៤១៥. កុម្មាសបិណ្ឌិជាតកំ (៧-២-១០)

១៤២. ន កិរត្ថិ អនោមទស្សិសុ, បារិចរិយា ពុទ្ធេសុ អប្បិកា [អប្បកា (ក.)];

សុក្ខាយ អលោណិកាយ ច, បស្សផលំ កុម្មាសបិណ្ឌិយា.

១៤៣. ហត្ថិគវស្សា ចិមេ ពហូ [ហត្ថិគវាស្សា ច មេ ពហូ (សី.), ហត្ថី គវាស្សា ចិមេ ពហូ (ស្យា.), ហត្ថី គវាស្សា ច មេ ពហូ (បី.)], ធនធញ្ញំ បថវី ច កេវលា;

នារិយោ ចិមា អច្ឆរូបមា, បស្សផលំ កុម្មាសបិណ្ឌិយា.

១៤៤. អភិក្ខណំ រាជកុញ្ជរ, គាថា ភាសសិ កោសលាធិប;

បុច្ឆាមិ តំ រដ្ឋវឌ្ឍន, ពាឡ្ហំ បីតិមនោ បភាសសិ.

១៤៥. ឥមស្មិញ្ញេវ នគរេ, កុលេ អញ្ញតរេ អហុំ;

បរកម្មករោ អាសិំ, ភតកោ សីលសំវុតោ.

១៤៦. កម្មាយ និក្ខមន្តោហំ, ចតុរោ សមណេទ្ទសំ;

អាចារសីលសម្បន្នេ, សីតិភូតេ អនាសវេ.

១៤៧. តេសុ ចិត្តំ បសាទេត្វា, និសីទេត្វា [និសាទេត្វា (?)] បណ្ណសន្ថតេ;

អទំ ពុទ្ធាន កុម្មាសំ, បសន្នោ សេហិ បាណិភិ.

១៤៨. តស្ស កម្មស្ស កុសលស្ស, ឥទំ មេ ឯទិសំ ផលំ;

អនុភោមិ ឥទំ រជ្ជំ, ផីតំ ធរណិមុត្តមំ.

១៤៩. ទទំ ភុញ្ជ មា ច បមាទោ [ទទ ភុញ្ជ ច មា ច បមាទោ (សី. បី.)], ចក្កំ វត្តយ កោសលាធិប;

មា រាជ អធម្មិកោ អហុ, ធម្មំ បាលយ កោសលាធិប.

១៥០. សោហំ តទេវ បុនប្បុនំ, វដុមំ អាចរិស្សាមិ សោភនេ;

អរិយាចរិតំ សុកោសលេ, អរហន្តោ មេ មនាបាវ បស្សិតុំ.

១៥១. ទេវី វិយ អច្ឆរូបមា, មជ្ឈេ នារិគណស្ស សោភសិ;

កិំ កម្មមកាសិ ភទ្ទកំ, កេនាសិ វណ្ណវតី សុកោសលេ.

១៥២. អម្ពដ្ឋកុលស្ស ខត្តិយ, ទាស្យាហំ បរបេសិយា អហុំ;

សញ្ញតា ច [សញ្ញតា (សី. បី.)] ធម្មជីវិនី, សីលវតី ច អបាបទស្សនា.

១៥៣. ឧទ្ធដភត្តំ អហំ តទា, ចរមានស្ស អទាសិ ភិក្ខុនោ;

វិត្តា សុមនា សយំ អហំ, តស្ស កម្មស្ស ផលំ មមេទិសន្តិ.

កុម្មាសបិណ្ឌិជាតកំ ទសមំ.