៤០៧. មហាកបិជាតកំ (៧-២-២)

៨៣. អត្តានំ សង្កមំ កត្វា, យោ សោត្ថិំ សមតារយិ;

កិំ ត្វំ តេសំ កិមេ [កិមោ (សី. បី.), កិំ មេ (ស្យា.)] តុយ្ហំ, ហោន្តិ ឯតេ [ហេតេ (ស្យា.), សោ តេ (ក.)] មហាកបិ.

៨៤. រាជាហំ ឥស្សរោ តេសំ, យូថស្ស បរិហារកោ;

តេសំ សោកបរេតានំ, ភីតានំ តេ អរិន្ទម.

៨៥. ឧល្លង្ឃយិត្វា [ស លង្ឃយិត្វា (បី.), សុលង្ឃយិត្វា (ក.)] អត្តានំ, វិស្សដ្ឋធនុនោ សតំ;

តតោ អបរបាទេសុ, ទឡ្ហំ ពន្ធំ លតាគុណំ.

៨៦. ឆិន្នព្ភមិវ វាតេន, នុណ្ណោ [នុន្នោ (សី.)] រុក្ខំ ឧបាគមិំ;

សោហំ អប្បភវំ តត្ថ, សាខំ ហត្ថេហិ អគ្គហិំ.

៨៧. តំ មំ វិយាយតំ សន្តំ, សាខាយ ច លតាយ ច;

សមនុក្កមន្តា បាទេហិ, សោត្ថិំ សាខាមិគា គតា.

៨៨. តំ មំ ន តបតេ ពន្ធោ, មតោ [វធោ (សី. ស្យា. បី.)] មេ ន តបេស្សតិ;

សុខមាហរិតំ តេសំ, យេសំ រជ្ជមការយិំ.

៨៩. ឯសា តេ ឧបមា រាជ, តំ សុណោហិ អរិន្ទម [អត្ថសន្ទស្សនី កតា (បី.)];

រញ្ញា រដ្ឋស្ស យោគ្គស្ស, ពលស្ស និគមស្ស ច;

សព្ពេសំ សុខមេដ្ឋព្ពំ, ខត្តិយេន បជានតាតិ.

មហាកបិជាតកំ ទុតិយំ.