៤១៣. ធូមការិជាតកំ (៧-២-៨)

១២៨. រាជា អបុច្ឆិ វិធុរំ, ធម្មកាមោ យុធិដ្ឋិលោ;

អបិ ព្រាហ្មណ ជានាសិ, កោ ឯកោ ពហុ សោចតិ.

១២៩. ព្រាហ្មណោ អជយូថេន, បហូតេធោ [ពហូតេជោ (បី. ក.), ពហុតេន្ទោ (ស្យា.)] វនេ វសំ;

ធូមំ អកាសិ វាសេដ្ឋោ, រត្តិន្ទិវមតន្ទិតោ.

១៣០. តស្ស តំ ធូមគន្ធេន, សរភា មកសឌ្ឌិតា [មកសទ្ទិតា (សី. ស្យា.), មកសដ្ដិតា (បី. ក.)];

វស្សាវាសំ ឧបាគច្ឆុំ, ធូមការិស្ស សន្តិកេ.

១៣១. សរភេសុ មនំ កត្វា, អជា សោ នាវពុជ្ឈថ;

អាគច្ឆន្តី វជន្តី វា [អាគច្ឆន្តិ វជន្តិ វា (ស្យា. បី.), អាគច្ឆន្តិំ វជន្តិំ វា (ក.)], តស្ស តា វិនសុំ [វិនស្សុំ (សី.)] អជា.

១៣២. សរភា សរទេ កាលេ, បហីនមកសេ វនេ;

បាវិសុំ គិរិទុគ្គានិ, នទីនំ បភវានិ ច.

១៣៣. សរភេ ច គតេ ទិស្វា, អជា ច វិភវំ គតា [អជេ ច វិភវំ គតេ (ក.)];

កិសោ ច វិវណ្ណោ ចាសិ, បណ្ឌុរោគី ច ព្រាហ្មណោ.

១៣៤. ឯវំ យោ សំ និរំកត្វា, អាគន្តុំ កុរុតេ បិយំ;

សោ ឯកោ ពហុ សោចតិ, ធូមការីវ ព្រាហ្មណោតិ.

ធូមការិជាតកំ អដ្ឋមំ.