៣៩៣. វិឃាសាទជាតកំ (៦-២-៨)

១២២. សុសុខំ វត ជីវន្តិ, យេ ជនា វិឃាសាទិនោ;

ទិដ្ឋេវ ធម្មេ បាសំសា, សម្បរាយេ ច សុគ្គតី.

១២៣. សុកស្ស [សុវស្ស (សី. ស្យា. បី.)] ភាសមានស្ស, ន និសាមេថ បណ្ឌិតា;

ឥទំ សុណាថ សោទរិយា, អម្ហេវាយំ បសំសតិ.

១២៤. នាហំ តុម្ហេ បសំសាមិ, កុណបាទា សុណាថ មេ;

ឧច្ឆិដ្ឋភោជិនោ [ភោជនា (ក.)] តុម្ហេ, ន តុម្ហេ វិឃាសាទិនោ.

១២៥. សត្តវស្សា បព្ពជិតា, មេជ្ឈារញ្ញេ [មជ្ឈេរញ្ញេ (ក.)] សិខណ្ឌិនោ;

វិឃាសេនេវ យាបេន្តា, មយំ ចេ ភោតោ គារយ្ហា;

កេ នុ ភោតោ បសំសិយា.

១២៦. តុម្ហេ សីហានំ ព្យគ្ឃានំ, វាឡានញ្ចាវសិដ្ឋកំ;

ឧច្ឆិដ្ឋេនេវ យាបេន្តា, មញ្ញិវ្ហោ វិឃាសាទិនោ.

១២៧. យេ ព្រាហ្មណស្ស សមណស្ស, អញ្ញស្ស វា [អញ្ញស្ស ច (សី. ស្យា.), អញ្ញស្សេវ (បី.)] វនិព្ពិនោ [វណិព្ពិនោ (សី. ស្យា.)];

ទត្វាវ [ទត្វាន (បី. ក.)] សេសំ ភុញ្ជន្តិ, តេ ជនា វិឃាសាទិនោតិ.

វិឃាសាទជាតកំ អដ្ឋមំ.