៤០៦. គន្ធារជាតកំ (៧-២-១)

៧៦. ហិត្វា គាមសហស្សានិ, បរិបុណ្ណានិ សោឡស;

កោដ្ឋាគារានិ ផីតានិ, សន្និធិំ ទានិ កុព្ពសិ.

៧៧. ហិត្វា គន្ធារវិសយំ, បហូតធនធារិយំ [ធានិយំ (សី. បី.), ធញ្ញន្តិ អត្ថោ];

បសាសនតោ [បសាសនិតោ (សី. ស្យា.), បសាសនាតោ (បី.)] និក្ខន្តោ, ឥធ ទានិ បសាសសិ.

៧៨. ធម្មំ ភណាមិ វេទេហ, អធម្មោ មេ ន រុច្ចតិ;

ធម្មំ មេ ភណមានស្ស, ន បាបមុបលិម្បតិ.

៧៩. យេន កេនចិ វណ្ណេន, បរោ លភតិ រុប្បនំ;

មហត្ថិយម្បិ ចេ វាចំ, ន តំ ភាសេយ្យ បណ្ឌិតោ.

៨០. កាមំ រុប្បតុ វា មា វា, ភុសំវ វិកិរីយតុ;

ធម្មំ មេ ភណមានស្ស, ន បាបមុបលិម្បតិ.

៨១. នោ ចេ អស្ស សកា ពុទ្ធិ, វិនយោ វា សុសិក្ខិតោ;

វនេ អន្ធមហិំសោវ [អន្ធមហិសោវ (សី. បី.)] ចរេយ្យ ពហុកោ ជនោ.

៨២. យស្មា ច បនិធេកច្ចេ, អាចេរម្ហិ [អាចារម្ហិ (សី. បី.)] សុសិក្ខិតា;

តស្មា វិនីតវិនយា, ចរន្តិ សុសមាហិតាតិ.

គន្ធារជាតកំ បឋមំ.