៣៩២. សិង្ឃបុប្ផជាតកំ (៦-២-៧)

១១៥. យមេតំ [យមេកំ (បី.)] វារិជំ បុប្ផំ, អទិន្នំ ឧបសិង្ឃសិ;

ឯកង្គមេតំ ថេយ្យានំ, គន្ធថេនោសិ មារិស.

១១៦. ន ហរាមិ ន ភញ្ជាមិ, អារា សិង្ឃាមិ វារិជំ;

អថ កេន នុ វណ្ណេន, គន្ធថេនោតិ វុច្ចតិ.

១១៧. យោយំ ភិសានិ ខណតិ, បុណ្ឌរីកានិ ភញ្ជតិ;

ឯវំ អាកិណ្ណកម្មន្តោ, កស្មា ឯសោ ន វុច្ចតិ.

១១៨. អាកិណ្ណលុទ្ទោ បុរិសោ, ធាតិចេលំវ មក្ខិតោ;

តស្មិំ មេ វចនំ នត្ថិ, តញ្ចារហាមិ វត្តវេ.

១១៩. អនង្គណស្ស បោសស្ស, និច្ចំ សុចិគវេសិនោ;

វាលគ្គមត្តំ បាបស្ស, អព្ភាមត្តំវ ខាយតិ.

១២០. អទ្ធា មំ យក្ខ ជានាសិ, អថោ មំ អនុកម្បសិ;

បុនបិ យក្ខ វជ្ជាសិ, យទា បស្សសិ ឯទិសំ.

១២១. នេវ តំ ឧបជីវាមិ, នបិ តេ ភតកាម្ហសេ [ភតកម្ហសេ (សី. បី.), ភតិកម្ហសេ (ស្យា.)];

ត្វមេវ ភិក្ខុ ជានេយ្យ, យេន គច្ឆេយ្យ សុគ្គតិន្តិ.

សិង្ឃបុប្ផ [ភិសបុប្ផ (សី. បី.), ឧបសិង្ឃបុប្ផ (ស្យា.)] ជាតកំ សត្តមំ.