២៨២. សេយ្យជាតកំ (៣-៤-២)

៩៤. សេយ្យំសោ សេយ្យសោ ហោតិ, យោ សេយ្យមុបសេវតិ;

ឯកេន សន្ធិំ កត្វាន, សតំ វជ្ឈេ [មច្ចេ (ក.), ពជ្ឈេ (ក. អដ្ឋ.)] អមោចយិំ.

៩៥. [កស្មា…បេ… សគ្គំ ន គច្ឆេយ្យ (កត្ថចិ)] តស្មា សព្ពេន លោកេន, សន្ធិំ កត្វាន ឯកតោ [ឯកកោ (សី. ស្យា. បី.)];

បេច្ច សគ្គំ និគច្ឆេយ្យ [កស្មា…បេ… សគ្គំ ន គច្ឆេយ្យ (កត្ថចិ)], ឥទំ សុណាថ កាសិយា [កាសយោ (សី. បី.)].

៩៦. ឥទំ វត្វា មហារាជា, កំសោ ពារាណសិគ្គហោ;

ធនុំ កណ្ឌញ្ច [តូណិញ្ច (សី. បី.)] និក្ខិប្ប, សំយមំ អជ្ឈុបាគមីតិ.

សេយ្យជាតកំ ទុតិយំ.