៤. អព្ភន្តរវគ្គោ

២៨១. អព្ភន្តរជាតកំ (៣-៤-១)

៩១. អព្ភន្តរោ នាម ទុមោ, យស្ស ទិព្យមិទំ ផលំ;

ភុត្វា ទោហឡិនី នារី, ចក្កវត្តិំ វិជាយតិ.

៩២. ត្វម្បិ [ត្វញ្ច (សី. បី.), ត្វំ ហិ (ក.)] ភទ្ទេ មហេសីសិ, សា ចាបិ [ចាសិ (សី. បី.)] បតិនោ បិយា;

អាហរិស្សតិ តេ រាជា, ឥទំ អព្ភន្តរំ ផលំ.

៩៣. ភត្តុរត្ថេ បរក្កន្តោ, យំ ឋានមធិគច្ឆតិ;

សូរោ អត្តបរិច្ចាគី, លភមានោ ភវាមហន្តិ.

អព្ភន្តរជាតកំ បឋមំ.

២៨២. សេយ្យជាតកំ (៣-៤-២)

៩៤. សេយ្យំសោ សេយ្យសោ ហោតិ, យោ សេយ្យមុបសេវតិ;

ឯកេន សន្ធិំ កត្វាន, សតំ វជ្ឈេ [មច្ចេ (ក.), ពជ្ឈេ (ក. អដ្ឋ.)] អមោចយិំ.

៩៥. [កស្មា…បេ… សគ្គំ ន គច្ឆេយ្យ (កត្ថចិ)] តស្មា សព្ពេន លោកេន, សន្ធិំ កត្វាន ឯកតោ [ឯកកោ (សី. ស្យា. បី.)];

បេច្ច សគ្គំ និគច្ឆេយ្យ [កស្មា…បេ… សគ្គំ ន គច្ឆេយ្យ (កត្ថចិ)], ឥទំ សុណាថ កាសិយា [កាសយោ (សី. បី.)].

៩៦. ឥទំ វត្វា មហារាជា, កំសោ ពារាណសិគ្គហោ;

ធនុំ កណ្ឌញ្ច [តូណិញ្ច (សី. បី.)] និក្ខិប្ប, សំយមំ អជ្ឈុបាគមីតិ.

សេយ្យជាតកំ ទុតិយំ.

២៨៣. វឌ្ឍកីសូករជាតកំ (៣-៤-៣)

៩៧. វរំ វរំ ត្វំ និហនំ បុរេ ចរិ, អស្មិំ បទេសេ អភិភុយ្យ សូករេ;

សោ ទានិ ឯកោ ព្យបគម្ម ឈាយសិ, ពលំ នុ តេ ព្យគ្ឃ ន ចជ្ជ វិជ្ជតិ.

៩៨. ឥមេ សុទំ [ឥមស្សុ តា (ស្យា. ក.)] យន្តិ ទិសោទិសំ បុរេ, ភយដ្ដិតា លេណគវេសិនោ បុថុ;

តេ ទានិ សង្គម្ម វសន្តិ ឯកតោ, យត្ថដ្ឋិតា ទុប្បសហជ្ជមេ [ទុប្បសហជ្ជិមេ (ស្យា.)] មយា.

៩៩. នមត្ថុ សង្ឃាន សមាគតានំ, ទិស្វា សយំ សខ្យ វទាមិ អព្ភុតំ;

ព្យគ្ឃំ មិគា យត្ថ ជិនិំសុ ទាឋិនោ, សាមគ្គិយា ទាឋពលេសុ មុច្ចរេតិ.

វឌ្ឍកីសូករជាតកំ តតិយំ.

២៨៤. សិរិជាតកំ (៣-៤-៤)

១០០. យំ ឧស្សុកា សង្ឃរន្តិ, អលក្ខិកា ពហុំ ធនំ;

សិប្បវន្តោ អសិប្បា ច, លក្ខិវា តានិ ភុញ្ជតិ.

១០១. សព្ពត្ថ កតបុញ្ញស្ស, អតិច្ចញ្ញេវ បាណិនោ;

ឧប្បជ្ជន្តិ ពហូ ភោគា, អប្បនាយតនេសុបិ.

១០២. កុក្កុដោ [កុក្កុដ (សី. បី.), កុក្កុដា (សី. និស្សយ, សទ្ទនីតិ)] មណយោ ទណ្ឌោ, ថិយោ ច បុញ្ញលក្ខណា;

ឧប្បជ្ជន្តិ អបាបស្ស, កតបុញ្ញស្ស ជន្តុនោតិ.

សិរិជាតកំ ចតុត្ថំ.

២៨៥. មណិសូករជាតកំ (៣-៤-៥)

១០៣. ទរិយា សត្ត វស្សានិ, តិំសមត្តា វសាមសេ;

ហញ្ញាម [ហញ្ឆេម (សី. បី.), ហញ្ឆាម (?)] មណិនោ អាភំ, ឥតិ នោ មន្តនំ អហុ.

១០៤. យាវតា មណិំ ឃំសាម [យាវ យាវ និឃំសាម (សី. បី.)], ភិយ្យោ វោទាយតេ មណិ;

ឥទញ្ច ទានិ បុច្ឆាម, កិំ កិច្ចំ ឥធ មញ្ញសិ.

១០៥. អយំ មណិ វេឡូរិយោ, អកាចោ វិមលោ [វិបុលោ (ក.)] សុភោ;

នាស្ស សក្កា សិរិំ ហន្តុំ, អបក្កមថ សូករាតិ.

មណិសូករ [មណិឃំស (ក.)] ជាតកំ បញ្ចមំ.

២៨៦. សាលូកជាតកំ (៣-៤-៦)

១០៦. មា សាលូកស្ស បិហយិ, អាតុរន្នានិ ភុញ្ជតិ;

អប្បោស្សុក្កោ ភុសំ ខាទ, ឯតំ ទីឃាយុលក្ខណំ.

១០៧. ឥទានិ សោ ឥធាគន្ត្វា, អតិថី យុត្តសេវកោ;

អថ ទក្ខសិ សាលូកំ, សយន្តំ មុសលុត្តរំ.

១០៨. វិកន្តំ [វិកត្តំ (សី.), វិកន្តិយមានំ ឆិន្ទិយមានំតិ អត្ថោ] សូករំ ទិស្វា, សយន្តំ មុសលុត្តរំ;

ជរគ្គវា វិចិន្តេសុំ, វរម្ហាកំ ភុសាមិវាតិ.

សាលូកជាតកំ ឆដ្ឋំ.

២៨៧. លាភគរហជាតកំ (៣-៤-៧)

១០៩. នានុម្មត្តោ នាបិសុណោ, នានដោ នាកុតូហលោ;

មូឡ្ហេសុ លភតេ លាភំ, ឯសា តេ អនុសាសនី.

១១០. ធិរត្ថុ តំ យសលាភំ, ធនលាភញ្ច ព្រាហ្មណ;

យា វុត្តិ វិនិបាតេន, អធម្មចរណេន [អធម្មចរិយាយ (សី. ស្យា.)] វា.

១១១. អបិ ចេ បត្តមាទាយ, អនគារោ បរិព្ពជេ;

ឯសាវ ជីវិកា សេយ្យោ [សេយ្យា (សី. ស្យា. បី.)], យា ចាធម្មេន ឯសនាតិ.

លាភគរហជាតកំ សត្តមំ.

២៨៨. មច្ឆុទ្ទានជាតកំ (៣-៤-៨)

១១២. អគ្ឃន្តិ មច្ឆា អធិកំ សហស្សំ, ន សោ អត្ថិ យោ ឥមំ សទ្ទហេយ្យ;

មយ្ហញ្ច អស្សុ ឥធ សត្ត មាសា, អហម្បិ តំ មច្ឆុទ្ទានំ កិណេយ្យំ.

១១៣. មច្ឆានំ ភោជនំ ទត្វា, មម ទក្ខិណមាទិសិ;

តំ ទក្ខិណំ សរន្តិយា, កតំ អបចិតិំ តយា.

១១៤. បទុដ្ឋចិត្តស្ស ន ផាតិ ហោតិ, ន ចាបិ តំ [នំ (សី. ស្យា.)] ទេវតា បូជយន្តិ;

យោ ភាតរំ បេត្តិកំ សាបតេយ្យំ, អវញ្ចយី ទុក្កដកម្មការីតិ.

មច្ឆុទ្ទានជាតកំ អដ្ឋមំ.

២៨៩. នានាឆន្ទជាតកំ (៣-៤-៩)

១១៥. នានាឆន្ទា មហារាជ, ឯកាគារេ វសាមសេ;

អហំ គាមវរំ ឥច្ឆេ, ព្រាហ្មណី ច គវំ សតំ.

១១៦. បុត្តោ ច អាជញ្ញរថំ, កញ្ញា ច មណិកុណ្ឌលំ;

យា ចេសា បុណ្ណិកា ជម្មី, ឧទុក្ខលំភិកង្ខតិ.

១១៧. ព្រាហ្មណស្ស គាមវរំ, ព្រាហ្មណិយា គវំ សតំ;

បុត្តស្ស អាជញ្ញរថំ, កញ្ញាយ មណិកុណ្ឌលំ;

យញ្ចេតំ បុណ្ណិកំ ជម្មិំ, បដិបាទេថុទុក្ខលន្តិ.

នានាឆន្ទជាតកំ នវមំ.

២៩០. សីលវីមំសកជាតកំ (៣-៤-១០)

១១៨. សីលំ កិរេវ កល្យាណំ, សីលំ លោកេ អនុត្តរំ;

បស្ស ឃោរវិសោ នាគោ, សីលវាតិ ន ហញ្ញតិ.

១១៩. សោហំ សីលំ សមាទិស្សំ, លោកេ អនុមតំ សិវំ;

អរិយវុត្តិសមាចារោ, យេន វុច្ចតិ សីលវា.

១២០. ញាតីនញ្ច បិយោ ហោតិ, មិត្តេសុ ច វិរោចតិ;

កាយស្ស ភេទា សុគតិំ, ឧបបជ្ជតិ សីលវាតិ.

សីលវីមំសកជាតកំ ទសមំ.

អព្ភន្តរវគ្គោ ចតុត្ថោ.

តស្សុទ្ទានំ –

ទុម កំសវរុត្តមព្យគ្ឃមិគា, មណយោ មណិ សាលុកមវ្ហយនោ;

អនុសាសនិយោបិ ច មច្ឆវរោ, មណិកុណ្ឌលកេន កិរេន ទសាតិ.