៤១២. កោដសិម្ពលិជាតកំ (៧-២-៧)

១២១. អហំ ទសសតំព្យាមំ, ឧរគមាទាយ អាគតោ;

តញ្ច មញ្ច មហាកាយំ, ធារយំ នប្បវេធសិ [ន បវេធយិ (ក.)].

១២២. អថិមំ ខុទ្ទកំ បក្ខិំ, អប្បមំសតរំ មយា;

ធារយំ ព្យថសិ [ព្យាធសេ (សី.), ព្យធសេ (បី.), ព្យាធសិ (ក.)] ភីតា [ភីតោ (សី. ស្យា. បី.)], កមត្ថំ កោដសិម្ពលិ [កោដិសិម្ពលិ (សី. បី.)].

១២៣. មំសភក្ខោ តុវំ រាជ, ផលភក្ខោ អយំ ទិជោ;

អយំ និគ្រោធពីជានិ, បិលក្ខុទុម្ពរានិ ច;

អស្សត្ថានិ ច ភក្ខិត្វា, ខន្ធេ មេ ឱហទិស្សតិ.

១២៤. តេ រុក្ខា សំវិរូហន្តិ, មម បស្សេ និវាតជា;

តេ មំ បរិយោនន្ធិស្សន្តិ, អរុក្ខំ មំ ករិស្សរេ.

១២៥. សន្តិ អញ្ញេបិ រុក្ខា សេ, មូលិនោ ខន្ធិនោ ទុមា;

ឥមិនា សកុណជាតេន, ពីជមាហរិតា ហតា.

១២៦. អជ្ឈារូហាភិវឌ្ឍន្តិ [អជ្ឈារូឡ្ហាភិវឌ្ឍន្តិ (សី. បី.)], ព្រហន្តម្បិ វនប្បតិំ;

តស្មា រាជ បវេធាមិ, សម្បស្សំនាគតំ ភយំ.

១២៧. សង្កេយ្យ សង្កិតព្ពានិ, រក្ខេយ្យានាគតំ ភយំ;

អនាគតភយា ធីរោ, ឧភោ លោកេ អវេក្ខតីតិ.

កោដសិម្ពលិជាតកំ សត្តមំ.