៣៩៥. បារាវតជាតកំ (៦-២-១០)

១៣៤. ចិរស្សំ វត បស្សាមិ, សហាយំ មណិធារិនំ;

សុកតា [សុកតាយ (សី. បី.)] មស្សុកុត្តិយា, សោភតេ វត មេ សខា.

១៣៥. បរូឡ្ហកច្ឆនខលោមោ, អហំ កម្មេសុ ព្យាវដោ;

ចិរស្សំ ន្ហាបិតំ លទ្ធា, លោមំ តំ អជ្ជំ ហារយិំ [អបហារយិំ (សី. បី.)].

១៣៦. យំ នុ លោមំ អហារេសិ, ទុល្លភំ លទ្ធ កប្បកំ;

អថ កិញ្ចរហិ តេ សម្ម, កណ្ឋេ កិណិកិណាយតិ [ឥទំ កណ្ឋេ កិណាយតិ (ក.), កណ្ឋេ កិំនិកិលាយតិ (ស្យា.)].

១៣៧. មនុស្សសុខុមាលានំ, មណិ កណ្ឋេសុ លម្ពតិ;

តេសាហំ អនុសិក្ខាមិ, មា ត្វំ មញ្ញិ ទវា កតំ.

១៣៨. សចេបិមំ បិហយសិ, មស្សុកុត្តិំ សុការិតំ;

ការយិស្សាមិ តេ សម្ម, មណិញ្ចាបិ ទទាមិ តេ.

១៣៩. ត្វញ្ញេវ មណិនា ឆន្នោ, សុកតាយ ច មស្សុយា;

អាមន្ត ខោ តំ គច្ឆាមិ, បិយំ មេ តវ ទស្សនន្តិ.

បារាវតជាតកំ [កាកជាតកំ (សី. បី.), មណិជាតកំ (ស្យា.)] ទសមំ.

ខរបុត្តវគ្គោ [សេនកវគ្គោ (សី. បី.), ខុរបុត្តវគ្គោ (ស្យា.), សូចិវគ្គោ (ក.)] ទុតិយោ.

តស្សុទ្ទានំ –

អថ បស្ស សសូចិ ច តុណ្ឌិលកោ, មិគ មយ្ហកបញ្ចមបក្ខិវរោ;

អថ បញ្ជលិ វារិជ មេជ្ឈ បុន, អថ វដ្ដ កបោតវរេន ទសាតិ.

អថ វគ្គុទ្ទានំ –

អថ វគ្គំ បកិត្តិស្សំ, ឆនិបាតំ វរុត្តមេ;

អវារិយា ច ខរោ ច [សេនក (សី.), សូចិ ច (ស្យា. ក.)], ទ្វេ ច វុត្តា សុព្យញ្ជនាតិ.

ឆក្កនិបាតំ និដ្ឋិតំ.