៤១០. សោមទត្តជាតកំ (៧-២-៥)

១០៥. យោ មំ បុរេ បច្ចុឌ្ឌេតិ [បច្ចុទេតិ (សី. ស្យា. បី.), បច្ចុដ្ឋេតិ (ក.)], អរញ្ញេ ទូរមាយតោ;

សោ ន ទិស្សតិ មាតង្គោ, សោមទត្តោ កុហិំ គតោ.

១០៦. អយំ វា សោ មតោ សេតិ, អល្លសិង្គំវ វច្ឆិតោ [អល្លបិង្កវ ឆិជ្ជិតោ (សី. បី.), អល្លបីតំវ វិច្ឆិតោ (ស្យា.)];

ភុម្យា និបតិតោ សេតិ, អមរា វត កុញ្ជរោ.

១០៧. អនគារិយុបេតស្ស, វិប្បមុត្តស្ស តេ សតោ;

សមណស្ស ន តំ សាធុ, យំ បេតមនុសោចសិ.

១០៨. សំវាសេន ហវេ សក្ក, មនុស្សស្ស មិគស្ស វា;

ហទយេ ជាយតេ បេមំ, តំ ន សក្កា អសោចិតុំ.

១០៩. មតំ មរិស្សំ រោទន្តិ, យេ រុទន្តិ លបន្តិ ច;

តស្មា ត្វំ ឥសិ មា រោទិ, រោទិតំ មោឃមាហុ សន្តោ.

១១០. កន្ទិតេន ហវេ ព្រហ្មេ, មតោ បេតោ សមុដ្ឋហេ;

សព្ពេ សង្គម្ម រោទាម, អញ្ញមញ្ញស្ស ញាតកេ.

១១១. អាទិត្តំ វត មំ សន្តំ, ឃតសិត្តំវ បាវកំ;

វារិនា វិយ ឱសិញ្ចំ, សព្ពំ និព្ពាបយេ ទរំ.

១១២. អព្ពហី វត មេ សល្លំ, យមាសិ ហទយស្សិតំ;

យោ មេ សោកបរេតស្ស, បុត្តសោកំ អបានុទិ.

១១៣. សោហំ អព្ពូឡ្ហសល្លោស្មិ, វីតសោកោ អនាវិលោ;

ន សោចាមិ ន រោទាមិ, តវ សុត្វាន វាសវាតិ.

សោមទត្តជាតកំ បញ្ចមំ.