២៨៣. វឌ្ឍកីសូករជាតកំ (៣-៤-៣)

៩៧. វរំ វរំ ត្វំ និហនំ បុរេ ចរិ, អស្មិំ បទេសេ អភិភុយ្យ សូករេ;

សោ ទានិ ឯកោ ព្យបគម្ម ឈាយសិ, ពលំ នុ តេ ព្យគ្ឃ ន ចជ្ជ វិជ្ជតិ.

៩៨. ឥមេ សុទំ [ឥមស្សុ តា (ស្យា. ក.)] យន្តិ ទិសោទិសំ បុរេ, ភយដ្ដិតា លេណគវេសិនោ បុថុ;

តេ ទានិ សង្គម្ម វសន្តិ ឯកតោ, យត្ថដ្ឋិតា ទុប្បសហជ្ជមេ [ទុប្បសហជ្ជិមេ (ស្យា.)] មយា.

៩៩. នមត្ថុ សង្ឃាន សមាគតានំ, ទិស្វា សយំ សខ្យ វទាមិ អព្ភុតំ;

ព្យគ្ឃំ មិគា យត្ថ ជិនិំសុ ទាឋិនោ, សាមគ្គិយា ទាឋពលេសុ មុច្ចរេតិ.

វឌ្ឍកីសូករជាតកំ តតិយំ.