២. ខរបុត្តវគ្គោ

៣៨៦. ខរបុត្តជាតកំ (៦-២-១)

៧៦. សច្ចំ កិរេវមាហំសុ, វស្តំ [ភស្តំ (សី. បី.), កលកំ (ស្យា.), គរំ (ក.)] ពាលោតិ បណ្ឌិតា;

បស្ស ពាលោ រហោកម្មំ, អាវិកុព្ពំ ន ពុជ្ឈតិ.

៧៧. ត្វំ ខោបិ [ត្វំ នុ ខោ (សី. ស្យា.), ត្វញ្ច ខោ (បី.)] សម្ម ពាលោសិ, ខរបុត្ត វិជានហិ;

រជ្ជុយា ហិ [រជ្ជុយាសិ (បី.)] បរិក្ខិត្តោ, វង្កោដ្ឋោ ឱហិតោមុខោ.

៧៨. អបរម្បិ សម្ម តេ ពាល្យំ [អយម្បិ សម្ម តេ ពាលោ (ក.)], យោ មុត្តោ ន បលាយសិ;

សោ ច ពាលតរោ សម្ម, យំ ត្វំ វហសិ សេនកំ.

៧៩. យំ នុ សម្ម អហំ ពាលោ, អជរាជ វិជានហិ;

អថ កេន សេនកោ ពាលោ, តំ មេ អក្ខាហិ បុច្ឆិតោ.

៨០. ឧត្តមត្ថំ លភិត្វាន, ភរិយាយ យោ បទស្សតិ [ភយិយា យោ បទស្សតិ (បី.), ភយិយា ន ភវិស្សតិ (ក.)];

តេន ជហិស្សតត្តានំ, សា ចេវស្ស ន ហេស្សតិ.

៨១. ន វេ បិយម្មេតិ [ន បិយមេតិ (ក.), ន បិយមេទន្តិ (កត្ថចិ)] ជនិន្ទ តាទិសោ, អត្តំ និរំកត្វា បិយានិ សេវតិ [សេវយេ (?)];

អត្តាវ សេយ្យោ បរមា ច សេយ្យោ, លព្ភា បិយា ឱចិតត្ថេន បច្ឆាតិ.

ខរបុត្តជាតកំ បឋមំ.

៣៨៧. សូចិជាតកំ (៦-២-២)

៨២. អកក្កសំ អផរុសំ, ខរធោតំ សុបាសិយំ;

សុខុមំ តិខិណគ្គញ្ច, កោ សូចិំ កេតុមិច្ឆតិ.

៨៣. សុមជ្ជញ្ច សុបាសញ្ច, អនុបុព្ពំ [អនុបុព្ព (សី. ស្យា.)] សុវដ្ដិតំ;

ឃនឃាតិមំ បដិថទ្ធំ, កោ សូចិំ កេតុមិច្ឆតិ.

៨៤. ឥតោ ទានិ បតាយន្តិ, សូចិយោ ពឡិសានិ ច;

កោយំ កម្មារគាមស្មិំ, សូចិំ វិក្កេតុមិច្ឆតិ.

៨៥. ឥតោ សត្ថានិ គច្ឆន្តិ, កម្មន្តា វិវិធា បុថូ;

កោយំ កម្មារគាមស្មិំ, សូចិំ វិក្កេតុមិច្ឆតិ [មរហតិ (សី. ស្យា. បី.)].

៨៦. សូចិំ កម្មារគាមស្មិំ, វិក្កេតព្ពា បជានតា;

អាចរិយាវ ជានន្តិ [អាចរិយា សញ្ជានន្តិ (ក.), អាចរិយា បជានន្តិ (ស្យា.), អាចរិយាវ សញ្ជានន្តិ (បី.)], កម្មំ សុកតទុក្កដំ [ទុក្កតំ (សី. បី.)].

៨៧. ឥមំ ចេ [ឥមញ្ច (សី. ស្យា. បី.)] តេ បិតា ភទ្ទេ, សូចិំ ជញ្ញា មយា កតំ;

តយា ច មំ និមន្តេយ្យ, យញ្ចត្ថញ្ញំ ឃរេ ធនន្តិ.

សូចិជាតកំ ទុតិយំ.

៣៨៨. តុណ្ឌិលជាតកំ (៦-២-៣)

៨៨. នវឆន្នកេ [នវឆន្ទកេ (សី. បី.), នវច្ឆទ្ទកេ (ស្យា.)] ទានិ [ទោណិ (ក.), ទានំ, ទានេ (កត្ថចិ)] ទិយ្យតិ, បុណ្ណាយំ ទោណិ សុវាមិនី ឋិតា;

ពហុកេ ជនេ បាសបាណិកេ, នោ ច ខោ មេ បដិភាតិ ភុញ្ជិតុំ.

៨៩. តសសិ ភមសិ លេណមិច្ឆសិ, អត្តាណោសិ កុហិំ គមិស្សសិ;

អប្បោស្សុក្កោ ភុញ្ជ តុណ្ឌិល, មំសត្ថាយ ហិ បោសិតាម្ហសេ [បោសិយាមសេ (សី. ស្យា. បី.)].

៩០. ឱគហ រហទំ អកទ្ទមំ, សព្ពំ សេទមលំ បវាហយ;

គណ្ហាហិ នវំ វិលេបនំ, យស្ស គន្ធោ ន កទាចិ ឆិជ្ជតិ.

៩១. កតមោ រហទោ អកទ្ទមោ, កិំសុ សេទមលន្តិ វុច្ចតិ;

កតមញ្ច នវំ វិលេបនំ, យស្ស គន្ធោ ន កទាចិ ឆិជ្ជតិ.

៩២. ធម្មោ រហទោ អកទ្ទមោ, បាបំ សេទមលន្តិ វុច្ចតិ;

សីលញ្ច នវំ វិលេបនំ, តស្ស គន្ធោ ន កទាចិ ឆិជ្ជតិ.

៩៣. នន្ទន្តិ សរីរឃាតិនោ, ន ច នន្ទន្តិ សរីរធារិនោ;

បុណ្ណាយ ច បុណ្ណមាសិយា, រមមានាវ ជហន្តិ ជីវិតន្តិ.

តុណ្ឌិលជាតកំ តតិយំ.

៣៨៩. សុវណ្ណកក្កដជាតកំ (៦-២-៤)

៩៤. សិង្គីមិគោ អាយតចក្ខុនេត្តោ, អដ្ឋិត្តចោ វារិសយោ អលោមោ;

តេនាភិភូតោ កបណំ រុទាមិ, ហរេ សខា កិស្ស នុ មំ ជហាសិ.

៩៥. សោ បស្សសន្តោ មហតា ផណេន, ភុជង្គមោ កក្កដមជ្ឈបត្តោ;

សខា សខារំ បរិតាយមានោ, ភុជង្គមំ កក្កដកោ គហេសិ.

៩៦. ន វាយសំ នោ បន កណ្ហសប្បំ, ឃាសត្ថិកោ កក្កដកោ អទេយ្យ;

បុច្ឆាមិ តំ អាយតចក្ខុនេត្ត, អថ កិស្ស ហេតុម្ហ ឧភោ គហីតា.

៩៧. អយំ បុរិសោ មម អត្ថកាមោ, យោ មំ គហេត្វាន ទកាយ នេតិ;

តស្មិំ មតេ ទុក្ខមនប្បកំ មេ, អហញ្ច ឯសោ ច ឧភោ ន ហោម.

៩៨. មមញ្ច ទិស្វាន បវទ្ធកាយំ, សព្ពោ ជនោ ហិំសិតុមេវ មិច្ឆេ;

សាទុញ្ច ថូលញ្ច មុទុញ្ច មំសំ, កាកាបិ មំ ទិស្វាន [ទិស្វ (សី. បី.)] វិហេឋយេយ្យុំ.

៩៩. សចេតស្ស ហេតុម្ហ ឧភោ គហីតា, ឧដ្ឋាតុ បោសោ វិសមាវមាមិ [វិសមាចមាមិ (សី. បី. ក.)];

មមញ្ច កាកញ្ច បមុញ្ច ខិប្បំ, បុរេ វិសំ គាឡ្ហមុបេតិ មច្ចំ.

១០០. សប្បំ បមោក្ខាមិ ន តាវ កាកំ, បដិពន្ធកោ [បដិពទ្ធកោ (សី. បី.)] ហោហិតិ [ហោតិ ហិ (ស្យា.)] តាវ កាកោ;

បុរិសញ្ច ទិស្វាន សុខិំ អរោគំ, កាកំ បមោក្ខាមិ យថេវ សប្បំ.

១០១. កាកោ តទា ទេវទត្តោ អហោសិ, មារោ បន កណ្ហសប្បោ អហោសិ;

អានន្ទភទ្ទោ កក្កដកោ អហោសិ, អហំ តទា ព្រាហ្មណោ ហោមិ សត្ថាតិ [តត្ថាតិ (សី. បី.)].

សុវណ្ណកក្កដជាតកំ ចតុត្ថំ.

៣៩០. មយ្ហកជាតកំ (៦-២-៥)

១០២. សកុណោ មយ្ហកោ នាម, គិរិសានុទរីចរោ;

បក្កំ បិប្ផលិមារុយ្ហ, មយ្ហំ មយ្ហន្តិ កន្ទតិ.

១០៣. តស្សេវំ វិលបន្តស្ស, ទិជសង្ឃា សមាគតា;

ភុត្វាន បិប្ផលិំ យន្តិ, វិលបត្វេវ សោ ទិជោ.

១០៤. ឯវមេវ ឥធេកច្ចោ, សង្ឃរិត្វា ពហុំ ធនំ;

នេវត្តនោ ន ញាតីនំ, យថោធិំ បដិបជ្ជតិ.

១០៥. ន សោ អច្ឆាទនំ ភត្តំ, ន មាលំ ន វិលេបនំ;

អនុភោតិ [នានុភោតិ (ស្យា. ក.)] សកិំ កិញ្ចិ, ន សង្គណ្ហាតិ ញាតកេ.

១០៦. តស្សេវំ វិលបន្តស្ស, មយ្ហំ មយ្ហន្តិ រក្ខតោ;

រាជានោ អថ វា ចោរា, ទាយទា យេ វ [យេ ច (ស្យា. ក.)] អប្បិយា;

ធនមាទាយ គច្ឆន្តិ, វិលបត្វេវ សោ នរោ.

១០៧. ធីរោ [ធីរោ ច (សី.)] ភោគេ អធិគម្ម, សង្គណ្ហាតិ ច ញាតកេ;

តេន សោ កិត្តិំ បប្បោតិ, បេច្ច សគ្គេ បមោទតីតិ [សគ្គេ ច មោទតីតិ (សី. បី.)].

មយ្ហកជាតកំ បញ្ចមំ.

៣៩១. វិជ្ជាធរជាតកំ (៦-២-៦)

១០៨. ទុព្ពណ្ណរូបំ តុវមរិយវណ្ណី, បុរក្ខត្វា [បុរក្ខិត្វា (ស្យា. ក.)] បញ្ជលិកោ នមស្សសិ;

សេយ្យោ នុ តេ សោ ឧទវា [ឧទាហុ (ស្យា. ក.)] សរិក្ខោ, នាមំ បរស្សត្តនោ ចាបិ ព្រូហិ.

១០៩. ន នាមគោត្តំ គណ្ហន្តិ រាជ, សម្មគ្គតានុជ្ជុគតាន [សមគ្គតានុជ្ជុគតាន (ស្យា.), សមុគ្គតានុជ្ជុគតាន (ក.)] ទេវា;

អហញ្ច តេ នាមធេយ្យំ វទាមិ, សក្កោហមស្មី តិទសានមិន្ទោ.

១១០. យោ ទិស្វា ភិក្ខុំ ចរណូបបន្នំ, បុរក្ខត្វា បញ្ជលិកោ នមស្សតិ;

បុច្ឆាមិ តំ ទេវរាជេតមត្ថំ, ឥតោ ចុតោ កិំ លភតេ សុខំ សោ.

១១១. យោ ទិស្វា ភិក្ខុំ ចរណូបបន្នំ, បុរក្ខត្វា បញ្ជលិកោ នមស្សតិ;

ទិដ្ឋេវ ធម្មេ លភតេ បសំសំ, សគ្គញ្ច សោ យាតិ សរីរភេទា.

១១២. លក្ខី វត មេ ឧទបាទិ អជ្ជ, យំ វាសវំ ភូតបតិទ្ទសាម;

ភិក្ខុញ្ច ទិស្វាន តុវញ្ច សក្ក, កាហាមិ បុញ្ញានិ អនប្បកានិ.

១១៣. អទ្ធា ហវេ សេវិតព្ពា សបញ្ញា, ពហុស្សុតា យេ ពហុឋានចិន្តិនោ;

ភិក្ខុញ្ច ទិស្វាន មមញ្ច រាជ, ករោហិ បុញ្ញានិ អនប្បកានិ.

១១៤. អក្កោធនោ និច្ចបសន្នចិត្តោ, សព្ពាតិថីយាចយោគោ ភវិត្វា;

និហច្ច មានំ អភិវាទយិស្សំ, សុត្វាន ទេវិន្ទ សុភាសិតានីតិ.

វិជ្ជាធរ [ធជវិហេឋក (សី. បី.), បព្ពជិតវិហេឋក (ស្យា.)] ជាតកំ ឆដ្ឋំ.

៣៩២. សិង្ឃបុប្ផជាតកំ (៦-២-៧)

១១៥. យមេតំ [យមេកំ (បី.)] វារិជំ បុប្ផំ, អទិន្នំ ឧបសិង្ឃសិ;

ឯកង្គមេតំ ថេយ្យានំ, គន្ធថេនោសិ មារិស.

១១៦. ន ហរាមិ ន ភញ្ជាមិ, អារា សិង្ឃាមិ វារិជំ;

អថ កេន នុ វណ្ណេន, គន្ធថេនោតិ វុច្ចតិ.

១១៧. យោយំ ភិសានិ ខណតិ, បុណ្ឌរីកានិ ភញ្ជតិ;

ឯវំ អាកិណ្ណកម្មន្តោ, កស្មា ឯសោ ន វុច្ចតិ.

១១៨. អាកិណ្ណលុទ្ទោ បុរិសោ, ធាតិចេលំវ មក្ខិតោ;

តស្មិំ មេ វចនំ នត្ថិ, តញ្ចារហាមិ វត្តវេ.

១១៩. អនង្គណស្ស បោសស្ស, និច្ចំ សុចិគវេសិនោ;

វាលគ្គមត្តំ បាបស្ស, អព្ភាមត្តំវ ខាយតិ.

១២០. អទ្ធា មំ យក្ខ ជានាសិ, អថោ មំ អនុកម្បសិ;

បុនបិ យក្ខ វជ្ជាសិ, យទា បស្សសិ ឯទិសំ.

១២១. នេវ តំ ឧបជីវាមិ, នបិ តេ ភតកាម្ហសេ [ភតកម្ហសេ (សី. បី.), ភតិកម្ហសេ (ស្យា.)];

ត្វមេវ ភិក្ខុ ជានេយ្យ, យេន គច្ឆេយ្យ សុគ្គតិន្តិ.

សិង្ឃបុប្ផ [ភិសបុប្ផ (សី. បី.), ឧបសិង្ឃបុប្ផ (ស្យា.)] ជាតកំ សត្តមំ.

៣៩៣. វិឃាសាទជាតកំ (៦-២-៨)

១២២. សុសុខំ វត ជីវន្តិ, យេ ជនា វិឃាសាទិនោ;

ទិដ្ឋេវ ធម្មេ បាសំសា, សម្បរាយេ ច សុគ្គតី.

១២៣. សុកស្ស [សុវស្ស (សី. ស្យា. បី.)] ភាសមានស្ស, ន និសាមេថ បណ្ឌិតា;

ឥទំ សុណាថ សោទរិយា, អម្ហេវាយំ បសំសតិ.

១២៤. នាហំ តុម្ហេ បសំសាមិ, កុណបាទា សុណាថ មេ;

ឧច្ឆិដ្ឋភោជិនោ [ភោជនា (ក.)] តុម្ហេ, ន តុម្ហេ វិឃាសាទិនោ.

១២៥. សត្តវស្សា បព្ពជិតា, មេជ្ឈារញ្ញេ [មជ្ឈេរញ្ញេ (ក.)] សិខណ្ឌិនោ;

វិឃាសេនេវ យាបេន្តា, មយំ ចេ ភោតោ គារយ្ហា;

កេ នុ ភោតោ បសំសិយា.

១២៦. តុម្ហេ សីហានំ ព្យគ្ឃានំ, វាឡានញ្ចាវសិដ្ឋកំ;

ឧច្ឆិដ្ឋេនេវ យាបេន្តា, មញ្ញិវ្ហោ វិឃាសាទិនោ.

១២៧. យេ ព្រាហ្មណស្ស សមណស្ស, អញ្ញស្ស វា [អញ្ញស្ស ច (សី. ស្យា.), អញ្ញស្សេវ (បី.)] វនិព្ពិនោ [វណិព្ពិនោ (សី. ស្យា.)];

ទត្វាវ [ទត្វាន (បី. ក.)] សេសំ ភុញ្ជន្តិ, តេ ជនា វិឃាសាទិនោតិ.

វិឃាសាទជាតកំ អដ្ឋមំ.

៣៩៤. វដ្ដកជាតកំ (៦-២-៩)

១២៨. បណីតំ ភុញ្ជសេ ភត្តំ, សប្បិតេលញ្ច មាតុល;

អថ កេន នុ វណ្ណេន, កិសោ ត្វមសិ វាយស.

១២៩. អមិត្តមជ្ឈេ វសតោ, តេសុ អាមិសមេសតោ;

និច្ចំ ឧព្ពិគ្គហទយស្ស, កុតោ កាកស្ស ទឡ្ហិយំ.

១៣០. និច្ចំ ឧព្ពេគិនោ [ឧព្ពិគ្គិនោ (ស្យា. ក.), ឧព្ពេធិនោ (សី.)] កាកា, ធង្កា បាបេន កម្មុនា;

លទ្ធោ បិណ្ឌោ ន បីណេតិ, កិសោ តេនស្មិ វដ្ដក.

១៣១. លូខានិ តិណពីជានិ, អប្បស្នេហានិ ភុញ្ជសិ;

អថ កេន នុ វណ្ណេន, ថូលោ ត្វមសិ វដ្ដក.

១៣២. អប្បិច្ឆា អប្បចិន្តាយ, អទូរគមនេន ច;

លទ្ធាលទ្ធេន យាបេន្តោ, ថូលោ តេនស្មិ វាយស.

១៣៣. អប្បិច្ឆស្ស ហិ បោសស្ស, អប្បចិន្តសុខស្ស [អប្បចិន្តិសុខស្ស (សី. ស្យា. បី.)] ច;

សុសង្គហិតមានស្ស [សុសង្គហិតបមាណស្ស (សី. ស្យា. បី.)], វុត្តី សុសមុទានយាតិ.

វដ្ដកជាតកំ នវមំ.

៣៩៥. បារាវតជាតកំ (៦-២-១០)

១៣៤. ចិរស្សំ វត បស្សាមិ, សហាយំ មណិធារិនំ;

សុកតា [សុកតាយ (សី. បី.)] មស្សុកុត្តិយា, សោភតេ វត មេ សខា.

១៣៥. បរូឡ្ហកច្ឆនខលោមោ, អហំ កម្មេសុ ព្យាវដោ;

ចិរស្សំ ន្ហាបិតំ លទ្ធា, លោមំ តំ អជ្ជំ ហារយិំ [អបហារយិំ (សី. បី.)].

១៣៦. យំ នុ លោមំ អហារេសិ, ទុល្លភំ លទ្ធ កប្បកំ;

អថ កិញ្ចរហិ តេ សម្ម, កណ្ឋេ កិណិកិណាយតិ [ឥទំ កណ្ឋេ កិណាយតិ (ក.), កណ្ឋេ កិំនិកិលាយតិ (ស្យា.)].

១៣៧. មនុស្សសុខុមាលានំ, មណិ កណ្ឋេសុ លម្ពតិ;

តេសាហំ អនុសិក្ខាមិ, មា ត្វំ មញ្ញិ ទវា កតំ.

១៣៨. សចេបិមំ បិហយសិ, មស្សុកុត្តិំ សុការិតំ;

ការយិស្សាមិ តេ សម្ម, មណិញ្ចាបិ ទទាមិ តេ.

១៣៩. ត្វញ្ញេវ មណិនា ឆន្នោ, សុកតាយ ច មស្សុយា;

អាមន្ត ខោ តំ គច្ឆាមិ, បិយំ មេ តវ ទស្សនន្តិ.