៤១១. សុសីមជាតកំ (៧-២-៦)

១១៤. កាឡានិ កេសានិ បុរេ អហេសុំ, ជាតានិ សីសម្ហិ យថាបទេសេ;

តានជ្ជ សេតានិ សុសីម [សុសិម (ក.)] ទិស្វា, ធម្មំ ចរ ព្រហ្មចរិយស្ស កាលោ.

១១៥. មមេវ ទេវ បលិតំ ន តុយ្ហំ, មមេវ សីសំ មម ឧត្តមង្គំ;

‘‘អត្ថំ ករិស្ស’’ន្តិ មុសា អភាណិំ [អភាសិំ (ក.)], ឯកាបរាធំ ខម រាជសេដ្ឋ.

១១៦. ទហរោ តុវំ ទស្សនិយោសិ រាជ, បឋមុគ្គតោ ហោសិ [ហោហិ (សី.), ហោតិ (ក.)] យថា កឡីរោ;

រជ្ជញ្ច ការេហិ មមញ្ច បស្ស, មា កាលិកំ អនុធាវី ជនិន្ទ.

១១៧. បស្សាមិ វោហំ ទហរិំ កុមារិំ, សាមដ្ឋបស្សំ សុតនុំ សុមជ្ឈំ;

កាឡប្បវាឡាវ បវេល្លមានា, បលោភយន្តីវ [សា លោភយន្តីវ (បី.)] នរេសុ គច្ឆតិ.

១១៨. តមេន បស្សាមិបរេន នារិំ, អាសីតិកំ នាវុតិកំ វ ជច្ចា;

ទណ្ឌំ គហេត្វាន បវេធមានំ, គោបានសីភោគ្គសមំ ចរន្តិំ.

១១៩. សោហំ តមេវានុវិចិន្តយន្តោ, ឯកោ សយាមិ [បស្សាមិ (ក.)] សយនស្ស មជ្ឈេ;

‘‘អហម្បិ ឯវំ’’ ឥតិ បេក្ខមានោ, ន គហេ រមេ [ន គេហេ រមេ (សី.), គេហេ ន រមេ (ស្យា. ក.)] ព្រហ្មចរិយស្ស កាលោ.

១២០. រជ្ជុវាលម្ពនី ចេសា, យា គេហេ វសតោ រតិ;

ឯវម្បិ ឆេត្វាន វជន្តិ ធីរា, អនបេក្ខិនោ កាមសុខំ បហាយាតិ.

សុសីមជាតកំ ឆដ្ឋំ.