បី.), អល្លបីតំវ វិច្ឆិតោ (ស្យា.)];

ភុម្យា និបតិតោ សេតិ, អមរា វត កុញ្ជរោ.

១០៧. អនគារិយុបេតស្ស, វិប្បមុត្តស្ស តេ សតោ;

សមណស្ស ន តំ សាធុ, យំ បេតមនុសោចសិ.

១០៨. សំវាសេន ហវេ សក្ក, មនុស្សស្ស មិគស្ស វា;

ហទយេ ជាយតេ បេមំ, តំ ន សក្កា អសោចិតុំ.

១០៩. មតំ មរិស្សំ រោទន្តិ, យេ រុទន្តិ លបន្តិ ច;

តស្មា ត្វំ ឥសិ មា រោទិ, រោទិតំ មោឃមាហុ សន្តោ.

១១០. កន្ទិតេន ហវេ ព្រហ្មេ, មតោ បេតោ សមុដ្ឋហេ;

សព្ពេ សង្គម្ម រោទាម, អញ្ញមញ្ញស្ស ញាតកេ.

១១១. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

១១២. អព្ពហី វត មេ សល្លំ, យមាសិ ហទយស្សិតំ;

យោ មេ សោកបរេតស្ស, បុត្តសោកំ អបានុទិ.

១១៣. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន វាសវាតិ.

សោមទត្តជាតកំ បញ្ចមំ.

៤១១. សុសីមជាតកំ (៧-២-៦)

១១៤. កាឡានិ កេសានិ បុរេ អហេសុំ, ជាតានិ សីសម្ហិ យថាបទេសេ;

តានជ្ជ សេតានិ សុសីម [សុសិម (ក.)] ទិស្វា, ធម្មំ ចរ ព្រហ្មចរិយស្ស កាលោ.

១១៥. មមេវ ទេវ បលិតំ ន តុយ្ហំ, មមេវ សីសំ មម ឧត្តមង្គំ;

‘‘អត្ថំ ករិស្ស’’ន្តិ មុសា អភាណិំ [អភាសិំ (ក.)], ឯកាបរាធំ ខម រាជសេដ្ឋ.

១១៦. ទហរោ តុវំ ទស្សនិយោសិ រាជ, បឋមុគ្គតោ ហោសិ [ហោហិ (សី.), ហោតិ (ក.)] យថា កឡីរោ;

រជ្ជញ្ច ការេហិ មមញ្ច បស្ស, មា កាលិកំ អនុធាវី ជនិន្ទ.

១១៧. បស្សាមិ វោហំ ទហរិំ កុមារិំ, សាមដ្ឋបស្សំ សុតនុំ សុមជ្ឈំ;

កាឡប្បវាឡាវ បវេល្លមានា, បលោភយន្តីវ [សា លោភយន្តីវ (បី.)] នរេសុ គច្ឆតិ.

១១៨. តមេន បស្សាមិបរេន នារិំ, អាសីតិកំ នាវុតិកំ វ ជច្ចា;

ទណ្ឌំ គហេត្វាន បវេធមានំ, គោបានសីភោគ្គសមំ ចរន្តិំ.

១១៩. សោហំ តមេវានុវិចិន្តយន្តោ, ឯកោ សយាមិ [បស្សាមិ (ក.)] សយនស្ស មជ្ឈេ;

‘‘អហម្បិ ឯវំ’’ ឥតិ បេក្ខមានោ, ន គហេ រមេ [ន គេហេ រមេ (សី.), គេហេ ន រមេ (ស្យា. ក.)] ព្រហ្មចរិយស្ស កាលោ.

១២០. រជ្ជុវាលម្ពនី ចេសា, យា គេហេ វសតោ រតិ;

ឯវម្បិ ឆេត្វាន វជន្តិ ធីរា, អនបេក្ខិនោ កាមសុខំ បហាយាតិ.

សុសីមជាតកំ ឆដ្ឋំ.

៤១២. កោដសិម្ពលិជាតកំ (៧-២-៧)

១២១. អហំ ទសសតំព្យាមំ, ឧរគមាទាយ អាគតោ;

តញ្ច មញ្ច មហាកាយំ, ធារយំ នប្បវេធសិ [ន បវេធយិ (ក.)].

១២២. អថិមំ ខុទ្ទកំ បក្ខិំ, អប្បមំសតរំ មយា;

ធារយំ ព្យថសិ [ព្យាធសេ (សី.), ព្យធសេ (បី.), ព្យាធសិ (ក.)] ភីតា [ភីតោ (សី. ស្យា. បី.)], កមត្ថំ កោដសិម្ពលិ [កោដិសិម្ពលិ (សី. បី.)].

១២៣. មំសភក្ខោ តុវំ រាជ, ផលភក្ខោ អយំ ទិជោ;

អយំ និគ្រោធពីជានិ, បិលក្ខុទុម្ពរានិ ច;

អស្សត្ថានិ ច ភក្ខិត្វា, ខន្ធេ មេ ឱហទិស្សតិ.

១២៤. តេ រុក្ខា សំវិរូហន្តិ, មម បស្សេ និវាតជា;

តេ មំ បរិយោនន្ធិស្សន្តិ, អរុក្ខំ មំ ករិស្សរេ.

១២៥. សន្តិ អញ្ញេបិ រុក្ខា សេ, មូលិនោ ខន្ធិនោ ទុមា;

ឥមិនា សកុណជាតេន, ពីជមាហរិតា ហតា.

១២៦. អជ្ឈារូហាភិវឌ្ឍន្តិ [អជ្ឈារូឡ្ហាភិវឌ្ឍន្តិ (សី. បី.)], ព្រហន្តម្បិ វនប្បតិំ;

តស្មា រាជ បវេធាមិ, សម្បស្សំនាគតំ ភយំ.

១២៧. សង្កេយ្យ សង្កិតព្ពានិ, រក្ខេយ្យានាគតំ ភយំ;

អនាគតភយា ធីរោ, ឧភោ លោកេ អវេក្ខតីតិ.

កោដសិម្ពលិជាតកំ សត្តមំ.

៤១៣. ធូមការិជាតកំ (៧-២-៨)

១២៨. រាជា អបុច្ឆិ វិធុរំ, ធម្មកាមោ យុធិដ្ឋិលោ;

អបិ ព្រាហ្មណ ជានាសិ, កោ ឯកោ ពហុ សោចតិ.

១២៩. ព្រាហ្មណោ អជយូថេន, បហូតេធោ [ពហូតេជោ (បី. ក.), ពហុតេន្ទោ (ស្យា.)] វនេ វសំ;

ធូមំ អកាសិ វាសេដ្ឋោ, រត្តិន្ទិវមតន្ទិតោ.

១៣០. តស្ស តំ ធូមគន្ធេន, សរភា មកសឌ្ឌិតា [មកសទ្ទិតា (សី. ស្យា.), មកសដ្ដិតា (បី. ក.)];

វស្សាវាសំ ឧបាគច្ឆុំ, ធូមការិស្ស សន្តិកេ.

១៣១. សរភេសុ មនំ កត្វា, អជា សោ នាវពុជ្ឈថ;

អាគច្ឆន្តី វជន្តី វា [អាគច្ឆន្តិ វជន្តិ វា (ស្យា. បី.), អាគច្ឆន្តិំ វជន្តិំ វា (ក.)], តស្ស តា វិនសុំ [វិនស្សុំ (សី.)] អជា.

១៣២. សរភា សរទេ កាលេ, បហីនមកសេ វនេ;

បាវិសុំ គិរិទុគ្គានិ, នទីនំ បភវានិ ច.

១៣៣. សរភេ ច គតេ ទិស្វា, អជា ច វិភវំ គតា [អជេ ច វិភវំ គតេ (ក.)];

កិសោ ច វិវណ្ណោ ចាសិ, បណ្ឌុរោគី ច ព្រាហ្មណោ.

១៣៤. ឯវំ យោ សំ និរំកត្វា, អាគន្តុំ កុរុតេ បិយំ;

សោ ឯកោ ពហុ សោចតិ, ធូមការីវ ព្រាហ្មណោតិ.

ធូមការិជាតកំ អដ្ឋមំ.

៤១៤. ជាគរជាតកំ (៧-២-៩)

១៣៥. កោធ ជាគរតំ សុត្តោ, កោធ សុត្តេសុ ជាគរោ;

កោ មមេតំ វិជានាតិ, កោ តំ បដិភណាតិ មេ.

១៣៦. អហំ ជាគរតំ សុត្តោ, អហំ សុត្តេសុ ជាគរោ;

អហមេតំ វិជានាមិ, អហំ បដិភណាមិ តេ.

១៣៧. កថំ ជាគរតំ សុត្តោ, កថំ សុត្តេសុ ជាគរោ;

កថំ ឯតំ វិជានាសិ, កថំ បដិភណាសិ មេ.

១៣៨. យេ ធម្មំ នប្បជានន្តិ, សំយមោតិ ទមោតិ ច;

តេសុ សុប្បមានេសុ, អហំ ជគ្គាមិ ទេវតេ.

១៣៩. យេសំ រាគោ ច ទោសោ ច, អវិជ្ជា ច វិរាជិតា;

តេសុ ជាគរមានេសុ, អហំ សុត្តោស្មិ ទេវតេ.

១៤០. ឯវំ ជាគរតំ សុត្តោ, ឯវំ សុត្តេសុ ជាគរោ;